Twi kwata Bible mu bushima bwaye bu mukandu aufiki kwi Efile Mukulu. Nshetu a mwiyilu badi mumufundjishe bwa kwitulongyesha. Tubande kutalula mikandu ibidi i na muulo ukata ibabadi bakule takudi bipwa bikile pa 2 000. Ibadi yakudibwe kwi mwikeyilu e n’eshina bu Gabryele, aye ‘ayimanaa kumpala kw’Efile Mukulu.’ (Luka 1:19) Myanda ibadi naminyi pabadi yawa mwikeyilu mwakule ino mikandu ibidi i na muulo?

Bu mu kipwa kya 3 K.B.B. Gabryele bakwile mukandu wa kumpala mbalo kinyi? Ku myengye ya Yudeya, pangi ibadi pabwipi na Yelusaleme, kubadi kushale tshiite mwakwidi a Yehowa abetanyina bu Zakarii. Aye na mukash’aye Elizabete, abadi bapwe kununupa na tababadi batande bana nya. Ubadi musango wa Zakarii wa kufuba bu tshiite mwakwidi mu ntempelo a Efile Mukulu mu Yelusaleme. Pabadi Zakarii kii mu ntempelo, mwikeyilu Gabryele bamumwenekyele musango umune peepi na mbalo ya kushiikila kabanda.

Kushi mpaka, bibadi bikwatshishe Zakarii moo. Anka mwikeyilu badi munyingishe Zakarii pa kumulungula shi: “Leka kutshina, Zakarii, mwanda nteko yobe babeyitambula, mukashi obe Elizabete akutandjila mwa-mulume omup’eshina dya bu Yowano.” Gabryele badi mukumbashe dingi shi ‘akeekala mukata kumpala kwa Yehowa’ n’ashi akyebe “kulumbulwila Yehowa mwilo waye.”—Luka 1:13-17.

Byabya bibamwekyele bu bya madimi kwi Zakarii. Bwakinyi? Mwanda wa bununu bwaye na Elizabete. Nyi bwakinyi Gabryele bamulungwile shi: “Byabya oshala kamaama, toomono dimo bya kwakula, nyaa na kwifuku adikakumbana byabya, mwanda twe mukumiine bishima byande.”—Luka 1:20.

Mu kyakya kyoso kipindji, bantu abadi paasha abadi abeyipusha bwakinyi Zakarii bayisha munda. Nfudiilo a byoso batukile paasha kushii ngobesha ya kwakula. Zakarii badi aleesha penda na maasa. Abadi bashinkamishe shi bamwene kilengyeleshi mu ntempelo.

Kunyima kwa’ye kupwa mudimo waye mu ntempelo, Zakarii badi mwalukiile kwaye. Mafuku apeela kunyima, Elizabete bayimite! Bashaleele ku nshibo kwaye pa bupenka munda mwa myeshi itaano pabadi atengyela kutandjikwa kwa mwan’aye.

Gabryele badi mumwenekye bwa musango wa kabidi. Kwi nnanyi? Kwi nsongwakashi shi mwibakilwe abetamina bu Maadiya badi mushalele kunundu kwa Yelusaleme mu Ngalileya mu kibundji kya Nazarete. Mwikeyilu badi mumulungule kinyi? Bambile shi: “Bopete buntu kw’Efile Mukulu.” Gabryele nkumulungula shi: “Tala, okayimit’eyimi, okatanda mwana-mulume, omuudikye eshina dya bu Yesu.” Mwikeyilu Gabryele badi mukumbashe dingi shi: “Akeekala mukata bakamwitamine bu Mwana a Sha-Kwiyilu, . . . akabikala looso mu kifuko kya Yakobo, na Bufumu bwaye tabwikala na mpwilo.”—Luka 1:30-33.

We kunangushena muloo ubadi nao Gagryele bwa kutuusha ino mikandu ibidi. P’atulongo bibungi pabitale Yowano na Yesu, atukapusha kalolo bwakinyi ino mikandu ayikatukila mwiyilu i na muulo ukata.