Dung tolu bulan si Maria di jabu ni si Elisabet, mulak ma ibana tu jabuna di Nasaret. Ai tubu nama anakna onom bulan nai.

Ndang leleng dung mulak si Maria, partus ma si Elisabet. Las do rohana ala sehat do ibana dohot poso-posona i! Dipatuduhon ibana ma poso-posona i tu tetanggana dohot tu keluargana. Gabe rap marlas ni roha ma nasida.

Mangihuthon Patik ni Debata tu halak Israel, ingkon disunat do sahalak poso-poso dung ualu ari ibana tubu. Laos di tingki i ma dibahen goarna. (3 Musa 12:2, 3) Na deba mandok songon goar ni amangna ma dibahen goarna. Alai didok si Elisabet ma, “Ndang i! Si Johannes do bahenon goarna.” (Lukas 1:60) Taingot ma nunga didok si Gabariel hian na ingkon si Johannes bahenon goar ni poso-poso i.

Alai didok tetangga dohot keluargana i ma, “So adong sisolhotmu na margoar sisongon i.” (Lukas 1:61) Marhite tanda mamangke tangan, disungkun nasida ma tu si Sakaria ise do bahenon goar ni anakna i. Dipangido si Sakaria ma papan jala disurat ma, “Si Johannes do goarna.”​—Lukas 1:63.

Laos satongkin i, boi ma si Sakaria mangkatai muse. Ra, diingot hamu dope na mambahen si Sakaria ndang boi mangkatai. Ai ndang porsea ibana tu hata ni suru-suruan i na laho tubuan anak si Elisabet. Alani i, tingki boi muse si Sakaria mangkatai, longang ma angka tetanggana. Diantusi nasida ma, Debata do na manuru nasida mambahen goarna si Johannes. Sungkun-sungkun ma nasida, ninna ma, “Na gabe songon dia do annon dakdanak on?”​—Lukas 1:66.

Digohi tondi parbadia ma si Sakaria, ninna ma, “Pinuji ma Jahowa, Debata ni Israel. Ai nunga diparrohahon Ibana bangsona jala dipalua Ibana nasida. Dilehon Ibana do tu hita sipalua na marhuaso na sian pinompar ni  si Daud, naposona.” (Lukas 1:68, 69) “Sipalua na marhuaso” na nidokna disi, i ma Tuan Jesus na laho tubu. Didok si Sakaria, marhite ibana do hita “dipalua Debata sian tangan ni angka musu, lehononna ma tu hita hasangapon asa unang adong biar ni roha marhobas tu Ibana, alai asa marsihohot jala mangulahon na sintong di adopanna saleleng ni ngolunta”.​—Lukas 1:74, 75.

Taringot tu anakna i, dipaboa si Sakaria do, “Anggo ho anakku, goaron ma ho panurirang ni Natumimbul i. Ai mardalan ma ho di jolo ni Jahowa laho paradehon angka dalanna. Lehononmu ma pangantusion tu bangsona taringot tu haluaon marhite manesa dosa ni nasida, ala denggan basa ni Debata tu hita. Marhite denggan ni basana i, bahenonna ma binsar sinondang sian surgo tu hita. Gabe disondangi ma angka halak na hundul di haholomon dohot na nilinggoman ni hamatean, jala ditogu-togu ma hita di dalan hadameon.” (Lukas 1:76-79) Tontu patoguhon roha do hata on!

Nunga sahat si Maria di Nasaret. Jala nunga mardenggan pamatang ibana hape ndang marhasohotan dope. Alani i, songon dia ma bahenonna?