Malaika Ngabaliela byo apwishishe kubuula kamwale aye Maliya amba ukasema mwana wamulume ye akatumba’mba Yesu kabiji ukekala Mfumu wa myaka ne myaka, Maliya wamushikishe’mba: “Pano kino kikobiwa byepi, mambo nkyangye kulaalapo na mwanamulume?”—Luka 1:34.

Ngabaliela wamukumbwile’mba: “Mupashi wazhila ukekala pe obewa, ne bulume bwa Mwine Wakila bukekala pe obewa. Kabiji na mambo a kino, awa ukasemwa ukatelwa’mba wazhila, Mwana Lesa.”—Luka 1:35.

Pa kuba’mba akwashe Maliya kuswa bino byambo, Ngabaliela wanungilepo amba: “Elisabeta mulongo wobe ye batela’mba ñumba, waimita mwana wa mulume mu bukote bwanji, kabiji uno ke ñondo wa butanu na bumo, mambo kyonse kyaamba Lesa kikafika.”—Luka 1:36, 37.

Maliya waswile byamubuujile Ngabaliela, mambo wakumbwile’mba: “Akitalai! Muzha wa mukazhi wa Yehoba! Kimmwekele monka mo mwaambila.”—Luka 1:38.

Ngabaliela byo ayile, Maliya winengezhezhe kuya na kufwakesha Elisabeta waikalanga na mwatawanji Zekaliya kwipi na Yelusalema ku mpunzha ya mitumba mu Yudea. Kufuma ku nzubo ya kwa Maliya mu Nazala palepele bingi kya kuba baendangapo moba asatu nangwa ana.

Maliya byo afikile ku nzubo ya kwa Zekaliya, watwelele ne kwimuna Elisabeta. Aku umwimunatu, Elisabeta wayujile na mupashi wazhila ne kwambila Maliya amba: “Obewa watokwa mu banabakazhi kabiji obilwe bibusa mwana ye ukasema! Pano nga bino bibusa byaiya byepi pe amiwa, kya kuba bamfwakesha kwi inanji Nkambo yami? Mambo aku ungimunatu, mwana waji kufunka na lusekelo munda mwami.”—Luka 1:42-44.

Maliya waambile na lusekelo amba: “Mweo wami watumbijika Yehoba, ne muchima wami ubena kusekela mwi Lesa Mupulushi wami, mambo watala pa buyanji bwa muzha wanji wa mukazhi. Kabiji kufuma lelo, bisemi byonse bikañambilanga amba watokwa mambo Aye wa bulume wangubila bintu bikatampe.” Nangwa kya kuba bamubijile bibusa, Maliya watumbijikile Lesa. Waambile’mba: “Jizhina janji jazhila, ne lusa lwanji lwaikala myaka ne myaka pa boba bamwakamwa.”—Luka 1:46-50.

Maliya watwajijile kutota Lesa na byambo bya bungauzhi bya kuba’mba: “Wauba bintu bya bulume na kuboko kwanji; wibapalañanya belundumika na milanguluko ya mu michima yabo. Wibafumyapo babiloolo pa matanda abo ne kutumbijika balanda; bafwa nzala wibalengela kwikuta na bintu byawama kabiji waleka banonshi kuya mabokotu. Wakwasha Isalela kalume wanji, ne kuvuluka lusa lwanji, byonkatu byo aambile ku bashakulu betu, kwi Abalahama ne ku mwananji, myaka ne myaka.”—Luka 1:51-55.

Maliya waikele ne Elisabeta pa bañondo basatu kabiji kyamweka wakwashishe bingi Elisabeta byo kwashajiletu milungu icheche kupaapa. Kyawamine bingi kuba’mba bano banabakazhi babiji bakishinka baikele pamo kabiji na bukwasho bwa Lesa baikele na baana.

Langulukai pa munema ye bamupele Yesu saka akyangye ne kusemwa. Elisabeta wamutelele’mba “Nkambo yami,” kabiji mwananji wakijinga munda ‘wafunkile na lusekelo’ kimye Maliya kyo afikile. Bino, byonka byo tusakumona, bantu bakwabo kechi bamunemekele Maliya ne mwananji ne.