Maria ye nyɔhiɔ etɛ ngɛ Elizabet ngɔ. Amlɔ nɛ ɔ, e piɛ bɔɔ nɛ Elizabet ma fɔ. Se be su nɛ Maria kɛ lɛ maa ye sɛ nɛ e maa kpale hia blɔ gagaa kɛ gu Yudea yoku ɔmɛ a nɔ kɛ ho Nazaret ya. Eko ɔ, ngɛ nyɔhiɔ ekpa se ɔ, Maria hu ma fɔ binyumu.

Benɛ Maria je ɔ, e kɛ we nɛ Elizabet fɔ. Nɔ tsuaa nɔ bua jɔ kaa Elizabet fɔ ngɛ tue mi jɔmi mi, nɛ nɔ́ ko kɔ we e kɛ bimwɔyo ɔ tsuo a he! Benɛ Elizabet ngɔ e bi ɔ kɛ tsɔɔ e weku li kɛ e paka mi bimɛ ɔmɛ ɔ, mɛ tsuo a kɛ lɛ nya.

Mlaa nɛ Mawu kɛ ha Israel bi ɔmɛ ɔ tsɔɔ kaa, ke yo ko fɔ binyumu nɛ jokuɛ ɔ ye ligbi kpaanyɔ ɔ, e sa nɛ a po lɛ. A woɔ jokuɛ ɔmɛ biɛ ngɛ jamɛ a be ɔ nɔuu mi. (3 Mose 12:2, 3) Weku li ɔmɛ to kaa a kɛ Zakaria biɛ maa wo jokuɛ ɔ. Se Elizabet kplɛɛ we, nɛ e de ke: “Dɛbi! A ma tsɛ lɛ Yohane.” (Luka 1:60) Mo kai kaa bɔfo Gabriel de kaa e sa nɛ a wo jokuɛ ɔ biɛ ke Yohane.

E weku li ɔmɛ kɛ nihi nɛ ngɛ lejɛ ɔ a bua jɔɛ jamɛ a biɛ ɔ he, lɔ ɔ he ɔ, a de lɛ ke: “Nɔ ko tsa be o weku ɔ mi nɛ a tsɛɛ lɛ jã.” (Luka 1:61) Lɔ ɔ he ɔ, a pee okadi kɛ bi Zakaria ke mɛni biɛ e suɔ nɛ e kɛ maa wo e binyumu ɔ. Zakaria ha nɛ a ha lɛ sleeti, nɛ e ngma ngɛ nɔ ke, “E biɛ ji Yohane.”​​—Luka 1:63.

Benɛ Zakaria ngma biɛ ɔ kɛ ha mɛ pɛ nɛ e bɔni munyu tumi ekohu. O ma kai kaa benɛ bɔfo ɔ ya de lɛ ke e yo Elizabet ma fɔ binyumu ɔ, e he we yi, nɛ lɔ ɔ he je nɛ e nya ma a nɛ. Se benɛ Zakaria nya bli nɛ e bɔni munyu tumi ɔ, e kpɔ mi bi ɔmɛ a nya kpɛ a he nɛ a bi a sibi ke: “Mɛni nɔmlɔ po jokuɛ nɛ ɔ ma ba pee” hwɔɔ se? (Luka 1:66) Ni ɔmɛ na kaa Mawu lɛ ha nɛ a wo jokuɛ ɔ biɛ ke Yohane ɔ nɛ.

Kɛkɛ nɛ mumi klɔuklɔu ɔ ba Zakaria nɔ nɛ e de ke: ‘Nyɛ ha wa je Yehowa, Israel Mawu ɔ yi. Ejakaa e ba piɛɛ e ma a he, nɛ e ha nɛ a ye a  he. E je kpɔlɔ kpanaa nɛ ji e tsɔlɔ David nina ha wɔ.’ (Luka 1:68, 69) Nyɔmtsɛ Yesu nɛ a fɔ we lɛ lolo ɔ he munyu nɛ e ngɛ tue benɛ e de ke “kpɔlɔ kpanaa” a nɛ. Zakaria de kaa kɛ gu Yesu nɔ ɔ, Mawu “ma kpɔ wɔ kɛ je wa he nyɛli ɔmɛ a dɛ mi, konɛ wa sɔmɔ lɛ ngɛ he jɔmi mi, nɛ waa hi klɔuklɔu, nɛ waa pee nɔ́ nɛ da ngɛ e hɛ mi wa wami be ɔ tsuo.”​​—Luka 1:74, 75.

Zakaria gba ngɛ e bi ɔ he ke: ‘Mo, ye bi, a ma tsɛ mo Hiɔwe No ɔ gbalɔ. O maa sɛ Yehowa hlami, nɛ o ma dla e blɔ ɔ kɛ to lɛ. O ma de e ma a ke, Mawu maa ngɔ a he yayami kɛ pa mɛ, nɛ e ma he a yi wami, ejakaa e mi mi jɔ, nɛ e naa nɔ mɔbɔ. E ma kpɔ wɔ kaa bɔ nɛ mɔtu pu la fieɔ diblii kɛ yaa se ɔ. E ma kpɛ kɛ je hiɔwe ha nihi tsuo nɛ hii si ngɛ gbenɔ hɔ̃ diblii mi, nɛ e maa tsɔɔ wɔ blɔ kɛ ba he jɔmi blɔ ɔ nɔ.’ (Luka 1:76-79) Gbami nɛ ɔ woɔ nɔ he wami nitsɛ!

Be nɛ ɔ mi ɔ, Maria ya su Nazaret. Nihi le kaa e sɛ we gba si himi mi lolo. Ke a na kaa hɔ ngɛ e he ɔ, mɛni a maa pee lɛ?