Vijiji Elizabẹti tọn ko sẹpọ. Hẹnnumẹ etọn Malia ko nọ e dè na osun atọ̀n. Todin, ojlẹ sọ̀ na Malia nado dọ e yì whedenu na Elizabẹti bo zingbejizọnlin gaa lẹkọyi owhé etọn gbè to Nazalẹti. To nudi osun ṣidopo gblamẹ, ewọ lọsu na jivi.

Ojlẹ kleun de to whenue Malia yì godo, Elizabẹti jivi. Ayajẹ nankọ die nado mọdọ e jivi awuyẹyẹ-afọyẹyẹ bọ ewọ po ovi lọ po to ganji! To whenue Elizabẹti do viyẹyẹ etọn hia kọmẹnu po hẹnnumẹ etọn lẹ po, yé jaya hẹ ẹ.

Osẹ́n he Jiwheyẹwhe na Islaeli dọ dọ eyin visunnu de yin jiji, to azán ṣinatọ̀ntọ gbè, yè dona gboadà na ẹn, podọ to enẹgodo yè nasọ do yinkọ na ẹn. (Levitiku 12:2, 3) Mẹdelẹ mọdọ yinkọ Zekalia tọn wẹ yè dona do na visunnu lọ. Ṣigba, Elizabẹti gbẹ́ bo dọmọ: “Lala! ṣigba Johanu wẹ e na yin yiylọdọ.” (Luku 1:60) Flindọ angẹli Gabliẹli ko dọ dọ ovi lọ dona yin yiylọdọ Johanu.

Kọmẹnu po hẹnnumẹ etọn lẹ po jẹagọdo e dọmọ: “Mẹdepope ma tin to hẹnnumẹ towe lẹ mẹ he tindo oyín enẹ.” (Luku 1:61) Gbọn alọ yí do basi ohia lẹ dali, yé kanse Zekalia lehe e jlo dọ visunnu etọn ni yin yiylọdọ. Zekalia biọ wekan-whlẹ de bo kàn gblọndo etọn do e ji dọmọ: “Johanu wẹ oyín etọn.”—Luku 1:63.

To afọdopolọji, onù Zekalia tọn hùn to azọ́njiawu-liho bọ e jẹ hodọ ji. A sọgan flindọ Zekalia lẹzun unbọpẹnnọ to whenue e ma yí ohó angẹli lọ tọn sè dọ Elizabẹti na jivi. Enẹwutu, todin he Zekalia dọho, e jiawu na kọmẹnu etọn lẹ bọ yé kanse yede dọmọ: “Etẹwẹ ovi pẹvi ehe na wá lẹzun taun?” (Luku 1:66) Yé mọ alọ Jiwheyẹwhe tọn to aliho he mẹ yinkọ yin dido na Johanu te.

Enẹgodo, Zekalia gọ́ na gbigbọ wiwe bo dọmọ: “Donanọ wẹ Jehovah Jiwheyẹwhe Islaeli tọn, na e ko lẹ́ ayidonugo etọn hlan omẹ etọn lẹ bo ko sọ whlẹn yé gán. E ko sọ ze azò whlẹngán tọn de daga na mí to owhé Davidi devizọnwatọ  etọn tọn gbè.” (Luku 1:68, 69) To whenue Zekalia yí hogbe lọ lẹ “azò whlẹngán tọn” zan, Oklunọ Jesu he ma ko yin jiji hodọ wẹ e te. E dọ dọ Omẹ enẹ lọ wẹ Jiwheyẹwhe na yizan nado “na mí lẹblanulọkẹyi lọ, to whenue mí na ko yin whinwhlẹn sọn alọ kẹntọ lẹ tọn mẹ godo, nado nọ wà sinsẹ̀nzọn wiwe hlan ẹn madibu, po nugbonọ-yinyin gọna dodowiwa po to nukọn etọn to azán mítọn lẹpo gbè.”—Luku 1:74, 75.

Zekalia dọ dọdai gando visunnu etọn go dọmọ: “Na hiẹ, ovi pẹvi E, hiẹ na yin yiylọdọ yẹwhegán Gigogán lọ tọn, na hiẹ na jẹnukọnna Jehovah yì nado jla aliho etọn lẹ do, nado na oyọnẹn whlẹngán tọn omẹ etọn lẹ gbọn jona ylando yetọn lẹ tọn dali, na awuvẹmẹ sisosiso Jiwheyẹwhe mítọn tọn wutu. Po awuvẹmẹ ehe po, mí na mọ wunkinkẹn sọn oji aga nado na hinhọ́n mẹhe sinai to zinvlu po oyẹ̀ okú tọn po mẹ lẹ podọ nado deanana afọ mítọn lẹ po kọdetọn dagbe po to aliho jijọho tọn ji.” (Luku 1:76-79) Lehe dọdai enẹ na tulimẹ do sọ!

To ojlẹ enẹ mẹ, Malia—mẹhe ma ko wlealọ—ko jẹ whégbè to Nazalẹti. Etẹwẹ na jọ do e go eyin mẹlẹpo wá mọdọ ohò wẹ e te?