Mungelo Gabriyeli naamana kwaambila Mariya kuti uyoozyala mwana musankwa uuyakuulikwa kuti Jesu alimwi akuti mwana ooyu uyakuba Mwami mane kukabe kutamani, Mariya wabuzya kuti: “Ino eeci ciyookonzyeka buti mbwaanga mebo tandinalede amusankwa?”—Luka 1:34.

“Gabriyeli waingula kuti: “Muuya uusalala uyookusikila alimwi nguzu zya Mupatikampatila ziyooba alinduwe. Aboobo ooyo uyoozyalwa uyakwaambwa kuti uusalala, Mwana wa Leza.”—Luka 1:35.

Ambweni kutegwa agwasye Mariya kuusyoma mulumbe wakwe, Gabriyeli wayungizya kuti: “Bona! Elizabeta wamukowaako awalo wakamita mwana musankwa kubucembele, eelyo lino wakkwanya myezi iili cisambomwe, ooyo wakali kutegwa mukaintu uutazyali; nkaambo kunyina cintu caambwa a Leza citakonzyi kucitika.”—Luka 1:36, 37.

Mariya waazumina makani ngaamba Gabriyeli, mbubonya mbotubona mubwiinguzi bwakwe. Wakankamuka, ulaamba: “Bona, mebo ndili muzike wa Jehova! Akube mbubonya mbowaamba.”—Luka 1:38.

Mbwaaunkila buyo Gabriyeli, Mariya walibambila kuunka kuyooswaya Elizabeta, ooyo uukkala amulumaakwe Zekariya, munsi-munsi a Jerusalemu mucooko ca Judaya catulundulundu. Kuzwa kumunzi wa Mariya uuli mumunzi wa Nazareta, oolu ndweendo lukonzya kutola mazuba otatwe naa one.

Muciindi, Mariya wasika kuŋanda ya Zekariya. Naanjila muŋanda, waanzya musazinyina Elizabeta. Naacita boobo, Elizabeta wazula muuya uusalala, kumane waambila Mariya kuti: “Yebo ulilelekedwe akati kabamakaintu boonse, alimwi ulilelekedwe mwana uuli mwida lyako! Ino ndaba buti acoolwe cili boobu kuti banyina Mwami wangu baboole kulindime? Nkaambo bona! Mbondamvwida ijwi lyakwaanzya kwako mumatwi aangu, imwana uuli mwida lyangu waputauka akaambo kakukondwa kapati.”—Luka 1:42-44.

Mpoonya Mariya wavwiila amajwi aakulumba kuzwa ansi aamoyo ategwa: “Moyo wangu ulamulemeka Jehova amuuya wangu ulikondedwe kapati akaambo ka Leza Mufwutuli wangu, nkaambo wayeeya bucete bwamuzike wakwe. Lino bona! Kuzwa sunu, mazyalani oonse ayoondaamba kuti ndililelekedwe, nkaambo Singuzu wandicitila milimo mipati.” Tulakonzya kubona kuti nokuba kuti wapegwa coolwe cilibedelede, Mariya wapa bulemu boonse kuli Leza. Waamba kuti: “Zina lyakwe lilasalala, alimwi kumazyalani amazyalani, aabo bamuyoowa ulabafwida luzyalo.”—Luka 1:46-50.

Mumajwi aabusinsimi aasololelwa amuuya, Mariya wazumanana kutembaula Leza, ulaamba: “Wacita milimo mipati ajanza lyakwe; wabamwaya aabo ibalisumpula mumakanze aamyoyo yabo. Wabawisya baalumi basinguzu muzyuuno zyabo akusumpula bacete; wabapa zintu zyoonse zibotu aabo bafwide nzala, pele bavwubi wabatanda acinkwamaanza. Wamugwasya Israyeli mubelesi wakwe, akuyeeya luzyalo lwakwe, mbubonya mbwaakaambila bamataateesu, nkokuti Abrahamu alunyungu lwakwe mane kukabe kutamani.”—Luka 1:51-55.

Kwamyezi iitandila kuli yotatwe, Mariya wakkala a Elizabeta, cakutadooneka kamugwasyilizya mumvwiki eezyi zyamamanino Elizabeta nalaafwi kutumbuka. Eelo ncibotu kaka kuti bamakaintu aaba bobilo ibasyomeka alimwi ibamitide kwiinda mukugwasyigwa a Leza, bali antoomwe kuciindi eeci cabuumi bwabo!

Alimwi amubone mbwaakalemekwa Jesu noliba leelyo katanazyalwa. Elizabeta wakamwaamba kuti “Mwami wangu,” alimwi mwana iwakali mwida lyakwe ‘wakaputauka akaambo kakukondwa kapati’ mbwaakasikila buyo Mariya. Eeci ciliindene kapati ambobakamucita bamwi kumbele Mariya alimwi amwanaakwe ooyu ngwaakayumwide mwida, mbubonya mbotutiibone.