Elisabet imemby potaitéma. María ou kuri opyta hendive tres méserupi. Péro koʼág̃a haʼe ojedespedi Elisabétgui ha oho jey iválle Nazarétpe, opytáva nórte gotyo Judéagui. Maríape ofalta gueteri seis méserupi imemby hag̃ua.

María oho riremínte, Elisabet imembýma. Enterovénte ovyʼajoa haʼe oĩ porã rupi ha pe mitã hesãi haguére. Elisabet ohechauka imembyʼi umi ivesíno ha ihentekuérape, ha enterovénte ovyʼaiterei hendive.

Ñandejára Léi heʼi vaʼekue umi mitãkuimbaʼe oñesirkunsida vaʼerãha ocho día onase haguépe, ha ojaprovecha jepi avei upe okasión oñembohéra hag̃ua pe mitã (Levítico 12:2, 3). Oĩ umi heʼíva Elisabet memby oñembohéra vaʼerãha itúvaicha, Zacarías. Péro Elisabet heʼi chupekuéra: “¡Nahániri!, rombohérata Juan” (Lucas 1:60). Oiméne ñanemanduʼa ánhel Gabriel heʼi hague pe mitã héra vaʼerãha Juan.

Péro iñamigokuéra ha umi ipariéntepe ndogustái upéva, ha heʼi hikuái: “Ndaipóri ningo pene hentekuéra apytépe ni peteĩ hérava upéicha” (Lucas 1:61). Upémarõ oseñea hikuái itúvape oporandu hag̃ua chupe mbaʼéichapa ombohérata itaʼýra. Zacarías ojerure peteĩ tavlaʼi ha oskrivi hese: “Hérata Juan” (Lucas 1:63).

Upepete, peteĩ milágro rupive Zacarías oñepyrũ jey oñeʼẽ. Oiméne ñanemanduʼa haʼe opyta hague iñeʼẽngu ndoroviái haguére pe ánhel heʼírõ guare Elisabet imembytaha. Zacarías oñepyrũvo oñeʼẽ, enterove ivesíno oñesorprende ha oñeporandujoa: “¿Mbaʼe apoharãpa oiméne ko mitã?” (Lucas 1:66). Haʼekuéra ohechakuaa Ñandejára ointerveni hague oñembohéra hag̃ua pe mitã.

Upe moméntope Zacarías henyhẽ espíritu sántogui, ha heʼi: “Toñemombaʼeguasúke Jehová Israel Járape, haʼe oiporiahuvereko haguére  ipuévlope ha omosãso rupi chupekuéra. Haʼe omopuʼã ñandéve g̃uarã peteĩ salvadór ipoderósova, hembiguái David rógape” (Lucas 1:68, 69). Heʼívo “salvadór ipoderósova”, oñeʼẽ kuri Jesús rehe, jepe upérõ neʼĩra gueteri onase. Zacarías heʼi avei mbaʼépa oikóta upe salvadór rupive: “Ñandejára ñandepeʼa rire ñane enemigokuéra poguýgui, ohejáta ñamombaʼeguasu chupe kyhyjeʼỹre, jerovia teetépe ha tekojojápe jaikove aja pukukue” (Lucas 1:74, 75).

Upe rire Zacarías heʼi itaʼýrare: “Ha nde katu che raʼymi reikóta Ñandejára Ijojahaʼỹva profétaramo, rehóta rupi Jehová renonderã reprepara hag̃ua haperã. Reikuaaukáta ipuévlope haʼe osalvataha chupekuéra operdonávo ipekadokuéra imbaʼeporãitereígui hendivekuéra. Haʼe ñandeporiahuvereko rupi, jahecháta peteĩ mbaʼerendy oúva yvágagui ha omimbíva koʼẽjúicha ohesape hag̃ua umi oguapývape pytũmbýpe pe ñemano ojahoʼihápe chupekuéra. Ko mbaʼerendy ohechaukáta ñandéve mbaʼépa jajapo vaʼerã ñandepyʼaguapy hag̃ua” (Lucas 1:76-79). ¡Ajépa iporãite ko profesía!

Upe tiémpope g̃uarã María oĩ jeýma hógape Nazarétpe. ¿Mbaʼépa oikóta ojekuaa vove hese hyeguasuha omendaʼỹre?