Elisabeta be kahirakahira do ia mara. Iena varavara Maria be ia ida hua toi ia noho vadaeni. To nega ia ginidae vadaeni, Maria ese Elisabeta ia bamahuta henia bona ena siti Nasareta dekenai ia giroa lou. Hua 6 bamona murinai, Maria danu be natuna mero ta do ia havaraia.

Maria be gabu ia rakatania bena daudau lasi murinai, Elisabeta ia mara. Ia moale badina ena mara lalonai hekwakwanai ta ia davaria lasi bona ena beibi ia vara namonamo! Elisabeta ese ena beibi be ena varavara bona dekena taudia dekenai ia hahedinaraia neganai, idia danu be ia ida idia moale hebou.

Dirava ese Israela taudia dekenai ia henia Taravatu ia gwau, bema natuna mero ia vara, namona be dina namba 8 ai beibi ena kopina idia utua, bona ena ladana do idia hatoa danu. (Levitiko 12:2, 3) Haida idia ura unai mero dekenai ena tamana ena ladana Sekaraia idia hatoa. To Elisabeta ia gwau: “Lasi! Iena ladana do ita hatoa Ioane.” (Luka 1:60) Aneru Gabriela ena hereva bamona, namona be inai beibi ena ladana idia hatoa Ioane.

To varavara bona dekena taudia idia gwau: “Unai ladana be emu varavara ta ena ladana lasi.” (Luka 1:61) Bena edia imana amo saini idia karaia, bona Sekaraia idia nanadaia ia ura ena natuna dekenai edena ladana do ia hatoa. Sekaraia ese ia noidia au palakana ta do idia henia bona latanai ia torea: “Ena ladana be Ioane.”​—Luka 1:63.

Unai neganai, Sekaraia be ia hereva lou diba. Reana oi laloatao, aneru ia gwau Elisabeta be natuna mero ta do ia havaraia, to Sekaraia be aneru ena hereva ia abia dae lasi, unai dainai ia hereva diba lasi. Hari, Sekaraia ia hereva lou diba dainai, ena dekena taudia idia hoa bona idia sibona idia nanadaia: “Inai beibi be edena bamona tauna ai do ia lao?” (Luka 1:66) Ioane ese ena ladana ia abia dalana amo Dirava ena siahu idia itaia.

Bena Sekaraia be lauma helaga amo ia honu, bona ia gwau: “Israela ena Dirava Iehova ita  hanamoa, badina ia ese ena taunimanima ia hebogahisi henia bona idia ia hamauria. Bona ena hesiai tauna Davida ena bese amo ita totona hamauria tauna goadana ta ia henia.” (Luka 1:68, 69) Inai “hamauria tauna goadana” eiava “hahemauri ena doana” be Lohiabada Iesu, gabeai do ia vara tauna, ia herevalaia. Sekaraia ia gwau, Dirava be Iesu amo “ita ia hamauria murinai, dala ia kehoa mai gari lasi ida ia do ita tomadiho henia, unai amo iseda mauri dinadia ibounai lalonai, abidadama do ita hahedinaraia bona kara maoromaoro do ita badinaia.”​—Luka 1:74, 75.

Sekaraia ese ena natuna be inai bamona ia perovetalaia: “Egu natuna e, oi do idia gwauraia Ataiai Momokani Diravana ena peroveta tauna, badina oi be Iehova vairanai do oi lao bona ena dala do oi hegaegaelaia. Bona iena taunimanima do oi hadibaia ia ese edia kara dika gwauatao karana amo idia do ia hamauria, badina unai be Dirava ena hebogahisi bada karana. Unai hebogahisi karana be guba amo daba ia rere bamona ita latanai do ia diari, unai amo dibura dekenai idia noho taudia dekenai diari badana do ia henia, bona iseda aena be maino dala dekenai ia hakaua lao.” (Luka 1:76-79) Unai peroveta herevana ese ita ia hagoadaia!

Unai nega lalonai, Maria be iena hanua Nasareta dekenai ia ginidae, to ia do headava lasi. To ia dekenai dahaka do ia vara bema idia itaia ia rogorogo?