Nsañu yejima yekala muBayibolu twatela kuyimona netu, yafuma kudi Nzambi. Tata yetu wamwiwulu watwinkayu kulonda yitukwasheña. Hela chochu, toñojokenu hansañu yalema yashimwiniwu yaaka kubadika ha 2,000. Ayishimwini kudi kañelu Gabireli “wemanaña kumesu aNzambi.” (Luka 1:19) Yuma yadiña ñahi hampinji yashimwiniyi kañelu iyi nsañu yalema?

Kunashali kwakwihi nachaaka chimu henohu Yesu kanda avwaliki. Iyi nsañu Gabireli nayishimwini kudihi? Kutupidi twamuYuda, hadaha kwakwihi naYerusalema, kwashakamaña kapristu kaYehova wejina daZekariya. Yena niñodindi, Elizabeta, akula dehi, nawa hiyadihu namwanaku. Himpinji yaZekariya yakuya nakukalakala neyi kapristu hatembeli yaNzambi muYerusalema. Hadiyi Zekariya hatembeli, Gabireli nashikeni dakumwekana kudi yena kwakwihi nakameña kainsensi.

Chumichi chinamutiyishi Zekariya woma. Ilaña kañelu namuwundishi Zekariya nakumuleja nindi: “Zekariya, bayi wutiya womaku, muloña kulomba kweyi anakutiyi, dichi ñodeyi Elizabeta wakakuvwela mwana weyala, wakamutuumba neyi Yowanu.” Gabireli nabombelihu cheñi chakekala Yowanu nindi “wakekala muneni kumesu aYehova” nawa wakayilisha “akekali antu amutelela Yehova.”—Luka 1:13-17.

Kudi Zekariya, chumichi chinakumwekana neyi chikutwesheka wanyi. Muloñadi? Muloña yena niElizabeta akula dehi. Dichi Gabireli namuleji nindi: “Wukwikala kamama kushika niifuku dakamwekana yumiyi, muloña hiwunakuhweleli mazu amiku.”—Luka 1:20.

Haniyi mpinji, antu adiña hanji anahayami chuma chinaleteshi Zekariya ashimbuli nankashi mukachi. Nkumininaku nediki, ilaña hanakutwesha kuhoshaku. Zekariya nakuhosha hohu namakasa. Namoni chuma chakuhayamisha hadiñayi mutembeli.

Zekariya chinamanishiyi kuzata mudimu windi hatembeli, nafunti kwitala dindi. Hanashimbuli wanyi, Elizabeta nemiti! Hadi tukweji tutanu, hampinji yinakuhembelelayi kuvwalika kwamwanindi, Elizabeta washakamaña hohu hetala chakadi kudimona nawantu.

Kuhiñahu Gabireli namwekani ipampa damuchiyedi. Kudinyi? Kudi kansi wamumbanda wabula kusumbuka wejina daMariya, washakamaña kukabeta kakuchimunswa mwiluña daÑaliliya, mumusumba waNazareta. Kañelu namuleji nindidi? Namuleji nindi: “Nzambi nakutiyi kuwaha.” Gabireli natwalekihu kumuleja Mariya nindi: “Tiyaña! wakemita nawa wakavwala mwana weyala, wakamutuumba neyi Yesu.” Nabombelihu cheñi nindi: “Owu mwana wakekala muneni, akamutena nawu Mwana kaMukakubadika Chikupu, . . . nawa wakayuula neyi Mwanta haya nyaaka mwitala daYakoba nawa Wanta windi hiwamba kakumaku.”—Luka 1:30-33.

Watela natiyi kuwaha haniku kukooleka kwamwinkeliwu kwakwinza nakushimuna iyi nsañu. Chitukutañaña nsañu yikwawu yahosha hadi Yowanu niYesu, tukwiluka chikupu muloña waweni iyi nsañu yafumini mwiwulu chiyalemena.