Pengudah Gabriel madah ngagai Maria pasal iya ke deka ngadaka siku anak lelaki ke diberi nama Jesus, ke deka nyadi raja belama iya, Maria lalu nanya: “Baka ni ku utai tu tau nyadi? Aku agi dara.”—Luke 1:34.

Gabriel nyaut: “Kuasa kudus Petara deka datai atas nuan, lalu kuasa Petara ti Pemadu Tinggi deka ngelindung nuan. Nya alai, anak ke diadaka nuan nya ila, deka dikumbai kudus sereta dikumbai Anak Petara.”—Luke 1:35.

Ngambika ulih nulung Maria nerima pesan nya, ku Gabriel agi: “Kaban belayan nuan Elisabet mega benung ngandung enam bulan, taja pan iya nyau tuai lalu dikumbai orang enda ulih beranak. Laban nadai utai ke disebut Petara enda kala enda nyadi.”—Luke 1:36, 37.

Maria pan nerima utai ke dipadah Gabriel. Ku iya: “Aku tu ulun indu Jehovah! Awakka utai ke disebut nuan nya nyadi ba aku.”—Luke 1:38.

Pengudah Gabriel mupuk, Maria ke diau ba Nasaret deka nemuai ngagai Elisabet. Sekariah enggau Elisabet diau ba endur ti bebukit di Judea semak Jerusalem. Pejalai Maria begunaka tiga tauka empat hari ngambika ulih datai din.

Maria tama ngagai rumah Sekariah lalu meri jaku tabi ngagai Elisabet. Maya nya, Petara meri kuasa kudus ngagai Elisabet. Elisabet madahka: “Beberekat meh nuan ari semua indu ke bukai, lalu beberekat meh anak ke dikandungka nuan! Tu endang sigi basa ti besai ke aku, laban indai Tuan aku udah datai nemuai ngagai aku. Lebuh aku ninga jaku tabi nuan tadi, anak dalam kandung aku engkebut gaga ati.”—Luke 1:42-44.

Ati Maria berasai ditegu lalu iya madahka: “Aku ngemesaika Jehovah, lalu ati aku balat gaga ketegal Petara ti Penyelamat aku, Iya udah meratika ulun indu Iya ti baruh pendiau. Belabuh ari diatu, semua rebak deka ngumbai aku beberekat, laban Petara ti bekuasa udah ngereja utai ti ngalitka ati ke aku.” Taja pan Maria diberi basa ti besai, tang iya enda sumbung. Iya ngemuliaka Petara enggau madahka: “Nama Iya kudus lalu ari rebak siti ngagai rebak siti, orang ke nangika Iya deka bulih pengasih ari Iya.”—Luke 1:46-50.

Maria terus muji Petara: “Iya udah ngereja utai ti besai ngena lengan Iya. Iya udah ngasuh orang ke bisi ati ti sumbung, pambar. Iya udah muai orang ke besai pangkat ari kerusi diraja sida, lalu ngeninggika orang ke baruh pendiau. Iya meri utai ke manah ngagai orang ke suntuk nyentukka sida berasai puas, lalu muru orang ke kaya ngambika sida pulai nadai mai utai. Iya udah nulung nembiak Iya, Israel, kena nunjukka Diri ingatka sempekat Iya ti deka ngayanka pengasih ngagai Abraham enggau peturun iya datai ke belama iya.”—Luke 1:51-55.

Maria diau enggau Elisabet kira-kira tiga bulan. Iya nulung Elisabet ke deka beranak enda lama da agi. Seduai iya ngandung ketegal kereja ajih ari Petara. Lalu seduai iya amat beterima kasih laban ulih begulai maya nya.

Jesus udah dimuliaka indah sebedau iya ada. Maya nya, Elisabet ngangauka iya “Tuan aku.” Lalu anak dalam kandung Elisabet “engkebut gaga ati” lebuh Maria datai nemuai. Tang ukai semua orang deka bebasaka Jesus enggau Maria.