Katapos sumatan ni anghel Gabriel an daraga nga hi Maria nga mag-aanak hiya hin lalaki nga ngangaranan hin Jesus ngan magigin Hadi ha kadayonan, hi Maria nagpakiana: “Paonan-o ini mahitatabo nga waray man ako bana?”—Lucas 1:34.

Hi Gabriel bumaton: “An baraan nga espiritu maabot ha imo ngan an gahum han Gihitaasi malandong ha imo. Tungod hito, ini nga matatawo tatawagon nga baraan ngan Anak han Dios.”—Lucas 1:35.

Basi buligan hi Maria nga tumoo ha iya mensahe, hi Gabriel nagdugang: “An imo paryente nga hi Elizabeth unom ka bulan na yana nga burod, bisan kon lagas na ngan nasiring an mga tawo nga baog hiya, kay waray kapahayagan han Dios nga diri matutuman.”—Lucas 1:36, 37.

Tinoo hi Maria ha ginsiring ni Gabriel, sugad han aton makikita ha iya baton: “Iini ako, an kan Jehova uripon nga babaye! Matuman unta ha akon an imo ginsiring.”—Lucas 1:38.

Pagbaya ni Gabriel, nag-andam hi Maria basi bisitahon hi Elizabeth nga naukoy kaupod han iya bana nga hi Sakarias. An ira balay hirani ha Jerusalem ha bakilid nga dapit ha bungtod han Judea. Tikang kanda Maria ha Nazaret, an biyahe ngadto mga tulo o upat ka adlaw.

Pag-abot ni Maria ha balay nira Sakarias, sinulod hiya ngan nangumusta kan Elizabeth. Hito nga takna, hi Elizabeth napuno han baraan nga espiritu, ngan nagsiring kan Maria: “Darayawon ka ha ngatanan nga kababayin-an, ngan darayawon an bunga han imo tiyan! Kay ano nga nagkaada ako hini nga pribilehiyo nga bisitahon han nanay han akon Ginoo? Kay pakabati ko han imo pangumusta, an bata ha akon tiyan nagkiwa tungod han daku nga kalipay.”—Lucas 1:42-44.

Katapos kinasingkasing nga nagpasalamat hi Maria: “Gindadayaw ko hi Jehova, ngan diri mapugngan han akon kasingkasing an daku nga kalipay ha Dios nga akon Paratalwas, tungod kay nakita niya an ubos nga kahimtang han iya uripon nga babaye. Ngan tikang yana tatawagon ako nga malipayon han ngatanan nga henerasyon kay an gamhanan nga Dios nagbubuhat hin mga urusahon para ha akon.” Tigamni nga bisan pa han pag-uyon nga nakarawat ni Maria, iginhatag niya ha Dios an ngatanan nga kadungganan. Hiya nagsiring: “Baraan an iya ngaran, ha ngatanan nga panahon nagpapakita hiya hin kalooy ha mga nahahadlok ha iya.”—Lucas 1:46-50.

Hi Maria padayon nga nagdayaw ha Dios pinaagi hin giniyahan ngan matagnaon nga mga pulong: “Naghihimo hiya hin gamhanan nga mga buhat pinaagi han iya butkon, ngan iya ginpapapatlaag ha higrayo nga lugar an mga mapahitas-on an kasingkasing. Iya ginpapalusad tikang ha mga trono an gamhanan nga mga tawo ngan ginpapahitaas an mga ubos, iya ginbubusog hin mag-opay nga butang an mga nagugutom, ngan ginpapabaya nga waray dara an mga rikohanon. Ginbubuligan niya an Israel nga iya surugoon basi ipakita an kalooy ha kadayonan, sugad la han iya ginsiring ha aton kaapoy-apoyan, kan Abraham ngan ha iya katulinan.”—Lucas 1:51-55.

Inukoy hi Maria kanda Elizabeth hin mga tulo ka bulan, ngan sigurado nga nakabulig gud hiya durante han ultimo nga mga semana han pagburod ni Elizabeth. Makalilipay gud nga inin duha nga matinumanon nga babaye nga pariho burod pinaagi han bulig han Dios, magkaupod durante hini nga takna han ira kinabuhi!

Ngan tigamni an pagpasidungog nga iginhatag kan Jesus bisan antes pa hiya matawo. Gintawag ni Elizabeth hi Jesus nga “akon Ginoo,” ngan an iya iginbuburod “nagkiwa tungod han daku nga kalipay” han pag-abot ni Maria. Iba gud ini ha magigin pagtratar han mga tawo kan Maria ngan ha iya ig-aanak nga bata, sugad han aton mahibabaroan.