Imwin tuangakin te ateiaine ae Maria iroun te anera ae Kabiriera bwa e na bungia te nati te mwaane ao n aranna bwa Iesu ao e na riki bwa te Uea n aki toki, e titiraki Maria ni kangai: “E na kangaa n reke aei, ngkai I tuai ni wene n taanga ma te mwaane?”​—Ruka 1:34.

E kaeka Kabiriera ni kangai: “E na ruoniko te taamnei ae raoiroi, ao e na rabuniko mwaakan Teuare Moan te Rietata. Ao ibukin anne e na atongaki te nati ane bungiaki bwa e tabu, ae Natin te Atua.”​—Ruka 1:35.

Tao ibukini buokani Maria ni butimwaea ana rongorongo, e reitia riki Kabiriera ni kangai: “Noria! e bikoukoua naba te nati te mwaane am koraki are Eritabeta ngkai e a kara, ao ai ana kaonoua n namwakaina aei, te aine are atoatongaki ngkoa bwa e kanoabo, bwa akea te taeka teuana mairoun te Atua ae e na aki kakoroaki bukina.”​—Ruka 1:36, 37.

Ti noria bwa e butimwaea te baere e taekinna Kabiriera ngke e kangai: “Noria! ngai ana toro Iehova, ae te aine! Ke e riki nakoiu n ai aron am taeka.”​—Ruka 1:38.

Imwin nakoni Kabiriera ao e a katauraoia Maria bwa e na kawara Eritabeta ae maeka ma buuna ae Tekaria n uakaan ma Ierutarem n te tabo ae tabukibuki i Iutaia. E nakon tenibong ke abong maanin te mwananga mani mwengani Maria are i Natareta.

Akea bwa e a roko Maria n ana auti Tekaria. Ngke e rin ao e a kamaura ana koraki are Eritabeta. Ibukin anne e a kaonaki n te taamnei ae raoiroi ao e taku nakoni Maria: “Ko kakabwaiaaki i buakoia aine, ao e kakabwaiaaki natim ane ko na bungia! Mangaia ae e a kangaa naba n reke te kakabwaia aei irou ae kawarau iroun tinan au Uea? Bwa noria! ngke I ongo bwanaam ni kamauri, ao e kakatei natiu i nanoni birotou ma te kimwareirei.”​—Ruka 1:42-44.

E kaeka Maria ma te kakaitau ni kangai: “I neboa Iehova, ao I a aki kona n taona kimwareireiu iroun te Atua ae au tia Kamaiu, bwa e mutiakina ana toro te aine ae mangori. Ao noria! ni moa mangkai ao a nangi bane rooro n atongai bwa I a kukurei, bwa e a tia ni karaoi baika kakannato ibukiu Teuare mwaaka.” Ti kona n noria bwa e bon neboa te Atua Maria e ngae ngke e taekina akoana. E taku: “E tabu arana. E kaokaota ana nanoanga nakoia akana maakua man te rorona nakon te rorona.”​—Ruka 1:46-50.

E reitaanako kamoamoaan te Atua Maria n taekina te taetae ni burabeti ae kangai: “E karaoi mwakuri aika korakora ni baina, ao e kamaenakoia akana iango ni kainikatonga. E kabwakaia akana kakannato man taiani kaintokanuea, ao e karietataia akana mangori. E kanuaiia akana baki ni baika raraoi, ao e kanakoia akana kaubwai n akea aia bwai. E buoka ana toro are Iteraera, bwa e aonga ni kaotia bwa e uringa ana berita are e na nanoangaa Aberaam n aki toki ma kanoana, n aron are e tuangia ngkoa ara bakatibu.”​—Ruka 1:51-55.

E tiku Maria i rarikin Eritabeta tao tenua namwakaina ao e bae n ibuobuoki i nanoni kabaneani wikini bikoukoun Eritabeta. Ai raoiroira ngkai a a kona n iraorao n te tai aei aine aika kakaonimaki aika uoman aikai ake a bikoukou n ana ibuobuoki te Atua!

Ao nora aroni karinean Iesu imwaini bungiakina. E aranna Eritabeta bwa ‘ana Uea’ ao e kakatei ma “te kimwareirei” te teei are i nanoni birotona ni moan rokoni Maria. Ma e rangi ni kaokoro anne ma aroia aomata imwina nakoni Maria ao natina are e na bungia, n aron ae ti na noria.