Omu kangelo Ngavalyele akumishile kulweza mwanapwevo Maliya ngwenyi mwakasema mwana walunga uze mwakaluka ngwenyi Yesu, uze nawa mwakapwanga Mwangana haya myaka yosena, Maliya ehwile ngwenyi: “Uno nachipwa ngachilihi ngocho, hakuwana nge ami kanda nguchilisavaleho lyehi nalunga?”—Luka 1:34.

Ngavalyele amukumbulwile ngwenyi: “Shipilitu yajila nayiza hali ove, kaha ngolo jayou Wakulitulaho Chikuma najitwama hali ove. Shikaho ou mwakasemuka navakamuvuluka ngwavo, wajila, MwanaKalunga.”—Luka 1:35.

Hakusaka akafwe Maliya etavile vyuma nahanjika, Ngavalyele atwalileho lika ngwenyi: “Kausoko kove Elizaveta uze vavulukilenga ngwavo mumba, naikiye nawa nemita lijimo lyamwana walunga muushinakaji wenyi. Uno jino hikakweji wakusokesa 6. Kakweshi mazu aze nahanjika Kalunga nawahona kutesamoko.”—Luka 1:36, 37.

Maliya etavilile mazu ahanjikile Ngavalyele. Talenu mazu ahanjikile. Awahililile nakwamba ngwenyi: “Tala, ami ndungo yaYehova wapwevo! Chipwenga vene ngocho kweseka namazu ove.”—Luka 1:38.

Omu alingile Ngavalyele nayi lyehi, Maliya akashile ungeji wakuya kuli Elizaveta, uze atwaminenga nalunga lyenyi Zekaliya kungalila yajipili yaYuleya kwakamwihi naYelusalema. Ungeji kanou wakufuma kwimbo lyaMaliya kuNazaleta, wambachile makumbi atatu chipwe awana.

Maliya ahetele kuzuvo yaZekaliya. Engilile muzuvo, kaha amenekele kausoko kenyi Elizaveta. Hahaze vene Elizaveta azalile nashipilitu yajila, kaha ambile kuli Maliya ngwenyi: “Ove yove vakisula hali mapwevo vosena, kaha vakisula nawa shina mwanou mwakasemuka mujimo lyove! Echi hikutokwa chikuma kungutambukila kuli naye yaMwata wami. Mwomwo omu ngwevwanga lizu lyove lyakungumeneka, kemba nalyungununa mujimo lyami nakulisamba chikuma.”—Luka 1:42-44.

Hakwivwa ngocho, Maliya awahililile chikuma nakwamba ngwenyi: “Mwono wami naumutohwesanga Yehova, kaha shipilitu yami nayikinyinyinanga muli Mulwilo wami Kalunga, mwomwo natale hali ami ndungo yenyi wapwevo uze ahona ulemu. Mwomwo kufuma vene oholili muvisemunwino vyosena navakangwambanga ngwavo nguwakuwahilila, mwomwo Uze ukwechi ngolo nangulingila vyuma vyavinene.” Numba tuhu Maliya vamwivwilile chikuma uselewa, oloze asakile vatu valisenga Kalunga. Ambile ngwenyi: “Lijina lyenyi lyajila. Mwatetelanga vaze vamwivwa woma kuchisemunwino hichisemunwino.”—Luka 1:46-50.

Maliya atwalileho lika kwalisa Kalunga mumazu enyi aupolofweto vamuhwiminyinyine, ngwenyi: “Nazate vyuma vyangolo nalivoko lyenyi, kaha vaka-kulivwimba mumichima yavo navamwange lyehi mwamwa. Nafumisa vatu vangolo hamatanda avo, kaha natohwesa vatu vakuhona ulemu. Vaze vali nazala navekuchisa navyuma vyamwaza, kaha nakindulwisa vaka-luheto mavokovoko. Nakafwe ngamba yenyi Isalele, mwomwo nanuka lushiko lwenyi lwakutetela, nge muze ahanjikile kuli vakakuluka jetu ngwenyi mwakatetela Apalahama namuka-tanga yenyi haya myaka yosena.”—Luka 1:51-55.

Maliya atwamine naElizaveta tukweji kafwe vatatu, pamo apwile nakukafwa milimo Elizaveta, uze apwile hakamwihi nakusapuluka. Chawahile kuli ava mapwevo vakushishika vavali ava vemichile vana mungolo jaKalunga kutwama hamwe halwola elu vavakiswile mukuyoya chavo.

Munamono omu Yesu vamulemesele shimbu kanda achisemuke, ngwetu? Elizaveta amuvulukile ngwenyi “Mwata wami,” kaha mwanenyi apwile mujimo nawa ‘alyungunwine nakulisamba chikuma’ omu ahetele Maliya. Oloze kutwala muze, vatu veka kavalemesele Maliya namwanenyi apwile mujimoko, nganomu natumona.