Lingeloi Gabriele hase libulelezi kalibe yabizwa Maria kuli ukapepa mwana wamushimani yakabizwa Jesu ni yakabusa sina Mulena kuya kuile, Maria ubuza kuli: “Taba yeo ikaezahala cwañi, kakuli hanisika lobala kale ni muuna?”—Luka 1:34.

Gabriele ualaba kuli: “Moya okenile ukataha ku wena, mi maata a Yapahami ka Kufitisisa akaba fahalimwaa hao. Mi ka lona libaka leo, yakapepwa ukabizwa yakenile, Mwanaa Mulimu.”—Luka 1:35.

Mwendi ka kutusa Maria kuli alumele taba yeo, Gabriele uekeza kuli: “Hakubone! Elizabeta mwanahabo wena, yene bali ki mumba, ni yena uitwezi mwana wamushimani mwa busupali bwahae, mi ye ki yona kweli yahae yabu 6; kakuli ku Mulimu hakuna linzwi lelika pala kutalelezwa.”—Luka 1:36, 37.

Maria ulumela zabulezi Gabriele, sina moiboniseza kalabo yahae. Maria ubulela ka tabo kuli: “Hakubone! Na ni mutangaa Jehova! Hakuezahale ku na kulikana ni linzwi lahao.”—Luka 1:38.

Gabriele hasa musiile, Maria uitukiseza kuyo potela Elizabeta, yapila ni munaa hae Zakaria mwa malundu a Judea, bukaufi ni Jerusalema. Musipili wa kuzwa kwa Nazareta kwapila Maria kuya kwapila Elizabeta ukona kuunga mazazi amalaalu kamba amane.

Maria cwale ufita kwa ndu ya Zakaria. Hakena mwa ndu, ulumelisa mwanahabo yena Elizabeta. Honafo, Elizabeta utala moya okenile, mi ubulelela Maria kuli: “Ufuyauzwi mwahalaa basali, ni mwana ya mwa mba yahao ufuyauzwi! Cwale kutaha cwañi kuli nibe ni tohonolo ye, ya kupotelwa ki mahe Mulenaaka? Kakuli hakubone! Linzwi la tumeliso yahao lisafita feela mwa mazebe aka, mbututu ye mwa mba yaka yanyanganya ka tabo.”—Luka 1:42-44.

Maria cwale ualaba ka buitumelo bobutuna, uli: “Moyo waka ububeka Jehova, mi moya waka haukoni kupalelwa kunyakalala kabakala Mulimu, yena Mupilisi waka, kabakala kuli uboni mayemo a kwatasi a mutangaa hae. Kakuli hakubone! Kuzwa cwale, masika kaufela akabulela kuli niyatabile, kakuli Yamaata uniezelize zetuna.” Lulemuha kuli Maria niha bonisizwe sishemo cwalo, ufa tumbo kaufela ku Mulimu. Uli: “Libizo lahae likenile, mi mwa masika ni masika, sishemo sahae siinzi ku baba musaba.”—Luka 1:46-50.

Ka kususumezwa ki moya okenile, Maria uzwelapili kulumbeka Mulimu ka manzwi a bupolofita, uli: “Uezize zemaata ka lizoho lahae; uhasanyize babanani milelo ya kuikankabeka mwa lipilu zabona. Utuluzi baana babamaata fa mabona abona mi upahamisize baba kwatasi; ukulisize babashwile tala ka lika zende, mi bane banani sifumu ubakutisize mazoho-zoho. Utusize Isilaele mutangaa hae, uhupuzi sishemo sahae, sina mwanaabulelezi ku bo kuku waluna, ku Abrahama ni kwa bana bahae, kuya kuile.”—Luka 1:51-55.

Maria uina ni Elizabeta likweli zebato ba zetaalu, mwendi ilikuli amutuse ka lisunda lisikai pili Elizabeta asika puluha kale. Kwatabisa luli kuli basali bababeli babasepahala ba, babaitwezi ka tuso ya Mulimu, bapile hamoho cwalo!

Mi mulemuhe likute lanaafilwe Jesu pili asika pepwa kale. Elizabeta umubiza kuli “Mulenaaka,” mi mbututu ye mwa mba yahae “yanyanganya ka tabo” Maria hafita. Sina haluka bona, nto yeo ishutana hahulu ni mo batu babañwi nebaezelize Maria ni mwanaa hae yanaatuha apepwa.