Muanjelu Gabaliele mumane kuambila Mariya utshivua nsongakaji ne: nealele muana wa balume winyikabu ne: Yezu, ne wakokesha bu Mukalenge bua kashidi, Mariya wakamukonka ne: “Bualu ebu nebuenzeke mushindu kayi bualu meme tshiena muanji kusangila ne mulume?”​—Luka 1:34.

Gabaliele wakamuandamuna ne: “Nyuma muimpe nealue kuudi, bukole bua Mutambe Bunene nebukubuikile. Bua bualu abu, eu waledibua nebamubikile ne: wa tshijila, Muana wa Nzambi.”​—Luka 1:35.

Imue misangu bua kuambuluisha Mariya bua kuitaba mukenji eu, Gabaliele wakamba kabidi ne: “Tangila! Mulela webe Elizabeta mmuimite pende muana wa balume mu bukulakaja buende, ne ngondo eu nguende muisambombo, mukaji uvuabu bamba ne: nkumba; bualu kakuena dîyi dikala Nzambi kayi mua kukumbaja to.”​—Luka 1:36, 37.

Diandamuna dia Mariya didi dituleja ne: uvua muitabe tshivua Gabaliele muambe. Kumuambilaye ne: “Mona! meme nsongakaji mupika wa Yehowa! Bingenzekele anu muudi muambe.”​—Luka 1:38.

Diakamue pakaya Gabaliele, Mariya wakadilongolola bua kuya kudi Elizabeta uvua musombele ne bayende Zekâya pabuipi ne Yelushalema mu mikuna ya mu Yudaya. Luendu lua kumbuka kua ba Mariya kubanda ku Nazaleta luvua mua kuangata matuku asatu anyi anayi.

Ndekelu wa bionso Mariya wakafika kua Zekâya. Pakabuelaye, wakela mulela wende Elizabeta muoyo. Diakamue, Elizabeta wakuwujibua ne nyuma muimpe, kuambilaye Mariya ne: “Wewe udi mubeneshibue munkatshi mua bakaji, ne dimuma dia munda muebe ndibeneshibue! Nunku, mmunyi mundi mupete diakalenga edi: dia mamuende wa Mukalenge wanyi kulua kundi? Bualu mona! pavua dîyi dia muoyo uuvua mungele difike ku matshi anyi, muana udi munda muanyi uvua mutumpike bua disanka.”​—Luka 1:42-44.

Pashishe Mariya wakandamuna ne dianyisha dionso ne: “Anyima wanyi udi utumbisha Yehowa, ne lungenyi luanyi kaluena mua kudikanda bua kuikala ne disanka dipite bungi bua Nzambi Musungidi wanyi, bualu mmutangile muaba mushadile wa mupika wende mukaji. Bualu tangilayi! kutuadija ku mpindieu bipungu bionso bia bantu nebiambe mundi wa diakalenga, bualu Wa bukole mmungenzele malu manene.” Tudi tumona ne: nansha mudi Mariya muanyishibue, udi ufila butumbi bonso kudi Nzambi. Udi wamba ne: “Dîna diende ndia tshijila, ne bualu ku tshipungu ne ku tshipungu tshia bantu luse luende ludi kudi badi bamutshina.”​—Luka 1:46-50.

Mariya wakatungunuka ne kutumbisha Nzambi mu mêyi a buprofete mamba ku nyuma wamba ne: “Mmuenze malu ne bukole ne diboko diende; mmutangalaje badi badibandisha mu meji a mu mioyo yabu. Mmutulule bantu badi ne bukokeshi mu nkuasa ya bukalenge, mmubandishe bapuekele; mmukutshishe bikole badi ne nzala ne bintu bimpe, ne mmupingaje bavua ne bubanji bianza bitupu. Mmuambuluishe Isalele muena mudimu wende, uvuluka luse luende bua kashidi, anu bu muvuaye muambile bankambua betu, muambile Abalahama ne bana bende.”​—Luka 1:51-55.

Mariya wakashala ne Elizabeta ngondo mitue ku isatu, pamuapa bua kumuambuluisha mu mbingu ivua mimushadile bua kulela ayi. Mbimpe bia dikema bua muvua bakaji ba lulamatu aba bonso bavua bimite ku diambuluisha dia Nzambi, bikale pamue mu tshikondo tshia mu nsombelu wabu etshi!

Mona butumbi buvuabu bapeshe Yezu kumpala kua kuledibuaye. Elizabeta wakamubikila ne: “Mukalenge wanyi,” ne muana uvua munda muende “uvua mutumpike bua disanka” pavua Mariya mumuele muoyo. Anu mutuabimona, bualu ebu mbushilangane bikole ne tshivua bantu bakuabu balue kuenzela Mariya ne muana uvuaye ne bua kulua kulela.