Maibagatayo a ti intero a Biblia ket mensahe manipud iti Dios. Impaay dayta ti nailangitan nga Amatayo a mangiwanwan kadatayo. Usigentayo ti dua a naisangsangayan a mensahe a naibaga nasurok a 2,000 a tawen ti napalabasen. Imbaga dayta ti anghel nga agnagan Gabriel, nga “agtaktakder iti asideg ti Dios.” (Lucas 1:19) Ania dagiti kasasaad idi imbaga ti anghel dagita a nagpateg a mensahe?

Dandani idin tawen 3 B.C.E. Sadino ti nangibagaan ni Gabriel iti umuna a mensahe? Iti katurturodan ti Judea, a mabalin a saan nga adayo iti Jerusalem. Agnanaed iti dayta a lugar ti padi nga agserserbi ken Jehova. Zacarias ti naganna. Lakayen ni Zacarias ken baket metten ni Elisabet nga asawana, ngem awan ti anakda. Batang idi ni Zacarias ti agserbi a padi iti templo ti Dios idiay Jerusalem. Idi adda iti templo, bigla a nagparang ni Gabriel iti asideg ti altar ti insienso.

Siempre, nakigtot ni Zacarias. Ngem pinagkalma ti anghel. Kinunana: “Dika agbuteng, Zacarias, agsipud ta nangngeg ti Dios ti ararawmo isu a ni Elisabet nga asawam ket aganakto iti lalaki a panaganamto iti Juan.” Imbaga pay ni Gabriel a ni Juan ket “agbalinto a naindaklan iti imatang ni Jehova” ken ‘isaganana dagiti tattao maipaay ken Jehova.’—Lucas 1:13-17.

Kasla saan a nakappapati dayta ken Zacarias. Apay? Gapu ta lakayen ken baket metten ni Elisabet, isu a kinuna ni Gabriel: “Agumelkanto ken saankanto a makasao agingga a mapasamak dagitoy a bambanag, gapu ta saanmo a pinati ti imbagak.”—Lucas 1:20.

Masmasdaaw idi dagiti tattao nga agur-uray iti ruar no apay a nakabaybayag ni Zacarias. Idi rimmuar, saanen a makasao. Agsensenias lattan. Adda la ketdi nakitana a nakaskasdaaw idi adda iti templo.

Idi nalpasen a nagserbi iti templo, nagawiden. Di nagbayag, nagsikog ni Elisabet! Iti lima a bulan, bayat nga ur-urayenna ti panaganakna, nagyan ni Elisabet iti balayda a saan a nakilanglangen kadagiti tattao.

Nagparang manen ni Gabriel iti maikadua a gundaway. Asino ti nagparanganna? Iti balasang nga agnagan iti Maria, nga agnanaed iti amianan, iti Galilea, iti siudad ti Nazaret. Ania ti imbaga ti anghel kenkuana? Kinunana: “Pinaraburannaka ti Dios.” Kinuna pay ni Gabriel ken Maria: “Agsikogkanto, ken mangipasngayka iti maysa a lalaki, ket panaganamto iti Jesus.” Innayon pay ni Gabriel: “Agbalinto a natan-ok, ken maawaganto iti Anak ti Kangatuan, . . . ket agnanayonto nga agturay kas Ari iti pamilia ni Jacob, ket saanto nga agpatingga ti Pagarianna.”—Lucas 1:30-33.

Apresiarem la ketdi ti pribilehio ni Gabriel a nangibaga kadagitoy dua a mensahe. Bayat nga ad-adu pay ti mabasatayo maipapan kada Juan ken Jesus, maammuantayto no apay a nakapatpateg dagitoy a mensahe manipud langit.