Elisabet nyauka beranak. Pengelama tiga bulan, Maria diau enggau iya. Diatu Maria patut pulai baru ngagai Nasaret, lalu tu pejalai ti jauh. Kira-kira enam bulan da agi, Maria mega deka beranak.

Enda lama pengudah Maria mupuk, Elisabet ngadaka siku anak lelaki. Orang ke berimbai pendiau sereta kaban belayan sama gaga ati enggau Elisabet, laban iya enggau anak iya gerai.

Nitihka Adat Petara, siku anak mit patut disunat sereta diberi nama ba hari kelapan pengudah iya ada. (Adat Lewi 12:2, 3) Sekeda orang ngasaika anak Sekariah nya patut ngangkatka nama iya. Tang ku Elisabet bejaku: “Anang! Nama iya John.” (Luke 1:60) Nuan engka agi ingat, sebedau tu Gabriel udah ngasuh Elisabet enggau Sekariah meri nama John ngagai anak seduai iya.

Taja pia, orang ke berimbai pendiau sereta kaban belayan enda setuju enggau nama nya. Ku sida madah: “Tang nuan nadai kaban belayan ke ngena nama nya.” (Luke 1:61) Udah nya, sida bejaku ngena jari ngagai Sekariah. Sida deka nemu nama ti deka diberi Sekariah ngagai anak iya. Sekariah minta siti papan lalu nulis saut iya: “Nama iya John.”—Luke 1:63.

Tekala nya, Sekariah ulih bejaku baru. Sebedau tu, iya nyadi bisu laban iya enda pechayaka pesan ke dibai Gabriel. Nya alai lebuh Sekariah berengkah bejaku, orang ke berimbai pendiau enggau sida berasai alit ati lalu nanya: “Nama penyadi anak tu ila?” (Luke 1:66) Sida ulih meda kuasa Jehovah amat bisi enggau anak mit nya.

Udah nya, Petara meri kuasa kudus Iya ngagai Sekariah. Lalu Sekariah madah: “Pujika Jehovah, Petara orang Israel, laban Iya udah  kasihka nembiak Iya lalu ngelepaska sida. Iya udah meri siku penyelamat ti kering ke kitai, ari peturun David, ulun Iya.” (Luke 1:68, 69) “Penyelamat ti kering” nya dituju ngagai Tuan Jesus ke deka diadaka. Sekariah madahka nengah Jesus, Petara deka “nyelamatka kitai ari munsuh, Iya meri kitai basa bejalaika pengawa ti tuchi ke Iya enggau ati ti berani, ngambika kitai mengkang taluk sereta ngereja utai ti ngena ba mata Iya sepemanjai umur kitai.”—Luke 1:74, 75.

Bekaul enggau anak iya, Sekariah madahka: “Tang nuan, anak aku, nuan deka dikumbai nabi Petara ti Pemadu Tinggi. Nuan deka bejalai dulu ba mua Jehovah, nyediaka jalai ke Iya. Nuan deka meri penemu ngagai nembiak Petara, pasal Petara ke deka ngampunka dosa sida kena nyelamatka sida, laban Petara kitai nya pengasih. Pengasih nya ke ari serega, deka manchar ngagai kitai baka mata panas ke tumbuh. Penampak nya deka meri penerang ngagai orang ke diau dalam pemetang sereta dalam ayuk pemati, lalu ngiring kitai ngambika nengah jalai ti likun.” (Luke 1:76-79) Utai ke disebut Sekariah tentu meransang semua sida ba dia!

Maya nya, Maria udah datai ba Nasaret. Nyau kelama, semua orang deka nemu iya udah ngandung. Nama deka nyadi ngagai Maria enti orang nemu iya udah ngandung sebedau belaki?