Ángel Gabriel wani María pi nakgalhi chatum skgata, nema nawanikan Jesús chu namapakgsinan putum kilhtamaku. Pero María kgalhskin: «¿La nakgantaxtu uma, xlakata nitu ktatalakgxtumima chixku?» (Lucas 1:34).

Ángel Gabriel wani: «Espíritu santo nalakgminan chu xlitliwakga Tiku xala talhman nalitlapayan xmastilenkg. Chu wa xlakata tiku nalakachin nalimapakuwikan santo, xKgawasa Dios» (Lucas 1:35).

Xlakata María nakanajla tuku aku wanilh, ángel Gabriel wan: «Elisabet tiku xalak mifamilia na nakgalhi xkgawasa, maski lina kata, uku xliʼakgchaxan papaʼ lima, tiku xlimapakuwikan pi nila xkgalhi skgata; xlakata putum tuku Dios wan kgantaxtu» (Lucas 1:36, 37).

Tuku likgalhtinan María limasiya pi kanajla tuku wani ángel: «¡Kaʼakxilhti! ¡Kskujni Jehová! Kakinkgantaxtunilh tuku lichuwinanita» (Lucas 1:38).

Akxni Gabriel an, María takaxa xlakata nalakgan Elisabet, nema tawi Zacarías. Xchik wi kxsipi Judea, lakatsu kJerusalén. Xlakata María lama kNazaret, max akgtutu o akgtati kilhtamaku lichan kxchik Elisabet.

Akxni María chan kxchik Zacarías, xakgatli Elisabet. Uma kilhtamaku, espíritu santo tlawa pi Elisabet nawani María umakgolh tachuwin: «¡Wix tiku tlakg sikulunatlawakanita nixawa amakgapitsi lakpuskatin, chu tasikulunatlawanit skgata nema lipina kmimpan! ¿Tiku klitaxtu xlakata namin kilakgapaxialhnan xtse kiMalana? Xlakata ¡kaʼakxilhti!, akxni kkgaxmatli pi chuwinanti, skgata nema klin kkimpan lipaxuw tatsuwilh» (Lucas 1:42-44).

María lu paxtikatsini chu wan: «Kilatamat malanki Jehová, chu kinaku lu lipaxuwa xlakata Dios kiLakgmaxtuna xlakata xla akxilhnit kskujni tiku nitu litaxtu. Chu [...] lata uku chu kilhtamaku nema aku mima, putum latamanin nawankgo pi xatasikulunatlawan akit, xlakata Tiku kgalhi litliwakga tlawanit tuku nila tamakanajla kimpalakata». Liwana tasiya pi maski Dios maxkinit lanka talakgalhaman, María ni lakpuwan pi xla xlakaskinka litaxtu. Wata wa Dios malanki. María wampara: «Xasanto xtukuwani chu tiku pekuanikgo putum kilhtamaku nakgalhikgo xtalakgalhaman» (Lucas 1:46-50).

Chu María limalanki Dios umakgolh tachuwin: «Litlawanit putum uma xatliwakga xmakxpan; tlawanit pi katsalakgolh putum tiku xtlankajwanankgo kxnakujkan. Kamapanunit mapakgsinanin kxlaktawilhkan, chu kamalankinit tiku taktujukgo; chu tiku xtsinksmakgolh kalimakgalhkgasalh tuku xatlan chu tiku lhuwa tuku xkgalhikgo nitu katamalakgachalh. Xla minit makgtaya kskujni Israel, chu akxni chuna tlawa lakapastaka tuku xmalaknunit. Xla malaknulh pi xʼama limasiyani talakgalhaman Abrahán chu xkamanan putum kilhtamaku» (Lucas 1:51-55).

María tamakgxtakga kxchik Elisabet akgtutu papaʼ chu lhuwa makgtaya akxni nina lakachin kskgata. Umakgolh chatiy lakpuskatin tiku ni makgxtakgkgo Dios nakgalhikgo kskgatakan xpalakata xtalakgalhaman Dios. ¡Lu lamakgtaya uma kilhtamaku xlakata akxtum wilakgo!

Kaʼakxilhti lilanka nema makgamakglhtinalh Jesús akxni nina xlakachin. Elisabet limapakuwilh «kiMalana», chu skgata nema xwi kxpan tatsuwilh o tasakgalilh akxni María chilh. Pero chuna la naʼakxilhaw alistalh, María chu xkgawasa nitlan kalikatsinika.