Mũraika Gaburieli era Mariamu atĩ nĩ ekũgĩa mwana wa kahĩĩ ũrĩa ũgetagwo Jesu na agaathana tene na tene arĩ Mũthamaki, Mariamu akamũũria ũũ: “Ũndũ ũcio ũngĩhoteka atĩa, na ndirĩ ndakoma na mũndũrũme?”​—Luka 1:34.

Nake Gaburieli akamwĩra: “Roho mũtheru nĩ ũgoka igũrũ rĩaku, na hinya wa Ũrĩa ũrĩ Igũrũ Mũno nĩ ũgaakũhumbĩra. Na nĩ ũndũ ũcio ũrĩa ũgaciarũo agetwo mũtheru, Mũrũ wa Ngai.”​—Luka 1:35.

Kwahoteka Gaburieli arongerera ciugo ici nĩguo ateithie Mariamu gwĩtĩkĩra ndũmĩrĩri yake: “Atĩrĩrĩ, Elizabethi ũrĩa wa mbarĩ cianyu, o ũcio andũ metaga thata, o nake nĩ ohete nda, na nĩ ekũgĩa kahĩĩ ũkũrũ-inĩ wake, na ũyũ nĩguo mweri wake wa gatandatũ, tondũ gũtirĩ uuge ũngĩrema Ngai.”​—Luka 1:​36, 37.

Mariamu agetĩkĩra ndũmĩrĩri ya Gaburieli. Akoiga ũũ akenete: “Niĩ-rĩ, ndĩ ngombo ya Jehova! Reke gwĩkĩke harĩ niĩ o ta ũguo woiga.”​—Luka 1:38.

Thutha wa Gaburieli kuumagara, Mariamu akehaarĩria gũthiĩ gũceerera Elizabethi ũrĩa ũikaraga na mũthuri wake Zekaria, hakuhĩ na Jerusalemu irĩma-inĩ cia Judea. Rũu nĩ rũgendo rwa thikũ ta ithatũ kana inya kuuma Nazarethi kũrĩa Mariamu aikaraga.

Mariamu agakinya mũciĩ gwa Zekaria. Akĩingĩra, akageithia Elizabethi. Nake Elizabethi akaiyũrũo nĩ roho mũtheru akeera Mariamu atĩrĩrĩ: “Kũrathimwo nĩwe gatagatĩ-inĩ ga atumia, na kũrathimwo nĩ kaana kau karĩ nda yaku! Nĩ gĩtĩo kĩnene harĩ niĩ gũceererũo nĩ nyina wa Mwathani wakwa. Tondũ rĩrĩ, o hĩndĩ ĩyo ndaigua wangeithia, kaana karĩa karĩ nda yakwa nĩ kaambarara nĩ gĩkeno.”​—Luka 1:​42-44.

Nake Mariamu akagweta ciugo cia kuonania ngatho ciake cia kuuma ngoro akoiga: “Nĩ ndĩragooca Jehova, na ngũikara ngenete mũno nĩ ũndũ wa Ngai Mũhonokia wakwa tondũ nĩ andathimĩte niĩ mũthĩni, ndungata yake ya mũirĩtu. Na rĩrĩ, kuuma rĩu, njiarũa ciothe irĩnjĩtaga mũrathime nĩ gũkorũo Ũrĩa ũrĩ hinya nĩ anjĩkĩire maũndũ manene.” Ciugo icio ironania atĩ o na Mariamu onetio gĩtĩo kĩu, aracokeria Ngai rũgooco ruothe. Akoiga ũũ: “Rĩĩtwa rĩake nĩ itheru, na kuuma rũciaro nginya rũciaro, tha ciake onagia arĩa mamwĩtigĩrĩte.”​—Luka 1:46-50.

Mariamu agathiĩ na mbere kũgooca Ngai akĩhũthĩra ciugo itongoretio nĩ roho akoiga: “Nĩ ekĩte maũndũ manene na guoko gwake; nĩ ahurunjĩte arĩa mathugundaga ngoro-inĩ ciao maũndũ ma gwĩtũũgĩria. Nĩ eheretie andũ arĩa marĩ hinya itĩ-inĩ cia ũnene na agatũũgĩria arĩa enyihia; arĩa ahũtu nĩ amahũnĩtie biũ na indo njega, nao arĩa atongu akamaingata matarĩ kĩndũ. Nĩ ateithĩtie Isiraeli ndungata yake, akaririkana tha ciake o ta ũrĩa eerĩire maithe maitũ ma tene, kũrĩ Iburahimu na kũrĩ rũciaro rwake tene na tene.”​—Luka 1:​51-55.

Mariamu agaikara na Elizabethi kĩndũ mĩeri ĩtatũ, na hihi agateithia Elizabethi ihinda-inĩ rĩrĩa rĩtigarĩte atanagĩa mwana. Na githĩ ti ũndũ wa gwĩkĩra ngoro kuona ũrĩa atumia acio erĩ ehokeku marateithania ihinda-inĩ rĩrĩ rĩa mwanya rĩa ũtũũro wao?

Ningĩ ta rora wone ũrĩa Jesu aaheirũo gĩtĩo o na atanaciarũo. Elizabethi aamwĩtire “Mwathani wakwa,” na rĩrĩa Mariamu aaingĩrire, kaana karĩa kaarĩ nda ya Elizabethi ‘gakĩambarara nĩ gĩkeno.’ O ta ũrĩa tũkuona, ũndũ ũcio warĩ ngũrani mũno na ũrĩa andũ angĩ meekire Mariamu na kaana karĩa kaarĩ nda yake.