Di nla yoñ Bibel yosôna kiki lipôdôl li Djob. Tata wés nu ngii a nti bés yo inyu niiga bés. Di béñge manwin ima ma tôbôtôbô ma ma bi leglana hala a nloo 2 000 di nwii. Añgel i ba nsébél le Gabriel, “nu a ntelep bisu bi Nyambe,” nyen a bi legel manwin ma. (Lukas 1:19) Mambe mam ma bé tagbe ngéda añgel i bé legel mana manwin ma tôbôtôbô?

Di yé bebee ni nwii 3 B.N.Y. Hee Gabriel a nlegel nwin u bisu? I dikôa di Yudéa, bebee ni Yérusalem, het prisi i Yéhôva yada i jôl li yé le Sakaria i nyééne. Nye ni nwaa Élisabet, ba yé miñunuk, ndi, to man ba gwé bé. Sakaria nyen a nlama sal len kiki prisi i témpel i Yérusalem. Mu kiki Sakaria a yé i témpel, Gabriel a mpémél nye ipañ juu li binjinjiñ.

Hala a nôga le Sakaria a nkon woñi. Ndi añgel i mômôs Sakaria, i nkal nye le: “U kon bañ woñi a Sakaria, inyule Nyambe a ñemble nyemhe woñ, nwaa woñ Élisabet a’ gwélél we man munlôm, u nlama o nye jôl le Yôhanes.” Gabriel a nkônde le Yôhanes “a’ ba mut nkeñi i mis ma Yéhôva,” ni le Yôhanes a ga boñ le “litén li ba nkôôbaga inyu Yéhôva.”​—Lukas 1:13-17.

Sakaria a nhoñol bé le hala a nla bôña. Inyuki? Inyule nye ni nwaa wé ba yé miñunuk. Jon Gabriel a nkal nye le: “W’a kwo mbuk, w’a la ha bé pot letee ni i kel mam mana m’a yon, inyule u nhémle bé bibañga gwem.”​—Lukas 1:20.

I nlélém ngéda, bôt ba yé mbégdé ba mbadba inyuki Sakaria a nom hala i témpel. Sôk i nsôk, a mpam, ndi a nla ha bé pot. Sakaria a mpot ndik ni moo. Ibabé pééna, a ntehe jam li hélha.

Ngéda Sakaria a mélés nson wé i témpel, a ntémb i mbai yé. I mbus ndék ngéda, Élisabet a nembee! Kiki a bé bem ligwéé li man wé, Élisabet a bi yén i ndap, jam kiki bo sôñ itan, haa ni bôt.

Inyu ngélé i nyôhne iba, Gabriel a ntémb a pam. Yak njee? Yak hingonda hi hi ta bé mbiibaga le Maria, nu a niñ i ñombok i Galiléa, i tison i Nasaret. Kii añgel i nkal nye? I nkal nye le: “U nlémél Nyambe.” Gabriel a nke ni bisu i kal Maria le: “Nun-ki! W’a yoñ jém, u gwal man munlôm, u nlama o nye jôl le Yésu.” Gabriel a nkônde le: “A’ ba mut nkeñi, a’ séblana ki le Man nu Nungingii, . . . a’ ba Kiñe i ngii ndap i Yakôb i boga ni boga, Ane yé y’a bana bé lisuk.”​—Lukas 1:30-33.

Ibabé pééna Gabriel a nok maséé i legel manwin mana mo ima. Mu kiki di mba di ñañ miñañ mi mbéñge Yôhanes ni Yésu, di ga ba nkwoog nkaa le mana manwin ma ma nlôl i ngii ma yé nseñ.