Dedevwo wa damoma wu ne vwo omamerhomẹ uvuẹn orọnmo ọrhẹ ekrun ọnọ, ọrẹn ekwakwa ezẹko re vwe fiẹrorhọ ina sabu phia, rọ nọ lẹrhiẹ bẹn wu na sẹrorẹ aghọghọ ọnọ. (Ecclesiastes 9:11) Osolobrugwẹ ọ ha userhumu rẹn ọwan izede ẹguọlọ, arha dẹrughwaroghwẹ erhirhiẹ egbogbanhon. Wu rha ha iruemru-irhi Baibol enana ruiruo, wẹwẹ ọrhẹ ekrun ọnọ ina sabu din erhirhiẹ na, ọrhọ tobọ rhianẹ ọ gbanhonron omamọ.

OBORẸ I BAIBOL NA Ọ TARE:“Are i ha ọfiamu are ephian dọn yen, fọkime ọ hẹrote are.” (1 Peter 5:7) Rha karorhọ taghene rhẹ Osolobrugwẹ ye wu ne kperi fọkiẹ edamuni enọ-ọ. (James 1:13) Ru we tiẹkẹriẹ, ọnọ ha userhumu wẹn uvuẹn izede rọ mai serhọ. (Isaiah 41:10) “Are i ta ọsoso ẹhẹn are riẹn.”—Psalms 62:8.

Wu na ji mẹrẹn urhebro, wu rhe se ji yono kpahen i Baibol na kẹdẹkẹdẹ. Erhe ruẹ ọnana, Jehova ọnọ ha “urhebro rẹn ọwan uvuẹn edamuni ọwan ephian.” (2 Corinthians 1:3, 4; Romans 15:4) O veri taghene ọnọ yọ “ufuoma ọrẹ Osolobrugwẹ rọ ghwẹ ọmẹrẹnvwrurhe ephian.”—Philippians 4:6, 7, 13.

OBORẸ WU NA SABU RU:

• Nẹrhomo vwe i Jehova nọ ha userhumu wẹn vwo iroro rọ gbare ọrhẹ ẹhẹn ro totọre

• Roro kpahen ekwakwa sansan wu na sabu ru, ne wu djẹ ọrọ mai serhọ wẹn

OBORẸ I BAIBOL NA Ọ TARE: “Ọmudu ohworho ro vwo ọmẹrẹnvwrurhe ọ guọlọ irherhe, erhọ ọvwẹghwanren na, ọ damoma guọlọ irherhe.” (Proverbs 18:15) Guọlọ iyẹnrẹn na ephian. Guọlọ oborẹ o rhiẹ edamẹ rẹn ekrun ọnọ. Lele aye tẹmro kugbe. Dabu kerhọ aye.—Proverbs 20:5.

Ohworho re vwo ẹguọlọ kpahen orho hwu vwo? Wu vwe jẹ ofẹn mwuo wu ne dje oborẹ oma o ruo phia-a. Karorhọ taghene Jesu “ọ viẹre.” (John 11:35; Ecclesiastes 3:4) Ọ ji ghanren omamọ ne wu dabu ronmoma ji merhẹn. (Ecclesiastes 4:6) Ọnana ọnọ lẹrhuọ sabu nyerẹn ghele erhirhiẹ ọgbogbanhon na.

OBORẸ WU NA SABU RU:

• Wu vwa hẹrhẹ nẹ emru obiobiomu ọ phia vwẹre, bọmọke wu ne ki lele ihworho ekrun ọnọ tẹmro-o. Nime ebẹnbẹn i rha homaphia, ọnọ phẹrẹ rẹ aye ina ta wẹn kpahiẹn

• Lele awọrọ ri ji dẹrughwaroghwu aruẹ erhirhiẹ wu havwọ na tẹmro

OBORẸ I BAIBOL NA Ọ TARE: “Obọdẹn ugbehian o dje ẹguọlọ phia ọke ephian, ọye jeghwai omizu re vwiẹre uvuẹn ọke ebẹnbẹn.” (Proverbs 17:17) Igbehian enọ i guọlọ ha userhumu wẹn, ọrẹn aye e rhe oborẹ aye ine ruie lele-e. Damoma ta rẹn aye kpahen oborẹ wu ghini guọlọ. (Proverbs 12:25) Habaye, nekpẹn userhumu mie imizu ri vwẹruọ oborẹ i Baibol na ọ tare. Ọkpọvi aye ine tiobọnu wẹn nẹ i Baibol na rhe, ọnọ ha userhumu wẹn.—James 5:14.

Wu na mẹrẹn obẹhatua wu guọlọre, wu rhe kwomakugbe ihworho ri ghini vwo esegburhomẹmro kpahen Osolobrugwẹ, ri ji hẹrosuẹ ive yi. Wu na ji mẹrẹn obọdẹn urhebro, wu rha hobọtua awọrọ ri guọlọ userhumu. Ta rẹn awọrọ kpahen esegburhomẹmro ọnọ kpahen i Jehova ọrhẹ ive yi. Rha damoma ha userhumu rẹn ihworho ri ha erhirhiẹ egbogbanhon, o ji fo ne wu rhe kwomakugbe ihworho ri vwo ẹguọlọ ọrhẹ ọdamẹ kpahuọn.—Proverbs 18:1; 1 Corinthians 15:58.

OBORẸ WU NA SABU RU:

• Tẹmro rẹn ugbehian ọnọ, ne wu rhiabọ dede userhumu rọ yẹruọ

• Hunute oborẹ wu guọlọre nẹ ẹhẹn rhe