I muri iho i to te melahi Gaberiela parauraa i te vahine apî ra o Maria e e fanau mai oia i te hoê tamaiti o te topahia i te iˈoa o Iesu e o te faatere ei Arii e a muri noa ˈtu, ui maira Maria: “E nafea te reira e tupu ai, aita hoi au i taoto aˈenei i te hoê tane?”—Luka 1:34.

Pahono atura Gaberiela: “E vai mai te varua moˈa i nia ia oe e e tapoˈi mai te mana o te Teitei ia oe. No reira atoa te aiû o te fanauhia mai e parauhia ˈi moˈa e Tamaiti a te Atua.”—Luka 1:35.

No te tauturu paha ia Maria ia farii i ta ˈna poroi, na ô atoa ˈtura Gaberiela: “Inaha, ua hapû atoa o Elisabeta to fetii, e ono avaˈe to ˈna i teie nei, noa ˈtu e e ruhiruhia oia e ua matau te taata i te parau e eita ta ˈna tamarii e noaa, aore hoi e parau e ore e tia i te Atua ia faatupu.”—Luka 1:36, 37.

Farii ihora Maria i ta Gaberiela i parau. Teie hoi ta ˈna pahonoraa: “Inaha, e tavini vahine au na Iehova! Mai ta oe i parau, ia na reirahia mai ïa vau.”—Luka 1:38.

Reva ˈtura Gaberiela e faaineine ihora Maria ia ˈna no te haere e hiˈo ia Elisabeta, e noho ra e ta ˈna tane faaipoipo o Zekaria i pihai iho ia Ierusalema i te tuhaa fenua mouˈa o Iudea. E toru aore ra e maha mahana e tae ai Maria i ǒ, mai Nazareta ˈtu.

Tae atura Maria i te fare o Zekaria. I to ˈna tomoraa ˈtu, aroha ˈtura oia ia Elisabeta to ˈna fetii. Î ihora Elisabeta i te varua moˈa, e na ô maira ia Maria: “O oe te vahine haamaitai-rahi-roa-hia aˈe o te mau vahine atoa e ia haamaitai te Atua i te aiû i roto i to opu! O vai hoi au e haere mai ai te metua vahine o to ˈu Fatu e hiˈo ia ˈu? Inaha hoi, i to ˈu iho â faarooraa ia oe i te aroharaa mai, hauti ihora te aiû i roto i to ˈu opu no te oaoa.”—Luka 1:42-44.

Pahono atura Maria ma te aau mauruuru: “Te arue nei au ia Iehova, e te oaoa roa nei to ˈu aau i te Atua to ˈu Faaora, ua hiˈo mai hoi oia i ta ˈna tavini vahine, noa ˈtu to ˈna riirii. Inaha hoi, mai teie atu nei e faaite haere ai te mau uˈi atoa e ua haamaitaihia vau, e ohipa faahiahia hoi ta te Atua puai i rave no ˈu.” A hiˈo na, noa ˈtu e ua farii-maitai-hia oia e te Atua, o te Atua ta Maria i faahanahana. “E iˈoa moˈa to ˈna,” ta Maria ïa i parau, “e e aroha hamani maitai oia i te feia e mǎtaˈu ra ia ˈna i tera uˈi, i tera uˈi.”—Luka 1:46-50.

Arue faahou atura Maria i te Atua ma teie mau parau i tohuhia e te Atua: “Ua haa oia ma to ˈna rima puai. Ua haapurara i te feia teoteo i roto i te mau opuaraa a to ratou aau. Ua huri oia i te feia mana i raro i to ratou terono e ua faateitei i te feia riirii. Ua horoa oia i te mau mea maitatai na te feia veve e ua faahoˈi i te feia e faufaa ta ratou ma te taoˈa ore. Ua tauturu oia ia Iseraela ta ˈna tavini, a faaite ai e e haamanaˈo oia i ta ˈna parau fafau e aroha hamani maitai ia Aberahama e to ˈna huaai e a muri noa ˈtu, mai ta ˈna i parau i to tatou mau tupuna.”—Luka 1:51-55.

Piri i te toru avaˈe to Maria faaearaa i ǒ Elisabeta, a tauturu ai ia Elisabeta i te mau hebedoma hopea o to ˈna hapûraa. Mea tano roa i amui ai na vahine haapao maitai, tei hapû maoti te tauturu a te Atua, i tera taime o to raua oraraa!

A tapao atoa na e ua haamaitaihia Iesu hou to ˈna fanauraa. Ua pii Elisabeta ia Iesu “to ˈu Fatu,” e ua “hauti” te aiû i roto i to ˈna opu “no te oaoa” i to Maria aroharaa ˈtu ia Elisabeta. Mea taa ê roa te huru o te tahi atu mau taata i nia ia Maria e ta ˈna aiû i roto i te opu i muri aˈe, mai ta tatou e ite mai.