Ko oti ne fai atu te agelu ko Kapilielu ki te tamāfine ko Malia me ka fanau mai ne ia se tamaliki tagata, telā ka fakaigoa ki a Iesu kae ka pule mai e pelā me ko te Tupu ki te se-gata-mai, kae ne fesili atu penei a Malia: “E mafai pefea o tupu te mea tenei, me i a au e seki ‵moe aka eiloa mo se tagata?”—Luka 1:34.

Ne tali atu a Kapilielu: “Ka oko atu te agaga tapu ki luga i a koe, kae ka pulou a koe ne te ‵mana o te Atua Tafasili i te Maluga. Kae tenā eiloa te pogai ka taku ei te tamaliki telā ka fanau mai me e tapu, ko te Tama a te Atua.”—Luka 1:35.

Kāti ke fesoasoani atu ki a Malia ke talia ne ia tena fekau, ne toe fai atu a Kapilielu: “Kiloke! A tou kāiga ko Elisapeta ko faitama foki kae ko lomatua eiloa a ia, kae ko ono nei ana masina, ko te fafine telā ne fai pelā me e se afu; me e seai se folafolaga e se mafai ne te Atua o fai.”—Luka 1:36, 37.

Ne talia ne Malia a pati a Kapilielu, e pelā mo te mea e lavea atu ne tatou i tena tali. Ana muna: “Kiloke! Au ko te tamafine pologa a Ieova! Ke oko mai eiloa te mea tenei ki a au e ‵tusa mo au pati.”—Luka 1:38.

I te taimi eiloa ne fano keatea ei a Kapilielu, ne fakatoka a Malia o fano o āsi ki a Elisapeta, telā e ‵nofo fakatasi mo tena avaga, ko Sakalia, i te koga maugā o Iuta kae pili atu ki Ielusalema. Mai te fale o Malia i Nasaleta, kāti e tolu io me e fa aso te leva o te malaga tenei.

Fakamuli ifo, ne oko atu ei a Malia ki te fale o Sakalia. I te taimi ne ulu atu a ia ki ei, ne fakatalofa atu tena kāiga ko Elisapeta. I konā loa ne ‵fonu a Elisapeta i te agaga tapu, kae ne fai atu a ia penei ki a Malia: “Ke manuia koe i fāfine katoa, kae ke manuia foki a te tamaliki telā ka fanau mai ne koe! Ne maua pefea ne au te tauliaga tenei, ke asiasi mai ki a au te mātua o toku Aliki? Kae kiloke! I te lagonaga eiloa ne au tau fakatalofa, ko te mea eiloa ko gasue te pepe i toku moegatama mo te fiafia lasi.”—Luka 1:42-44.

Ne tali atu a Malia mo te loto fakafetai: “E tavae ne au a Ieova, kae e se mafai o taofi ne au toku loto fiafia ki te Atua toku Fakaola, me ko oti ne kilo ifo a ia ki te tulaga malalo o tena tamafine pologa. Kae kiloke! mai te taimi tenei o fano ki mua ka folafola atu ne kautama katoa i a au e fiafia, me ko oti ne fai ne te Atua malosi katoatoa a mea fakaofoofogia mō au.” E tiga eiloa te taulia o tou fafine, kae e mafai o lavea ne tatou me ne tavae katoatoa atu a Malia ki te Atua. “Tena igoa e ‵malu,” ko ana muna, “ke i luga i tino kolā e ma‵taku ki a ia a tena alofa fakamagalo mai te kautama e tasi ki te suā kautama.”—Luka 1:46-50.

Ne tumau eiloa a Malia o ‵viki atu ki te Atua i muna fakapelofeta kolā ne fakaosofia, ana muna: “Ko oti ne fai ne ia a galuega ‵mana ki ana lima; kae fakasalalau valevale ne ia a latou kolā e fia ‵sili i olotou loto. Ko oti ne tuku ifo ne ia ki lalo a tāgata takutakua mai i nofogaaliki kae fakama‵luga aka a tino ma‵lalo; ko oti ne fagai ne ia a tino fia‵kai ke ma‵kona i mea ‵lei kae afuli keatea ne ia a tino mau‵mea e aunoa mo ne mea. Ko oti ne vau a ia o fesoasoani ki tena tavini, ko Isalaelu, ke masaua ne latou tena alofa fakamagalo ki te se-gata-mai e pelā eiloa mo ana pati ki ‵tou tupuga, ki a Apelaamo mo tena fanau.”—Luka 1:51-55.

Ne ‵nofo fakatasi a Malia mo Elisapeta i se tolu masina, kae kāti ne fesoasoani malosi atu a ia ki a Elisapeta i vaiaso fakaotioti mai mua o fanau tou fafine. Ko oko eiloa i te ‵lei ke ‵nofo fakatasi te avā fāfine fakamaoni konei, kolā ne fai‵tama ona ko te fesoasoani o te Atua, i te taimi tenei o lā olaga!

Onoono la me ne fakaaloalo atu ki a Iesu a koi tuai foki loa o fanau mai a ia. Ne taku ne Elisapeta a ia ko “toku Aliki,” kae ne ‘gasue mo te fiafia’ tena tama i te taimi ne sae muamua mai ei a Malia. Ne ‵kese eiloa te mea tenā mai faifaiga fakamuli a nisi tino ki a Malia mo tena tama telā ka fanau mai, e pelā mo te mea ka matea atu ne tatou.