E mafai o ‵kilo atu tatou ki te Tusi Tapu kātoa e pelā me se fekau mai te Atua. Ne tuku mai ne te ‵tou Tamana faka-te-lagi ke akoako ei tatou. Mafaufau la ki se avā fekau fakapito kolā ne tuku mai i te 2,000 tausaga ko ‵teka. Ne tuku mai ne te agelu ko Kapilielu telā “e tu pili i mua o te Atua.” (Luka 1:19) Ne a mea ne ‵tupu i te taimi ne tuku mai ei ne te agelu a fekau tāua konā?

A te tausaga tenā kāti ko te 3 T.L.M. Tefea te koga ne tuku atu ne Kapilielu a te fekau muamua? I koga maugā o Iuta, kāti e se ‵mao foki mai Ielusalema, tenā te koga ne nofo ei te faitaulaga a Ieova ko Sakalia. Ko matua a ia, penā foki tena avaga, ko Elisapeta, kae e seai ne lā tama‵liki. Ne oko ki te taimi ke tavini atu ei a Sakalia e pelā me se faitaulaga i te faletapu o te Atua i Ielusalema. A koi nofo atu a Sakalia i te faletapu, ne sae fakapoi atu a Kapilielu i se koga telā e pili atu ki te fatafaitaulaga telā e ‵sunu ei a mea fakama‵nogi.

Ne ‵tau eiloa o mataku a Sakalia i te mea tenā. Kae ne fakafeoloolo aka ne te agelu a te manavase o Sakalia, ana muna: “Sa mataku e Sakalia, me ko oti ne lagona kae talia foki ne te Atua tau ‵talo, kae ko tau avaga ko Elisapeta, ka fanau mai ne ia se tamaliki tagata ma koe, kae ka fakaigoa ne koe te tamaliki ki a Ioane.” Ne toe fai atu a Kapilielu me ka fai a Ioane mo “tino sili i te kilokiloga a Ieova” kae ka “fai ei [ne ia] a tino ke toka mō Ieova.”—Luka 1:13-17.

Ne tai faigata eiloa ke talitonu a Sakalia ki ei. Kaia? Ona ko te mea ko tō ma‵tua lāua mo Elisapeta. Ne fai atu ei a Kapilielu ki tou tagata: “A koe ka gūgū kae se mafai o faipati ke oko eiloa ki te aso e taunu ei a mea konei, ona ko koe e seki talitonu ki aku pati, kolā ka fakataunu eiloa i te taimi tonu.”—Luka 1:20.

I te taimi tenā, a tino kolā ne ‵tu i tua ne kamata o fesili ifo me kaia e nofo leva ei a Sakalia i loto i te faletapu. Fakamuli ifo loa, ne sae mai ei a ia ki tua, kae ko se mafai ne ia o faipati. Ne mafai fua ne Sakalia o fai a tāga ki ana lima. Ne fakamaoni atu ei me ne lavea ne ia se mea fakaofoofogia.

I te taimi ne oti ei a galuega a Sakalia i te faletapu, ne toe foki atu a ia ki tena fale. Mai tua malie ifo i ei kae faitama a Elisapeta! I te taimi koi faka‵tali ei a ia ke fanau mai tena tama, ne nofo a Elisapeta i tena fale kae ne seki fakasaesae atu ki tino i masina e lima.

Fakamuli ifo ne toe fakasae mai a Kapilielu i te lua o taimi. Kae ne fakasae atu a ia ki a ai? Ki se tamāfine taka e igoa ki a Malia, telā ne nofo atu i te feitu ki matū o Ielusalema i Kalilaia, mai te fa‵kai ko Nasaleta. Se a te fekau telā ne fai atu ne te agelu ki a ia? Ana muna: “Ko oti koe ne talia ne te Atua.” Ne fai atu a Kapilielu ki a Malia: “Kiloke! a koe ka faitama kae ka fanau ne koe se tamaliki tagata, kae ke fakaigoa ne koe ki a Iesu.” Ne toe fai atu a Kapilielu: “A ia tenei ka fai mo fai se tino sili kae ka taku a ia ko te Tama a te Atua Tafasili i te Maluga . . . kae ka pule a ia e pelā me se Tupu i te kāiga o Iakopo ki te se-gata-mai, kae ka seai se gataga o tena Malo.”—Luka 1:30-33.

E mafai o tali‵tonu tatou me ne manatu aka a Kapilielu me ko oko eiloa i tena taulia ke fakaoko atu ne ia a fekau e lua konā. Kae kafai e fai‵tau tatou ki nisi mea e uiga ki a Ioane mo Iesu, ka maina i ei tatou me kaia e tāua ‵ki ei a fekau konā mai te lagi.