I ng’ei ma malaika Gabriel uyero ni nyaku ma nyinge Maria nia ebinyolo nyathin ma nico ma jubilwong’o nyinge Yesu, man ebibedo Jabim ma bibimo rondo ku rondo, Maria upenje kumae: “Maeni bitimbre nenedi, ma [ke] ang’eyo co ngo e?”​—Luka 1:34.

Malaika Gabriel udwoko ire lembe kumae: “Tipo Maleng’ bibino i wii, man tego pa Ng’atu ma Malu Ngbir tipone biumi: kum kumeno gin maleng’ m’ibinyolo jubilwong’o Wod Mungu.”​—Luka 1:35.

Ecicopere nia kara Maria uyii lembe maeno, Malaika Gabriel uyero ire kendo kumae: “Nen, wat peri, Elisabeti bende gamu ie mi wode kan eti; maeni de dwi mir abusiende pa ng’atu ma julwong’o mugumba. Kum lembe moko mbe ma ai ba Mungu ma bibedo umbe tego.”​—Luka 1:36, 37.

Maria uyio lembe ma Gabriel uyero ire, edwoko ire kumae: “Nen, an a bong’ pa [Yehova]; dong’ ebed ira calu lembe peri.”​—Luka 1:38.

Kinde ma malaika udok, Maria ucaku niyikere kara ecidh eliew Elisabeti ku Zekaria ma won ot pare, i ng’om gudi i adhura mi Yahudi, ceng’ini ku Yerusalem. Niai i pacu pagi Maria nitundo i Nazareti, utie wotho ma romo ting’o nindo adek kunoke ang’wen.

E Maria utundo i pacu pa Zekaria. Kinde m’ebemondo i ot, emotho Elisabeti ma wat pare. I saa maeno, tipo maleng’ uromo Elisabeti, man eyero ni Maria kumae: “Mugisa kwenyi kind mon, man mugisa ni nyodo m’i ii de. Man lembe m’unwang’a maeni ai kani nia min Rwoth para bino i bang’a? Kum nen, ka dwand moth peri mondo i itha, mukere por malu i ia [ku] mutoro.”​—Luka 1:42-44.

Maria udwoko ire lembe m’ebefoye ko kud adundene ceke kumae: “Ng’eyong’ec para ubeyungo [Yehova], man anyong’a nego cwinya kum Mungu Jalarna. Kum eneno wi nok pa bong’ pare; kum nen, ugambre kawono dhanum’utuk ceke bilwong’a jamugisa. Kum ng’atu ma tek utimo ira gin madit.” Kadok nwang’u Maria unwang’u yung iwang’ Mungu de, re edwoko yungne ni Mungu. Eyero kumae: “Nyinge de leng’. Kisa pare de bedo ni dhanum’utuk ku dhanum’utuk wi ju m’ulwore.”​—Luka 1:46-50.

Maria umedere nipaku Mungu ku wec mi lembila, eyero kumae: ‘Enyutho tego ku bote; Elalu jukuhaya ku lembe ma igi pido ku i adundegi. Ejwigo juker kud i kom ker migi, Eting’o dhanu ma kitgi mbe malu. Eyeng’o ju ma kec unegogi ku gin maber; Man eketho julonyo gidok mananu. Ekonyo jatic pare Israel, kara epoi kum kisa pare (Calu yang’ eyero ni kwaruwa) ni Abraham ku nyikwaye rondo ku rondo.’​—Luka 1:51-55.

Pi dwi ma romo adek, Maria ubedo karacelo kud Elisabeti, ecicopere nia ebino nikonyo Elisabeti i yenga ma tokcen mi gonyiri pare. Etie lembe mir anyong’a mandha ni jumamon ario maeno ma gigwoko bedoleng’ migi, nibedo karacelo i saa maeno, man ku kony pa Mungu, gin ceke gitie kud awiya i igi!

Nyo ibepoi ikum yung ma Yesu unwang’u iwang’ nyoliri pare? Elisabeti ulwong’e nia “Rwoth para,” man nyathin ma ni ii Elisabeti bende ‘upor malu ku mutoro’ kinde ma Maria ucidh uliewe wang’ ma kwong’a. Calu ma wabineno, dhanu mange, gidok giyungo ngo Maria ku nyathin m’ebinyolo bende.