Munkeelo Kapriyele amanle omuleela Mariya wi onahaala omuyara mwaana yoowo onahaala ochuwiwa nsina nawi Yesu nave onahaala olamulela ntoko Mwene okhala wookhala, Mariya onnakoha: “Etxhu ene yeyo wereya eni yere hai, keraka miyo kihimusuwenle mulopwana?”—Luka 1:34.

Kapriyeli o nnaakhula: “Munepa Wawela t’oni wokhuruwele nave ikuru sa Mutokwenesa inamohuruwela murusi aya, tiva yowo onerawe omuyare oni itxhaniweke Mwana a Muluku.”—Luka 1:35.

Akhweya wi amukhaviherye Mariya weemererya muchaka awe, Kapriyele onnaaceererya: “Wonetho Isabél, munna-à, uluvanle, òmurupala mwana, nave yola ori mweri wanethanu namoha wa yole eriwa mulipa òhiyara; nthakhara hiyavo enawerya onvila Muluku.”—Luka 1:36, 37.

Mariya onneemererya yeeyo Kapriyele olonceiye, ntoko nnoonaahu orweela wa naakhulo nawe. “Miyano kiri kapuro a Apwiya, yereye wa miyano ntoko olontxawe.”—Luka 1:38.

Vaavaa Kapriyele onavinyeiyevo, Mariya onniirehererya wi amusekurye Isapeli, yoowo onakhala ni iyawe, Sakariya, waacamela o Yerusalemu makupa a miyoko so Yuteya. Ovinyerya o Nasareti, owo mukwaha akhweya onamaliha mahiku mararu naari masese.

Wookuchulani Mariya onnaphiya veechokoni ya Sakariya. Vaavaa onaphiyeiye onnammwenyerya mmusi awe Isapeli. Mu elukuluku yeeyo, Isapeli onnasareya munepa waweela, nave onnaloca wa Mariya: “Òrèlihiwa ti weyano mwa athiyana othene ni yorèlihiwa ti yawima ya mmirimani mwà. Nave enarwa wowi ela yawi amai a Apwiya aka erwe wa miyo? Ntakhara kirimwi wiwa wene nsu na omwenyerya wà, mwana àtannyeya nuhakalala mmirimani mwaka.”—Luka 1:42-44.

Voocharela Mariya onnaakhula ni murima woothamalela: “Murima aka onnàvuwiha Apwiya, ni munepa aka onnahakalala mwa Muluku nvulusaka. Wona wi Muluku òweha wiyeviha wa kapuru awe: ovinya olelo maloko othene ani enamukera òrèlihiwa. Wona wi yowo orino ikuru òhera wa miyo itxhu itokwene.” Noowerya woona wi moohipwacha mahala onooniheryiweiye, ncicimiho noothene onamukerihela Muluku. Owo onnaloca: “Nsina nawe nri nawela. Ikharari sawe inakhala wa atxhu a maloko ti maloko anamova yowo.”—Luka 1:46-50.

Mariya onnatitelela omvuwiha Muluku, ni masu ala: “Òhoneiha owerya wa mono awe, òhamwarya atxhu awisinnuwiha mmupuweloni a mirima saya. Òhakurusa atxhu a ikuru vehitxeni vaya: òhaweliha atxhu awiyeviha. Òhavoniha alipa òvoliwa ni òharowiha siyo eni atxhu òrèla. Òmukhaviherya Isarayeli mulapeli awe, vawupuwela ikharari sawe ntoko aroromelin’heiye makholo ahu, Abrahamu ni anawe wa mahiku othene.”—Luka 1:51-55.

Mu miyeeri miraru, Mariya onnakhala ni Isapeli, wi amukhaviherye variyari va isumana sookuchula sa orupala wawe. Ti yaphaamasa osuwela wi athiyana yaale oororomeleya, yaakhala vamoha variyari va elukuluku yeele!

Muupuwele ncicimiho Yesu aakhenleiye ahaakumve oyariwa. Isapeli oomwiichana owo “Apwiya aka,” nave “mwana àtannyeya nuhakalala” mmirimani mwawe vaavaa Mariya aamwenyenreiye Isapeli. Eyo yaari yoohiyana ni mukhalelo akina ohoolo waya anamukhalihaaya Mariya ni mwaana yoowo aahaala oyariwa, hiiha ntoko nneeraahu noone.