FAʼAHI 8
Moka Hoko He Aluʼaga Faigataʼa
“E kotou fiafia lahi i te mea aena, logo ai e tonu i te temi nei ke kotou mamahi i ni ahiahi kehekehe i he kii temi sii.”—1 Petelo 1:6
Tatau aipe pe ʼe kolua faiga malohi ke fiafia tokolua maʼuli fakataumatuʼa pea mo fakafamili, kaʼe ʼe feala ke hoko he aluʼaga faigataʼa. ʼE faigataʼa anai takolua taupau tokolua fiafia. (Ekelesiasi 9:11) ʼE feala ke tou maʼu ia he tokoni ʼofa mai te ʼAtua moka tou tau mo he ʼu faigataʼaia. Kapau ʼe kolua maʼuliʼi te ʼu pelesepeto Fakatohi-tapu ʼaeni, ʼe feala ke kolua tauʼi mo tokolua kiʼi famili ia te ʼu faigataʼaia lalahi.
1 KOLUA FALALA KIA SEHOVA
KOTEA TE MANATU ʼI TE TOHI-TAPU? “Ke koutou hili kia ia okotou mafasia fuli, koteuhi e tokaga ia kia koutou.” (1 Petelo 5:7) Kolua manatuʼi ʼe mole ko te ʼAtua ia te tupuʼaga ʼo ʼokolua mamahi. (Sakopo 1:13) ʼE fakalogo anai te lelei ʼo tana tokoni atu ki takolua faʼahiga fakaovi age kia te ia. (Esaia 41:10) “Kotou avahi tokotou loto kia te ia.”—Pesalemo 62:8, MN.
ʼE kolua maʼu anai he fakalotofimalie ʼi takolua lau pea mo ako ia te Tohi-Tapu ʼi te ʼaho fuli. ʼE kolua tokagaʼi anai ko Sehova “e ina fakafimaliei [koulua ʼi ʼokolua] mamahi fuli.” (2 Kolinito 1:3, 4; Loma 15:4) ʼE ina fakapapauʼi atu ʼe ina foaki atu anai “te tokalelei o te Atua, ae e fakalaka age i te u atamai fuli.”—Filipe 4:6, 7, 13.
KOTEA ʼAE ʼE FEALA KE KOLUA FAI?
-
Kolua kole kia Sehova ke tokoni atu ke kolua maʼu te tokalelei pea mo tasilo takolua fakakaukau
-
Kolua vakavakaʼi te ʼu fealagia ʼae ʼe kolua maʼu, pea mo kolua filifili ʼae ʼe lelei
2 KOLUA TOKAKAGA KIA KOULUA PEA MO TOKOLUA KIʼI FAMILI
KOTEA TE MANATU ʼI TE TOHI-TAPU? “Ko te loto ʼo te tagata poto ʼe ina maʼu te ʼatamai malama, pea ko te taliga ʼo te hahaʼi popoto ʼe ina kumi te ʼatamai malama.” (Taʼaga Lea 18:15, MN) Kolua faiga ke kolua mahino ki te ʼu meʼa ʼae ʼe logoʼi e tokolua kiʼi famili pea mo te ʼu meʼa ʼae ʼe ʼaoga kia natou. Kolua faipalalau mo natou. Kolua fakalogo kia natou.—Taaga Lea 20:5.
Kotea ʼae ʼe tonu ke kolua fai mo kapau neʼe mate he tahi neʼe kolua ʼoʼofa mamahi ai? ʼAua naʼa kolua matataku ʼi te fakaha ʼo ʼakolua manatu. Kolua manatuʼi maʼia mo Sesu “nee tagi.” (Soane 11:35; Ekelesiasi 3:4) ʼE lelei ke kolua malolō lelei. (Ekelesiasi 4:6) ʼE faigafua anai hakolua tauʼi te ʼahiʼahi ʼaia.
KOTEA ʼAE ʼE FEALA KE KOLUA FAI?
-
ʼAua naʼa kolua fakaʼatalitali ke hoki hoko he aluʼaga faigataʼa pea hoki kolua felogoʼi mo tokolua kiʼi famili. Kapau ʼe tou fai feia, ʼi te temi ʼae ʼe hoko mai ai he ʼu faigataʼaia, ʼe faigafua anai hakotou faipalalau fakatahi
-
Kolua faipalalau mo he kiʼi famili neʼe kua hoko ki ai te aluʼaga ʼaia
3 KOLUA KUMI TE TOKONI ʼAE ʼE ʼAOGA ATU
KOTEA TE MANATU ʼI TE TOHI-TAPU? “Ko he kaumeʼa moʼoni ʼe ʼofa ia ʼi te temi fuli pe, pea ʼe ko he tehina neʼe tupu ki te ʼu ʼaho mamahi.” (Taʼaga Lea 17:17, MN) ʼE fia tokoni atu ʼokolua kaumeʼa, kaʼe ʼe lagi mole natou iloʼi tona faʼahiga fai. ʼAua naʼa kolua fakameʼameʼa ʼi te fakamahino age ia te meʼa ʼae ʼe kolua loto moʼoni ki ai. (Taaga Lea 12:25) Kolua kumi ia te tokoni fakalaumalie kia natou ʼae ʼe malohi ʼi te faʼahi fakalaumalie. ʼE ʼaoga atu anai ʼanatou tokoni ʼae ʼe fakatafito ki te Tohi-Tapu.—Sakopo 5:14.
ʼE kolua maʼu anai te tokoni ʼae ʼe ʼaoga ʼaki takolua fakatahi tuʼumaʼu mo te ʼu tehina mo tuagaʼane ʼae ʼe malohi tanatou tui ki te ʼAtua pea mo natou falala ki ʼana fakapapau. ʼE kolua toe maʼu anai he fakalotofimalie mai takolua tokoni kia natou ʼae ʼe lotovaivai. Kolua palalau kia natou ʼo ʼuhiga mo takolua tui ʼae kia Sehova pea mo ʼana fakapapau. Kolua maʼumaʼua ʼi te gaue ʼaia. ʼAua naʼa kolua fakamamaʼo mai ia natou ʼae ʼe ʼoʼofa pea mo fia tokoni atu.—Taaga Lea 18:1; 1 Kolinito 15:58.
KOTEA ʼAE ʼE FEALA KE KOLUA FAI?
-
Kolua palalau ki hokolua kaumeʼa lelei pea mo tuku ke tokoni atu
-
Kolua palalau fakahagatonu ki te ʼu meʼa ʼae ʼe kolua loto ki ai