Élisabeth a ntoo fo’o nkômesane ya biaé. Marie, évuvumane jé, a tabeya a nye tañe ngon éla. Éyoñe ji, Marie a nga yiane kandan a nye, a yiane ke beta dulu mfa’a ya nord na, a bulane nda jé, e Nazareth. A li’iya nye ve ngon ésaman asu ya na a biaé mone wé.

Éyoñe Marie a keya, nde Élisabeth a biaé. Avale mbamba jame na, abialé da te lôt abeñ, a na, ba mon be ne mvo’é! Éyoñ Élisabeth a liti bivuvumane bié a bôte ba be be be too vôme wua ôyôme mone wé, bese be ne mevak a nye.

Atiñe Zambe a nga ve bone b’Israël e mbe e jô’ô na, ba yiane tyi’i mona fam a ndôme bialé atyel mvuse melu mwom, a ve fe nye éyôlé. (Lévitique 12:2, 3) Abui bôte da simesane na ba yiane ve mon éyôlé ésa wé Zacharie. Ve, Élisabeth a kobô a jô’ô na: “Sa nalé; jôé dé de aye bo Jean.” (Luc 1:60) Te mia vuane na ange Gabriel a nga jô na, ba ye loene mone na Jean.

Bivuvumane bié a bôte ba be be be too vôme wua ba kañese ki ajô te, be na: “Bôt mia be be mi vuman, môte wua ya été a nji bo jôé te.” (Luc 1:61) Nde ba ve’ele Zacharie mo a sili nye jôé a kômbô yôlé mon. Zacharie a sili jôme ya tili, a yalane na: “A ne jôé na Jean.”​—Luc 1:63.

A teme na asimba ve boban, Zacharie a nga beta kobô! Mia beta simesane na, a nga ku mvuk amu a nga sôô mam ange Gabriel a nga jô nye: na, Élisabeth a ye nyoñ abum. Nde, éyoñe Zacharie a nga kobô di, bôte ba bômane nye be ne fe’e ne vema, a ba sili bebiene na: “Mone nyô a ye bo za aka’a monô?” (Luc 1:66) Be nga yene wo Yéhôva avale be nga ve Jean éyôlé jé.

 Éyoñ éte mbamba nsisim a jaé Zacharie nlem ne lut, ane a jô na: “Ebotan a Tate, Zambe ya Israël; Amu a nga zu yene bôte bé, a nyii be. A nga bete môt a ne ngule ya nyii bia a so nda bôt mbo ésaé wé David.” (Luc 1:68, 69) Bifia “môt a ne ngule ya nyii” bia fombô Tate Yésus, a ngenane te bialé. Zacharie a kô’ôlane na, a ngala’ane ya Nyô ate, Zambe “a ye bo bia na, éyoñ a maneya va bia mo me bôt be asiñe bia, bi aye bo nye bisaé, te ko woñ, a tabe mfuban a zôsô asu dé melu mese bi to.”​—Luc 1:74, 75.

Zacharie a kuli ajô a lat a mone wé a jô’ô na: “Wo, mon, be aye loene wo nkulu mejô ya Môt a Dañe bôte bese Yôp: amu wo wo aye ke Tate ôsu, a kôme nye mezen; wo aye ye’ele bôte bé be yem ajô ya ényiñ mfa’a ya njamane mam abé map, amu Zambe wongan a ne mvam nlem, ajô te melende me tyé me aye so yôp a zu be bia, a faé bôt be to dibi a bebé awu, éfufup; a liti mebo mangan zen é ne mvo’é.” (Luc 1:76-79) Mame Zacharie a jô ma yiane ve bôte nlem avak.

Nté ôte ôse wu, Marie, nnye ate a ngenane teke luk, a kui nda jé e Nazareth. Jé ja ye kui nye éyoñe da ye yené ne ngeññ na, a ne abum?