Anzi Gabliɛli seli Mari m’ɔ ti talua’n kɛ ɔ́ wá wú ba yasua kun naan ɔ tɔn i dunman Zezi. Ɔ seli i ekun kɛ ba sɔ’n i Famiɛn dilɛ’n su wieman le. I sin’n, Mari usɛli i kɛ: “?Ɔ́ yó sɛ naan w’a yo ye? Afin e nin yasua fi e nin-a siman sua le.”​—Liki 1:34.

Gabliɛli tɛli i su kɛ: “Ɲanmiɛn wawɛ’n wá jrá ɔ su. Yɛ Ɲanmiɛn m’ɔ o like kwlaa ti su’n, i tinmin’n ɔ́ wá káta ɔ su. I sɔ’n ti’n, ba mɔ á wá wú i’n, ɔ́ yó Ɲanmiɛn liɛ klonglo. Bé flɛ́ i Ɲanmiɛn Wa.”​—Liki 1:35.

Atrɛkpa’n, Gabliɛli kunndɛli kɛ Mari sɔ i ndɛ’n nun klanman. I sɔ’n ti’n, ɔ seli i ekun kɛ: “Elizabɛti m’ɔ ti ɔ osufuɛ’n, kannzɛ w’a yo kpɛnngbɛn naan sran’m be waan i klun ti kpan’n, i kusu w’a wunnzɛ. I anglo nsiɛn yɛ. Afin ndɛ kwlaa ng’ɔ fin Ɲanmiɛn nuan fite’n, ɔ kpɛn su.”​—Liki 1:36, 37.

Mari sɔli ndɛ nga Gabliɛli kannin’n nun klanman. Ndɛ ng’ɔ kannin fa tɛli i su’n kle sɔ weiin. Ɔ seli Gabriɛli kɛ: “N ti Zoova i kanga. Maan ɔ yo kɛ nga a fa kannin’n sa.”​—Liki 1:38.

Kɛ Gabliɛli ɔli’n, Mari siesieli i wun naan ɔ́ kó nían Elizabɛti osu. Elizabɛti nin i wun Zakari be tran Zide mɛn’n i okaoka lika’n nun lɔ. Lika sɔ’n mantan Zerizalɛmun klɔ’n. Kɛ a fɛ i Mari i awlo Nazarɛti lɛ lele mɔ á fá jú lika sɔ’n nun lɔ’n, a kwla di cɛn nsan annzɛ nnan.

Yɛ Mari fali atin ɔli Zakari i awlo lɔ-ɔ. Kɛ ɔ juli lɔ m’ɔ yoli Elizabɛti like cɛ’n, Ɲanmiɛn wawɛ’n jrali Elizabɛti su. Yɛ ɔ seli Mari kɛ: “Maan Ɲanmiɛn yra ɔ su bla’m be nun. Kpɛkun ba ng’ɔ o ɔ ku sɛ’n nun, maan ɔ yrɛ i su wie! ?Wan yɛle min mɔ min Min’n i nin’n ba min wun wa-ɔ? Afin kɛ a yoli min like m’ɔ guali min su nun cɛ’n, ba ng’ɔ o min ku sɛ nun’n, i klun jɔli. Ɔ maan, ɔ kplikplili.”​—Liki 1:42-44.

Ndɛ nga Mari kannin fa tɛli i su’n kle kɛ ɔ si ye. Ɔ seli kɛ: “Ń mánmán Zoova. Ɲanmiɛn m’ɔ ti min Defuɛ’n ti’n, min klun ti jɔwa dan. Afin ɔ kpɛli i ɲin niannin i sufuɛ bla m’ɔ timan like fi’n. Ɔ maan, kɛ ɔ fɛ i andɛ’n, sran’m be kwlaa bé wá sé kɛ min liɛ su ti ye. Afin Ɲanmiɛn m’ɔ le tinmin’n, ɔ yoli abonuan sa kpanngban mannin min.” Kannzɛ bɔbɔ Ɲanmiɛn buli Mari i sran’n, sanngɛ i liɛ’n i waan manmanlɛ’n ti Ɲanmiɛn i liɛ. I ti’n, ɔ seli kɛ: “I dunman’n leman wunsu. Be kwlaa nga be sro i mɔ be ɲin yi i’n, ɔ́ sí be aunnvuɛ tititi.”​—Liki 1: 46-50.

Mari kannin ndɛ wie ekun manmannin Ɲanmiɛn. Ɔ seli kɛ: “Ɔ fɛli i sa’n yoli sa kekleekle mun. Be nga be tu be wun’n, ɔ sanngannin be nun. Be nga be le kwlalɛ kpa mɔ be o famiɛn bia’m be su’n, ɔ kannin be ase. Kpɛkun ɔ mannin be nga be leman ɲrun’n be su. Be nga be leman wie’n, ɔ mannin be ninnge kpakpa kpanngban. Ɔ maan be klun jɔli. Sanngɛ ɔ kannin aɲanbeunfuɛ’m be bo. Be fali be sa ngbɛn be ɔli. Ɔ ukɛli i sufuɛ Izraɛli. Ɔ yoli sɔ fa kleli kɛ i wla w’a fiman be su. Afin ɔ seli kɛ ɔ́ sí be aunnvuɛ. Ɔ kannin ndɛ sɔ’n kleli e nannan mun. I waan ɔ́ sí Abraamun nin i osu’n nunfuɛ’m be aunnvuɛ titi.”​—Liki 1:51-55.

Mari kali Elizabɛti i wun lɛ anglo nsan. Kɛ mɔ Elizabɛti i ba wulɛ blɛ’n wa mantannin koko’n ti’n, atrɛkpa Mari ukɛli i awlo lɔ junman dilɛ’n nun. Ɔ maan blɛ sɔ’n nun’n, bla nɲɔn sɔ mɔ be lafi Ɲanmiɛn su kpa’n be trannin likawlɛ. Nanwlɛ, i sɔ’n ti kpa dan!

?Wafa nga be manmannin Zezi ka naan b’a wu i’n, a fali ɔ ɲin sieli su? Elizabɛti flɛli i kɛ “min Min.” Yɛ kɛ Mari yoli Elizabɛti like’n, ba m’ɔ o i ku sɛ’n nun’n, i “klun jɔli. Ɔ maan, ɔ kplikplili.” Sanngɛ sran ngba su kloman Mari nin ba ng’ɔ́ wá wú i’n be sa. É wá kɛ́n i sɔ liɛ’n i ndɛ e ɲrun lɔ.