Ka tsʼoʼok u yaʼalik le ángel Gabriel tiʼ María yaan u síijil u chan hijo yéetel yaan u tsʼáaik u kʼaabaʼt Jesusoʼ, tu yaʼalaj: «¿Bix túun jeʼel u yúuchul lelaʼ? Si teneʼ maʼ yanchajaʼan mix baʼal in wil yéetel mix juntúul xiibiʼ» (Lucas 1:34).

Gabrieleʼ tu núukajtiʼ: «Kiliʼich muukʼ kun taal ta wóokʼol, yéetel u páajtalil le j-Sen Kaʼanaloʼ yaan u pixkech yéetel u boʼoy. Le oʼolaleʼ, le chaambal kun síijiloʼ yaan u yaʼalaʼaltiʼ kiliʼich, u Paal Dios» (Lucas 1:35).

Maʼ xaaneʼ utiaʼal u creertik María le baʼax ku yaʼaliktiʼoʼ, tu yaʼalaj xan tiʼ: «A láakʼ Elisabet xaneʼ, kex chʼijaʼaneʼ tsʼoʼok u pʼáatal embarazadail; beoraaʼ le koʼolel ku yaʼalaʼal maʼ tu páajtal u yantal u paalaleʼ, seis meses pʼáatak embarazadail, tumen tuláakal baʼax ku yaʼalik Dioseʼ ku béeytal» (Lucas 1:36, 37).

Maríaeʼ tu kʼamaj le baʼax aʼalaʼabtiʼ tumen Gabrieloʼ, le oʼolal tu yaʼalaj: «¡U palitsilen Jéeoba! Úuchukten jeʼel bix ta waʼaloʼ». Ka lukʼ le ángel tu yiknaloʼ (Lucas 1:38).

Le ka lukʼ Gabriel tu yiknaleʼ, Maríaeʼ joʼopʼ u líiʼskuba utiaʼal u bin u xíimbalt Elisabet. Letiʼ yéetel u yíichameʼ tiʼ kajaʼanoʼob tu witsiloʼob Judea, naatsʼ tiʼ Jerusaleneʼ. Desde tu yotoch María yaan tu kaajil Nazaret tak tu yotoch Elisabeteʼ yaan kex óoxpʼéel wa kanpʼéel kʼiin u viajeil.

Maríaeʼ kʼuch tu yotoch Zacarías. Ka ookeʼ tu tsikaj Elisabet, u láakʼtsil. Elisabet túuneʼ chuʼup yéetel kiliʼich muukʼeʼ ka tu yaʼalaj tiʼ María: «¡Kiʼikiʼtʼantaʼanech tumen Dios ichil tuláakal le koʼoleloʼoboʼ, yéetel kiʼikiʼtʼantaʼan le chaambal yaan ta jobneloʼ! Tumen ¿máaxen utiaʼal ka yanakten u jatsʼuts páajtalil u taal u xíimbalten u maama in Yuumtsil? ¡Ile! Ka kʼuch tin xikin u juum a tʼaaneʼ, le chaambal yaan tin jobneloʼ, síitʼnaj yéetel kiʼimak óolal» (Lucas 1:42-44).

Maríaeʼ tu núukaj: «Teneʼ kin nojbeʼenkúuntik Jéeoba, yéetel in puksiʼikʼaleʼ ku chuʼupul yéetel kiʼimak óolal tu yoʼolal Dios in Salvador; tumen letiʼeʼ tsʼoʼok u paktik u yóotsilil u x-palitsil. ¡Ile! Desde bejlaʼeʼ, tuláakal máak ken u yaʼal kiʼimak in wóol, tumen le Dios yaan nojoch páajtalil tiʼoʼ tsʼoʼok u beetik nukuch baʼaloʼob tin woʼolal». Jeʼex k-ilkoʼ, Maríaeʼ tu tsʼáaj u nojbeʼenil tiʼ Dios yoʼolal u chan hijo kun antaloʼ, maʼ tu kaxtaj u nojbeʼenil letiʼiʼ. Letiʼeʼ tu yaʼalaj: «kiliʼich u kʼaabaʼ, mantatsʼ ku chʼaʼik óotsilil tiʼ le máaxoʼob ku chʼaʼikoʼob saajkilil tiʼoʼ» (Lucas 1:46-50).

Maríaeʼ seguernaj u tsʼáaik nojbeʼenil tiʼ Dios yéetel le tʼaanoʼobaʼ: «Letiʼeʼ yéetel u muukʼil u kʼabeʼ tsʼoʼok u beetik nukuch baʼaloʼob; tsʼoʼok u kʼiʼitbesik le máaxoʼob kaʼanal u yichoʼob yoʼolal baʼax ku tuklikoʼob ichil u puksiʼikʼaloʼoboʼ. Tsʼoʼok u luʼsik tu tronoʼob le máaxoʼob yaan páajtalil tiʼoboʼ, yéetel tsʼoʼok u tsʼáaik kaʼanal le máaxoʼob óotsiloʼoboʼ; tsʼoʼok u naʼajkúuntik yéetel baʼaloʼob maʼalobtak le máaxoʼob wiʼijoʼoboʼ, baʼaleʼ tsʼoʼok u túuxtik le j-ayikʼaloʼob yéetel mix baʼaloʼ. Tsʼoʼok u taal u yáant Israel u palitsil utiaʼal u kʼaʼajsik yaan u yeʼesik chʼaʼ óotsilil mantatsʼ, jeʼex u yaʼalmil tiʼ k-úuchben láakʼtsiloʼob, tiʼ Abrahán bey xan tiʼ u chʼiʼibal» (Lucas 1:51-55).

Maríaeʼ pʼáat kex óoxpʼéel meses tu yiknal Elisabet, maʼ xaaneʼ jach tu yáantaj teʼ tu tsʼook semanaʼob taʼaytak u síijil u chan hijo Elisabetoʼ. Bukaʼaj wal úuchik u paklan líiʼsik u yóol le kaʼatúul koʼoleloʼob áantaʼaboʼob tumen Dios utiaʼal ka síijik u hijoʼobaʼ.

Tuukulnakoʼon tiʼ le nojbeʼenil tsʼaʼab tiʼ Jesús táanil tiʼ u síijiloʼ. Elisabeteʼ tu yaʼalajtiʼ «in Yuumtsil», tsʼoʼoleʼ le ka ook María tu yotochoʼobeʼ le chaambal yaan tu jobneloʼ «síitʼnaj yéetel kiʼimak óolal». Ka máan kʼiineʼ yaanal bix tratartaʼabik María yéetel u chan hijo maʼ síijik, jeʼex ken k-il tuláakʼ xookoʼoboʼ.