Meli nĩwekalanĩtye na Elisavethi kwa ĩvinda ya myei ĩtatũ, na yu Elisavethi aĩ vakuvĩ vyũ kũsyaa. Ĩvinda ya Meli ya kũthi savalĩ ndaasa mũvaka mũsyĩ kwoo Nasaleti nĩyavikie, na nĩweesĩ kana ĩtina wa myei thanthatũ o nake akasyaa kavĩsĩ.

Ĩtina wa ĩvinda ĩnini kuma Meli athi, Elisavethi nĩwasyaie. Waĩ ũndũ wa kũtanĩthya nĩkwĩthĩwa Elisavethi nĩwasyaie o nesa na asyaie kana kate na mathĩna! Yĩla atũi na andũ ma mũsyĩ woo moonie kana kau, nĩmatanie mũno.

Mwĩao ũla Ngai wanengete Aisilaeli waasya kana mũthenya wa nyanya kuma kana kavĩsĩ kasyawa, kaaĩle kwaĩkwa na kainengwa ĩsyĩtwa. (Alivai 12:2, 3) Andũ amwe moonaa kana kavĩsĩ kau kaĩle kwĩtwa Nzekalia o ta ĩthe wako. Ĩndĩ, Elisavethi ameie atĩĩ: “Aiee! keĩtwa Yoana.” (Luka 1:60) Lilikana kana mũlaĩka Kavilieli aĩtye kavĩsĩ kau kaaĩle kwĩtwa Yoana.

Ĩtina wa kwĩw’a ndeto isu, atũi na andũ ma mũsyĩ wa Nzekalia mayaaendeew’a, na kwoou masya: “Vaiĩ ũmwe wa andũ menyu ma mũsyĩ wĩtawa ĩsyĩtwa yĩu.” (Luka 1:61) Nĩmatũmĩie moko kũneena na Nzekalia nĩ kana mamanye ũndũ kana kau kekwĩtwa. Nzekalia nĩwametisye kĩndũ kya kũandĩkĩa na aandĩka, “Yoana nĩyo ĩsyĩtwa yako.”—Luka 1:63.

Ĩtina wa kũandĩka ĩsyĩtwa yĩu, Nzekalia nĩwambĩĩe kũneena ĩngĩ. Ethĩwa nũlilikene, nĩtũnoonie kana Nzekalia aekete kũneena ĩvinda yĩla mũlaĩka wamũtavisye kana Elisavethi akasyaa, ĩndĩ aema kũĩkĩĩa. Kwoou, yĩla waneenie, atũi nĩmaseng’ie na makũlany’a, “Kũkeethĩwa ata kwa kana kaa keana?” (Luka 1:66) Makũlanilye ũu nũndũ wa ũndũ ũsu wa mwanya weekĩkie ĩtina wa Yoana kũtw’ĩĩwa ĩsyĩtwa.

Ĩtina wa maũndũ asu, Nzekalia nĩwausũiwe nĩ veva mũtheu na asya atĩĩ: “Nataĩwe Yeova,  Ngai wa Isilaeli, nũndũ nũlilikanĩte andũ make na akamaetee wovosyo. Na nũtũkĩlĩlye ũvya wa ũtangĩĩo nyũmbanĩ ya Ndaviti mũthũkũmi wake.” (Luka 1:68, 69) Yĩla Nzekalia waisye “ũvya wa ũtangĩĩo,” awetaa Mwĩaĩi Yesũ, ũla waĩ vakuvĩ kũsyawa. Nzekalia aisye kana kwĩsĩla vala ve Yesũ, Ngai akatũtangĩĩa “kuma mokonĩ ma amaitha, [nĩ kana] twĩkwata ndaĩa ya mwanya ya kũmũthũkũma ũthũkũmi mũtheu tũte na wia, twĩ aĩkĩĩku na twĩ alũngalu mĩthenyanĩ yitũ yonthe.”—Luka 1:74, 75.

Ayathana ĩũlũ wa Yoana, Nzekalia aisye atĩĩ: “We, kana kanini, ũkeetwa mwathani wa Ũla wĩ Ĩũlũ wa Onthe, nũndũ ũkathi wĩ mbee wa Yeova ũkaseũvye nzĩa syake, na kũnenga andũ make ũmanyi ĩũlũ wa ũtangĩĩo kwĩsĩla kũekewa naĩ syoo, nĩkwĩthĩwa Ngai waitũ e ĩnee yingĩ. Na nũndũ wa ĩnee yĩu kyeni kya kũikya kĩkatũvikĩa kuma ĩũlũ, nĩ kana kĩmamulĩkĩle ala mekalĩte kĩvindunĩ na kyuunĩ kya kĩkw’ũ na kũtongoesya maaũ maitũ nzĩanĩ ya mũuo.” (Luka 1:76-79) Ndeto isu syaĩ sya kwĩkĩa vinya mũno!

Ĩvindanĩ yĩu maũndũ asu maendeee Meli aĩ anavika Nasaleti, ĩndĩ ndaĩ anamba kũtwawa na vai mũndũ kĩsionĩ kyoo weesĩ kana nĩ mũito. Ĩndĩ kwesaa kwĩthĩwa ata andũ mamanya nĩ mũito?