Bibliaqa Jehova Diospa saqiwasqanchik sumaq willakuymi. Bibliawanmi kuyakuq taytanchikqa imakunamantapas yachachiwanchik. Kunanmi yachasun yaqa iskay waranqa wata ñawpaqtaraq iskay willakuy kasqanmanta. Chaytaqa “Diospa qayllanpi servikuq” Gabriel sutiyuq angelmi willakurqa (Lucas 1:19). ¿Haykapitaq hinaspa maypitaq angel Gabrielqa willakurqa? ¿Pikunamantaq chaytaqa willarqa?

Angel Gabrielqa wata masnin manaraq Jesus nacechkaptinmi, punta kaq willakuyta sacerdote Zacariasman willarqa. Zacariasqa Judea law urqupim warmin Elisabetwan yacharqa. Paykunaqa yuyaqñam karqaku, hinaspapas mana churi-wawayuqmi karqaku. Huk kutipim Zacariasqa Jerusalenpi Diospa wasinman rirqa, chaypim sacerdote kaspan chuya cuartopi llamkachkaptin angel Gabriel rikuriykurqa.

Hinaptinmi Zacariasqa mancharikurqa. Angel Gabrielñataqmi kuyakuywan nirqa: “Ama manchakuychu Zacarias, mañakusqaykitam Dios uyarirun, warmiki Elisabetmi churikita wachakunqa hinaptinmi Juan nispa sutichanki chay wawata”, nispa. Chaymantapas nirqaraqmi chay wawaqa ‘Jehova Diospa qayllanpi riqsisqa kananmanta’ hinaspa ‘runakunata Jehova Diospaq alistananmanta’ (Lucas 1:13-17).

Zacariasmi ichaqa churiyuq kananmanta iskayrayarqa paypas chaynataq Elisabetpas yuyaqña kasqankurayku. Hinaptinmi angelqa nirqa: “Nisqaykunata mana creesqaykiraykum rimayta mana atinkichu tukuy kaykuna cumplikunan punchawkama”, nispa (Lucas 1:20).

Chaykamaqa, hawapi kaq runakunam rimapakuchkarqaku Zacariaspa manaña lluqsimusqanmanta. Zacariasñataqmi lluqsiramuspanqa manaña rimayta atirqañachu, hinaspam makillanwanña rimarqa. Chaymi runakunaqa musyarurqaku manchakuypaq kaqta rikurusqanmanta.

Zacariasqa Diospa wasinpi llamkayninta tukuruspanmi wasinman kutikurqa. Chaymanta qipakunallamanmi Elisabetqa wiksayakururqa. Chaymi unqukunan punchawkama runakunamanta karupi pichqa killa wasillanpi karqa.

Chaymantam angel Gabrielqa iskay kaq willakuyta Maria sutiyuq soltera sipasman willarqa. Mariaqa Galilea law Nazaret sutiyuq llaqtapim yacharqa. Paymanmi angel Gabriel rikuriykuspan nirqa: “Ama manchakuychu Maria, Diospa kuyapayakuynintam tarirunki. Wiksayakuspam wachakunki qari wawata hinaspam sutichanki Jesuswan. Paymi ancha riqsisqa kanqa hinaspam hanaq pacha Diospa churinwan sutichasqa kanqa [...], hinaspam Jacobpa mirayninkunata wiñaypaq kamachinqa, kamachisqanqa mana tukuqmi kanqa”, nispa (Lucas 1:30-33).

¡Mayna sumaqya karqa angel Gabrielpaqqa kaykunamanta willakuyqa! Qatiqninpim yachasun kay willakuykuna imanasqa ancha allin kasqanmanta.