Éyoñ ange Gabriel a maneya kate Marie na a ye biaé mon a yôlé nye na Yésus, a na, mon ate a ye bo Njôô ya nnôm éto, Marie a sili nye na: “Jame te ebien da ye boban aya, amu me ngenane te yeme fam?”​—Luc 1:34, Mfefé Nkôñelan.

Gabriel a yalane nye na: “Mfufube nsisim a ye zu be wo, a ngule Nyô a ne ôyabe yôp ja ye buti wo éjijine jé si, ajô te nyô a ye bialé a ye bo étyi, a ye lobane na Mone Zambe.”​—Luc 1:35, Mfefé Nkôñelan.

Asu na a volô Marie na a kañese foé éte, Gabriel a ke ôsu a jô nye na: “Tame yen, Élisabeth, minga mia nye mi vuman, a nyoñeya abum, éyoñe te a nto nnôm, a ye biaé mona fam; abum ete e nto ngon étan, samane a tele yôpe nyô, be nga jô na a ne nkôkôm. Amu teke ajô de aso be Zambe de aye bo te ngu.”​—Luc 1:36, 37.

Marie a kañese mejô Gabriel a te nye jô, nalé a yené a jam a jô. Tame yen éyalan a ve nye: “Tame yene ma, me ne minga a ne mbo ésaé Tate; ajô te bo’o ma ane wo ate jô.”​—Luc 1:38.

Éyoñe Gabriel a keya, Marie a kômesane na a ke jom Élisabeth, ba nnôme wé Zacharie be too fefele Jérusalem, minkôle ya Judée. Asu na Marie a kôlô Nazareth na a ke be Élisabeth, dulu éte é ne nyoñe nye melu mela, nge menyin.

Marie a su’ulaneya kui nda Zacharie. Éyoñ a nyiine nda, nde a batan évuvumane jé Élisabeth. Awolo ete ébien, mbamba nsisim ve jaé Élisabeth nyule ne lut; nde a jô Marie na: “Ébotan a wo vôm binga be to, ébotan a mon wo aye biaé. Ajô di de ate bo me aya, nyia Tate wom a zu be ma? Amu tame yen, éyoñ me ate wô’ô mejô ya mebatane môé, ane mon a te fô’ôsane me abum, amu a te vak.”​—Luc 1:42-44.

Ane Marie a yalan, nlem ô too nye njalan a meva’a na: “Nleme wom wo akañe Tate, ane nsisime wom ô nga vak amu Zambe Nyi wom. Amu a nga lôbô mbia éto ya mbo ésaé wé a ne minga: Amu ataté éyoñe ji miaé mi bôte mise mi aye jô me na me ne ébôtan. Amu nyô a dañ ngu a nga bo me beta be mam.” Bia yene valé na, ja’a Marie a bili fo’o beta ma’a, a ve Zambe duma ése. A jô na: “Jôé dé e ne étyi. A mvame jé é ne miaé mi bôt abui mi ako nye woñ.”​—Luc 1:46-50.

Marie a ke ôsu a ve Zambe duma a jô’ô na: “A nga liti bôt ngu a wo wé; A nga tyame bôt be abo mebun a mam be asimesane minlem miap. A nga va bejô bôt bito biap, A nga bete bôt be nji bi benya bito, yôp. A nga jalé bôt be nga wô’ô zaé bidi bi ne mvaé; A nga jô bôt be mbe akum abui na, Kelane momo. A nga volô mbo ésaé wé Israël, amu a nga kômbô simesan mvam mfa’a ya Abraham a mvoñe bôte jé melu mese.”​—Luc 1:51-55.

Marie a bo bebé ngon éla be Élisabeth, a volô nye tañe besondô be li’iya ôsusua na Élisabeth a biaé. Avale mbamba jam ete na, Zambe a volô binga bete bebaé, binga ba wulu ba’aba’a a nye na, be be’e mebum a tabe nsamba éyoñ éte ébien binyiñe biap!

Tame fe yene duma be nga ve Yésus ôsusua na a bialé. Élisabeth a nga loone nye na “Tate wom,” a mon a mbe nye abum a nga “vak” éyoñe ba Marie be nga tôban éyoñ ôsu. Jam ete da selane fo’o a avale bôte ba ye nyoñe Marie a mone wé melu ma zu, avale bia ye yen ôsu.