Angel Gabrielqa Mariamanmi nirqa wawanqa Jesus kananmanta hinaspa chay wawan wiñaypaq kamachiq kananmanta. Chaymi Mariaqa tapukurqa: “¿Imaynamá chayqa kanqa pi qariwanpas mana puñuchkaptiyqa?”, nispa (Lucas 1:34).

Angel Gabrielñataqmi nirqa: “Chuya espiritum qanman hamunqa, hinaptinmi hanaq pacha Dios atiyninwan llantuykusunki. Chaymi naceqqa chuya kanqa, Diospa churinwan sutichasqa”, nispa (Lucas 1:35).

Hinaspam angelqa Maria mana iskayrayananpaq nirqaraq: “Qulluq nisqanku aylluyki Elisabetpas yuyaq kayninpiñam qari wawata wiksayakurun, kunanwanqa suqta killayuqñam kachkan, Diospaqqa manam ima rimasqanpas mana ruway atinanqa kanmanchu”, nispa (Lucas 1:36, 37).

Mariañataqmi mana iskayrayasqanta qawachispan nirqa: “¡Kayqaya Jehova Diospa serviqninqa kaypi kachkani! Rimasqaykiman hinayá ñuqawan ruwakuchun”, nispa (Lucas 1:38).

Chaymantam angel Gabrielqa pasakurqa. Mariañataqmi Elisabetta watukunanpaq imankunatapas qipichakurqa, hinaspanmi Judea lawkama rirqa Nazaret llaqtanmanta yaqa tawa punchaw puriyta.

Chayaruspanñataqmi Elisabetta rimakuykurqa. Hinaptinmi Elisabetqa chuya espiritu huntaykuptin Mariata nirqa: “¡Warmikunamanta ancha bendecisqam kanki, bendecisqataqmi wiksaykipi wawapas! ¿Pitaq ñuqaqa kani señorniypa maman ñuqaman watukamuwananpaqqa? Rimaykuwasqaykita chaylla uyariruptiymi wiksaypi wawapas kusikuymanta kuyurirun”, nispa (Lucas 1:42-44).

Chaymi Mariaqa Diosman graciasta quspan nirqa: “Jehova Diostam hatunchani, salvaqniy Diosraykum sunquypas anchallataña kusikuchkan, payqa kay humilde serviqnintam qawaykuwan. Kunanmanta qipamanqa llapallan runakunam niwanqaku kusisqa kasqayta. Atiyniyuq Diosmi admirakuypaq kaqkunata ñuqapaq ruwarapuwan”, nispa. Mariaqa Diospa akllasqan warmi kachkaspanpas manam hatun tukurqachu. Aswanqa Jehova Diosta hatunchaspanmi hinalla nirqa: “[Diospa] sutinqa chuyam, llakipayakuyninpas wiña-wiñaypaqmi payta respetaqninkunapaqqa”, nispa (Lucas 1:46-50).

Chaymantapas nirqaraqmi: “Atiyninwanmi admirakuypaq kaqkunata ruwarun, hatun tukuqkunapa sunqunpi munasqantam chiqirachin. Kamachikuyninpi tiyananmantam atiyniyuq runakunata wischurun. Humilde kaqkunatañataqmi hatuncharun, yarqasqakunatam allin kaqkunawan alli-allinta saksaykachin, apukunatañataqmi mana imayuqta kutirachin. Llakipayakuq kasqanta mana qunqaspanmi serviqnin Israelta yanapaq hamurun, paymi Abrahanman hinaspa mirayninkunaman prometerqa llakipayakuyninta wiñaypaq qawachinanmanta, chaytam payqa abuelonchikkunaman nirqa”, nispa (Lucas 1:51-55).

Mariaqa yaqa kimsa killam Elisabetwan kuska karqa, payqa imakunapipas anchatam Elisabettaqa yanaparqa. Diosman sunqu chay warmikunaqa Diospa atiyninwanmi wiksayakururqaku. ¡Mayna sumaqya kuska kasqankuqa karqa!

Jesustaqa manaraq nacechkaptinmi Elisabet nirqaña ‘señorniy’ nispa. Chaymantapas Maria rimakuykuptinmi Elisabetpa wiksanpi wawa kuyurirurqa. Ichaqa chaymanta qipakunamanqa Mariawan Jesusqa manam chayna qawasqañachu karqaku, chaymantam qatiqninpi yachasun.