Mɛlɛkɛ Gabiriyɛli y’a fɔ Mariyamu ye ko a bena dencɛ wolo min tɔgɔ bena la ko Yezu. O dencɛ bena kɛ Masacɛ ye fɔɔ abada. Mariyamu ye mɛlɛkɛ ɲininga ko: “Ne bena se ka kɔnɔ ta cogo di? K’a sɔrɔ ne ma cɛɛ lɔn fɔlɔ.”—Luka 1:34.

Gabiriyɛli y’a jaabi ko: “Nii Senuman bena jigi i kan, Fɛɛn bɛɛ kuntigi Ala ka sebagaya bena kɛ i kan. O kama, i bena Deen senuman min wolo, a bena wele Ala Dencɛ.”—Luka 1:35.

N’a sɔrɔ Gabiriyɛli b’a fɛ ka Mariyamu dɛmɛ a ka sɔn ale ka kuma ma. O kama, a y’a fɔ ko: “A filɛ, i balimamuso Elizabɛti fana ye kɔnɔ ta a n’a ka kɔrɔya bɛɛ, a kalo wɔɔrɔnan ye nin ye. A bena dencɛ wolo, ale min tun be jati muso wolobali ye. Ala te dɛsɛ foyi la.”—Luka 1:36, 37.

Gabiriyɛli ye min fɔ, Mariyamu sɔnna o ma. A ko: “Ne ye Matigi ta ye, i y’a fɔ cogo min na, Ala k’a kɛ ne ye ten.”—Luka 1:38.

Gabiriyɛli taganin kɔ, Mariyamu y’a yɛrɛ labɛn ka taga bɔ Elizabɛti ye. Elizabɛti n’a cɛɛ Zakari be Zeruzalɛmu gɛrɛfɛ, Zude kuluyɔrɔw la. N’i bɔra Mariyamu fɛ Nazarɛti, i be se ka tile saba wala naani kɛ ka sɔrɔ ka se yen.

Mariyamu sera Zakari ka soo. A dontɔ, a y’a somɔgɔ Elizabɛti fo. O tuma na, Elizabɛti fara hakili senu na ani a y’a fɔ Mariyamu ye ko: “I ye nɛɛma sɔrɔ Ala fɛ ka tɛmɛ musow bɛɛ kan, ani deen min b’i kɔnɔ, o fana ye nɛɛma sɔrɔ. Ne ye jɔn ye fɔɔ ne Matigi bamuso yɛrɛ be na bɔ ne fɛ? A filɛ, ne y’i ka folikan mɛn tuma min na, ne deen lamagara nisɔndiya fɛ ne kɔnɔ.”—Luka 1:42-44.

Mariyamu ye Elizabɛti waleɲuman lɔn kosɔbɛ. A y’a jaabi ko: “Ne be Matigi boɲa n dusu la, ne nisɔn diyanin be n Kisibaga Ala kosɔn, bari, a y’a hakili to a ka jɔnmuso majiginin na. Kabini sisan, mɔgɔw ben’a fɔ waati bɛɛ ko ne dagamunin lo, bari Setigi ye kobabaw kɛ ne ye.” An k’a kɔrɔsi ko Ala ye nɛɛmaba kɛ Mariyamu ye. O n’a ta bɛɛ, Mariyamu ye nɔɔrɔ bɛɛ la Ala lo kan. Mariyamu ko: “A tɔgɔ ka senu. Ala be makari a ɲasiranbagaw la waati bɛɛ.”—Luka 1:46-50.

Mariyamu tora ka Ala tando ani ka kiraya kumaw fɔ hakili senu barika la. A ko: “A ye kabakow kɛ n’a ka sebagaya ye, a ye yɛrɛboɲalaw hakili ɲagami. A ye fanga bɔsi faamaw na ka dɛsɛbatɔw kɛ mɔgɔbabaw ye. A ye fɛnɲuman caaman di kɔngɔtɔw ma ka fɛntigiw bololakolon bila ka taga. A nana ni dɛmɛ ye Isirayɛli jama ma, min y’a ka baarakɛlaw ye, k’a hakili to a ka ɲumanya la Ibrayima n’a kɔmɔgɔw faan fɛ, i ko a tun y’a daa di an faaw ma cogo min na.”—Luka 1:51-55.

Mariyamu tora ni Elizabɛti ye kalo saba ɲɔgɔn. N’a sɔrɔ a ye Elizabɛti dɛmɛ sanni a jigituma ka se. O muso kantigi fila kɔnɔman lo Ala barika la. Koo ɲuman lo u ka to ɲɔgɔn fɛ o wagati ɲɔgɔn na!

A kɔrɔsi bonya min lara Yezu kan, k’a to kɔnɔbara la. Elizabɛti y’a weele ko “ne Matigi.” Tuma min na Mariyamu ye Elizabɛti fo, deen min be Elizabɛti kɔnɔbara la, ale “lamagara nisɔndiya fɛ.” Kɔfɛ, mɔgɔ bɛɛ tɛna o bonya ɲɔgɔn la Mariyamu n’a dencɛ kan, min ma wolo fɔlɔ. An bena o lajɛ kɔfɛ.