Ijine tro hë Elisabeth a hnaho. Köni treu hë ne ce lapa eahlo me Maria trejine me eahlo. Enehila, Maria a troa iahni me eahlo me bëeke koi hnalapa. Nge tha fene tro kö la troa tro qa cili a tro Nazareta. Ketre, sikisi pe hi lao treu matre hnaho pi fe Maria.

Tha qea kö thupene la Maria a tro, nge hnaho pi Elisabeth. Ketre madrine ka tru laka, pëkö ejolene la kola hnaho hnei Elisabeth, nge egöcatre hi nyidro! Nge ame la eahlo a mama sai nekönatr kowe la itre ka lapa ezi eahlo, me itre sinee i eahlo, angatr ce madrine jë.

Hnei Akötresieti lo hna amekötin hnine la Trenge Wathebo ka hape, tro la nöjei atre Isaraela ka hnaho nekö trahmany, a xötrehatrei nyën eitre lao drai thupene la kola ase hnahon, nge tro fe a ati ëje i nyën. (Levitiko 12:2, 3) Matre itre xan a mekune ka hape, tro la nekönatr a xome la ëje i Zakaria. Ngo Elisabeth a ewekë draië jë me hape: “Waea, troa hë nyën, Ioane.” (Luka 1:60) Mekune pala hi eahlo lo hna qaja hnei Gaberiela ka hape, Ioane la ëje i nyën.

Matre hnene la itre ka lapa ezi nyidro me itre sinee hna sa ka hape: “Pëkö atrene la lapa i eö hna hëne tun.” (Luka 1:61) Angatr a nyiqane köjaköja jë koi Zakaria troa atre la ëjene la nekönatr. Zakaria a sipone jë la ketre ewekë ne cinyihan, me cinyianyine ka hape: “Ioane la ëje i nyën.”—Luka 1:63.

E cili, ithanata hmaca ju hi Zakaria, ke ka hum angeice lo, pine angeice tha mejiun kowe la angela laka, tro Elisabeth a hnaho. Matre ame hë la kola ithanata hnei Zakaria, sesëkötre ju hi la itre ka lapa ezin, nge angatr a ihnyingënekeune ka hape: “Nemene jë la pengöne la nekönatr cili elany?” (Luka 1:66) Mama cile hë koi angatr la ime i Akötresie ngöne la aqane ati ëje i Ioane.

 Thupene lai, tiqa pi hi Zakaria hnei uati hmitrötr matre öni angeic: “Epi atrunyi Iehova jë, Akötresi angetre Isaraela, ke hnei nyidrëti hna wangatrune la nöje i nyidrë, me amelene ej. Nge hnei nyidrëti hna hnëkëne la ketre jian ne iamele qa ngöne la hnalapa i Dravita, hlue i nyidrë.” (Luka 1:68, 69) Ame la angeic a qeje “jian ne iamele,” kolo hi a qeje Iesu Joxu, ngacama tha hna hnaho nyidrëti petre kö. Matre öni Zakaria ka hape, jëne Iesu, tro Akötresie a “thepe së qaathene la itre ithupëjia, [matre] ijiji së [ . . . ] troa nyihlue i nyidrëti hnyawa, me mele nyipici me meköti o drai qëmeke i nyidrë.”—Luka 1:74, 75.

Nge ame göi neköi angeic, öni Zakaria: “Ngo ame pë hë hmunë, nekönatr, tro hë hmunë a perofeta ne la Akötresie ka Draië Catr, nge tro hmunë a tro qëmeke i Iehova me hnëkëne la gojenyi koi nyidrë, me qaja ka hape, tro Akötresie a amele angatr, jëne la hna köletrije la itre ngazo i angatr ke tru la utipine ne la Akötresi së. Nge tro la utipine cili a uti koi së tune la kaqa ne lai, matre thinane la itre ka lapa ngöne la gaa mit, me ngöne la iahnue ne la mec, me thinane la hnë lue ca së ngöne la gojenyi ne la tingeting.” (Luka 1:76-79) Ithuecatre ka tru la hna perofetane celë!

Ngöne la ijine cili, Maria hë e Nazareta nge tha ka faipoipo pala kö angeic. Matre nemene jë la ka troa traqa koi angeic e mama jë la upune i angeic?