XVAXAKVOKʼAL
Kʼalal oy kʼusi tsots chkʼot ta pasele
«Xkuxet tajek avoʼontonik, manchuk mi oy to van kʼuk sjalil chavil avokolik ta skoj li ep ta tos prevae.» (1 Pedro 1:6)
Manchuk mi avakʼojbe tajek yipal ti lekuk noʼox xamuyubaj li ta anupunele xchiʼuk li ta avutsʼ avalale oy onoʼox me kʼusitik chkʼot ta pasel ti chakʼ at-oʼontone (Eclesiastés 9:11, TNM). Pe mu xavat avoʼonton, yuʼun ta skoltautik Dios kʼalal ta jnuptantik vokolile. Mi chavakʼ ta akuxlejalik li beiltaseletik ta Vivliae ta me xkuch avuʼunik kʼusiuk vokolal xchiʼuk li avutsʼ avalale.
1 PATO AVOʼONTON TA STOJOLAL JEOVA
LI KʼUSI CHAL VIVLIAE: «Akʼbeik me sbain skotol li kʼusi chavul-o avoʼontonike, yuʼun oyoxuk ta yoʼonton» (1 Pedro 5:7). Teuk me ta ajol ti maʼuk ta smul Dios li jvokoltike (Santiago 1:13). Xakʼel avil ti tskoltaot mi lanopaj ta stojolale (Isaías 41:10). «Albeic ta jamal scotol cʼusi oy ta avoʼntonic.» (Salmo 62:8.)
Jtos ti kʼusi tspat avoʼonton xtoke jaʼ ti xakʼel xchiʼuk ti xachan Vivlia skotol kʼakʼale. Mi jech chapase, te me chavakʼ venta ti «tspat koʼontontik ta skotol prevaetik» li Jeovae (2 Korintios 1:3, 4; Romanos 15:4). Yuʼun yaloj chakʼ «li jun oʼontonal yuʼun Dios ti toj echʼ xa noʼox leke» (Filipenses 4:6, 7, 13).
LI KʼUSI SKʼAN XAPASE:
-
Kʼanbo Jeova ti junuk noʼox avoʼontone xchiʼuk ti lekuk xkʼot ta nopel avuʼune
-
Kʼelavil ti kʼusitik xuʼ xapas sventa xatʼuj junuke
2 CHABIO ME ABA XCHIʼUK CHABIO ME LI AVUTSʼ AVALALE
LI KʼUSI CHAL VIVLIAE: «Li bochʼo snaʼbe smelole oy ta yoʼnton chbijub; li bochʼo bije ta to saʼ bijubtasel» (Proverbios 18:15). ¿Kʼusi chtun yuʼun ta jujuntal li avutsʼ avalale? Kʼelavil skotol ti kʼusitik skʼan pasele, jaʼ yuʼun chiʼino ta loʼil li avutsʼ avalale xchiʼuk chikintao li kʼusi chalike (Proverbios 20:5).
¿Pe kʼusi skʼan jpastik kʼalal oy buchʼu chcham kuʼuntik ti jkʼanojtike? Mu me xakʼexav ta yakʼel ta ilel li kʼusi oy ta avoʼontone. Teuk me ta ajol ti «lik okʼuk li Jesuse» (Juan 11:35; Eclesiastés 3:4). Toj tsots me skʼoplal xtok ti lekuk xakuxe xchiʼuk ti lekuk xavaye (Eclesiastés 4:6). Vaʼun jaʼ me tskoltaot sventa xkuch avuʼun li avokole.
LI KʼUSI SKʼAN XAPASE:
-
Lekuk onoʼox me xachiʼin abaik ta loʼil xchiʼuk li avutsʼ avalal kʼalal mu to chanuptanik vokolile. Yuʼun jaʼ me tskoltaoxuk sventa lek xachiʼin abaik ta loʼil kʼalal oy kʼusi chopol chanuptanike
-
Chiʼino ta loʼil li buchʼutik jaʼ jech snuptanojik eke
3 SAʼO LI KOLTAEL TI CHTUN AVUʼUNE
LI KʼUSI CHAL VIVLIAE: «Li bochʼo lec jcʼopan jba jchiʼuctique lec onoʼox scʼanojutic; jaʼ jchiʼiltic ta voqʼuel chcʼot ti cʼalal oy jvocoltique» (Proverbios 17:17). Ta melel tskʼan tskoltaot li avamigotake, jaʼ noʼox ti kʼusie, mu snaʼik ti kʼusi skʼan spasike. Jaʼ yuʼun albo ti kʼuxi xuʼ skoltaikote (Proverbios 12:25). Jech noxtok, kʼanbo koltael li buchʼutik xojtikinik lek li Vivliae. Vaʼun chkuch avuʼun mi la achʼun li beiltaseletik ta Vivlia chalbeikote (Santiago 5:14).
Mi jaʼ nopem xavaʼi chachiʼin li buchʼutik oy xchʼunel yoʼontonik ta melel ta stojolal li Diose xchiʼuk ti spatoj yoʼontonik ta sventa li kʼusi yaloj tspase, jaʼ me te chata li koltaele. Jech noxtok, jaʼ me tskoltaot mi chapatbe yoʼonton li buchʼutik tsvul yoʼontonike. Albo ta sventa li xchʼunel avoʼonton ta stojolal li Jeovae xchiʼuk li kʼusi yaloj tspase. Oyuk noʼox me kʼusi chapas ta sventa li yantike, mu me xanamaj ta stojolal li buchʼutik skʼanojote xchiʼuk ti tsvul yoʼontonik ta atojolale (Proverbios 18:1, TNM; 1 Korintios 15:58).
LI KʼUSI SKʼAN XAPASE:
-
Chiʼino ta loʼil junuk li buchʼu toj lek xavile, vaʼun akʼo skoltaot
-
Alo ta jamal li kʼusi chtun avuʼune
