Určiťe keren savoro prekal ada, kaj tumenge te el mište la romňaha, le romeha the le čhavenca. Ale šaj pes ňisostar ňič ačhel vareso nalačho, so tumenge anel dukh andro dživipen. (Kazateľ 9:11) O Del tumenge kamel te pomožinel, sar predživen pharipena. Te tumen ľikerena le biblicke zasadendar, so arakhena andre kadi časť, chudena zor te zľidžal the nekhoršeder tragedija.

SO PHENEL E BIBLIJA: Savore tumare pharipena čhiven pre leste, bo ov pes pal tumende starinel. (1. Peter 5:7 NZ) Furt tuke phen, hoj o Jehovas nane vinovato vašoda, hoj cerpines. (Jakub 1:13) Av pašes paš o Del, ov tuke džanel te pomožinel nekfeder. (Izaiáš 41:10) Čhoren avri o jile anglo Jehovas. (Žalm 62:8)

Te tuke geneha a študineha e Biblija sako ďives, šaj arakhes zor, so tuke pomožinela, kaj te na pukinel tiro jilo la žaľatar. Pro vlastna jakha dikheha, sar o Jehovas amen uťešinel andre savore amare skuški. (2. Korinťanom 1:3, 4; Rimanom 15:4) Ov sľubinel, hoj tut dela andro jilo Devleskero smirom, ajso, saveske o manuš našťi achaľol. (Filipanom 4:6, 7, 13)

SO ŠAJ KERES:

• Modľin tut ko Jehovas, kaj te upokojinel tiro jilo the tiri goďi

• Premišľin pal o možnosťi, so ela nekfeder te kerel a paľis ada ker

SO PHENEL E BIBLIJA: Goďaver jilo arakhel o čačipen a o kan le goďaverengero rodel o čačipen. (Príslovia 18:15 Evanjelický preklad) Zisťin tuke savoro, so kampel te kerel. Všimňin tuke, so dojekhe dženeske andal tiri fameľija kampel. Vaker lenca. Šun, so tuke phenen. (Príslovia 20:5)

So te kerel, sar vareko andal e fameľija merel? Ma ladža tut angle aver manuša, te pes tuke kamel furt te rovel. Ma bister, hoj the le Ježišoske pes ispidle o apsa andal o jakha. (Ján 11:35; Kazateľ 3:4) Furt, sar tuke kampel, dža te odpočivinel a but sov. (Kazateľ 4:6) Pomožinela tuke ada feder te ľikerel avri tiro trapišagos.

SO ŠAJ KERES:

• Sikľuv furt te del duma tira romňaha, le romeha the le čhavenca. Te pes tumenge ačhela bibacht (ňešťesca), ela prekal tumende lokeder, te vakerel pal oda, so predživen

• De duma varekaha, so predžiďiľa vareso podobno sar tu

SO PHENEL E BIBLIJA: Pravo kamaratos presikavel e laska furt a hino o phral, so pes naroďinďa, kaj te pomožinel, sar predžives pharipen. (Príslovia 17:17) Tire kamarata tuke kamen te pomožinel, ale možno na džanen sar. Ma dara te phenel, so tuke kampel. (Príslovia 12:25) Mang varekas, so prindžarel o čačipen andal e Biblija, kaj tuke te sikavel, sar te posilňinel tiri vjera. E goďi andal e Biblija tuke šaj pomožinel. (Jakub 5:14)

Pomožinela tuke, te praviďelňe aveha prave kresťanenca, so paťan andro Del a andre ada, so sľubinel. Ela tuke feder pro jilo, te thiš pomožineha olenge, savenge kampel te šunel lačho lav. Sikav lenge, hoj paťas le Jehovaske the oleske, so sľubinel. Ker savoro prekal ada, kaj te pomožines avrenge a ma odcirde tut olendar, so tut rado dikhen a džal lenge pal tute. (Príslovia 18:1; 1. Korinťanom 15:58)

SO ŠAJ KERES:

• Phen tire lačhe prjaťeľiske, sar tuke hin. Domukh leske te pomožinel tuke

• Phen, so tuke kampel a ma garuv andre ňič