Pɩkazɩ pazɩ se Elizaabɛɛtɩ ɛlʋlɩ. Ɛ-ɖɛdʋ Maarɩɩ wobu nɛ ɛwɛɛ ɛ-cɔlɔ yɔ, pɩlakɩ fenasɩ naadozo yɔ. Lɛɛlɛɛyɔ, alɩwaatʋ talaa se Maarɩɩ ɛɖaɣnɩ ɖɔm nʋmɔʋ kɩɖaɣlʋʋ nɛ ɛpɩsɩ ɛ-tɛ Nazarɛɛtɩ. Pɩkazɩ ɛzɩ fenasɩ loɖo mbʋ yɔ se ɛnʋ ɖɔɖɔ ɛlʋlɩ.

Maarɩɩ ɖɛwa nɛ pitileɖi lɛ, Elizaabɛɛtɩ lʋlɩ. Pɩɩkɛnɩ Elizaabɛɛtɩ nɛ ɛ-walʋ taa leleŋ siŋŋ se pɩɣa lʋlʋʋ ɖɔm camɩyɛ. Nɛ pɩtasɩ lɛ, Elizaabɛɛtɩ nɛ ɛ-pɩɣa pɛwɛ alaafɩya camɩyɛ. Elizaabɛɛtɩ wɩlɩ ɛ-pɩyalʋ ɛ-cɔlɔ ñɩma nɛ ɛ-hɔʋ taa ñɩma lɛ, paba ɖɔɖɔ pɩlabɩ-wɛ leleŋ pɩdɩɩfɛyɩ.

Paɣtʋ ndʋ Yehowa kaaha Izrayɛɛlɩ samaɣ yɔ, tɩyɔɔdʋʋ se ye ɛyʋ ɛlʋlɩ abalɩbɩɣa yɔ, pɩpɔzʋʋ se kɩyakʋ lutozo ŋgʋ wiye lɛ, pɛpɛlɩ-kɛ nɛ paha-kɛ ɖɔɖɔ hɩɖɛ. (Levitiki 12:2, 3) Nabɛyɛ maɣzaɣ se pɩpɔzʋʋ se paha pɩɣa ka-caa Zekariya hɩɖɛ. Ɛlɛ Elizaabɛɛtɩ ñataamaɣzɩɣ mbʋ, ɛyɔɔdaa se “Pɩlɩ pɩlɩ: Payaa-kɛ se ‘Yohanɛɛsɩ.’” (Luka 1:60) Ɛyɔɔdɩ mbʋ, mbʋ pʋyɔɔ yɔ, ɛtɔzaa se Ɛsɔ tiyiyu Gabrɩyɛɛlɩ kaatɔm se payaa pɩɣa se Yohanɛɛsɩ.

Hɩɖɛ nɖɩ ɖɩtɩkɛdɩnɩ ɛ-cɔlɔ ñɩma nɛ ɛ-hɔʋ taa ñɩma, pʋyɔɔ pocosi-i se: “Paayaɣ nɔɔyʋ hɩɖɛ nɖɩ yɔ ñe-liɖe taa.” (Luka 1:61) Nɛ pɔpɔzɩ Zekariya nɛ nesi se hɩɖɛ nɖɩ ɛsɔɔlaa se paha ɛ-pɩɣa. Peeɖe Zekariya pɔzaa nɛ pɔkɔnɩ-ɩ maʋ kpata. Pɔkɔnɩ-ɩ kʋ lɛ, ɛma kɩ-yɔɔ se: “Ka-hɩɖɛ lɛ Yohanɛɛsɩ.”​—Luka 1:63.

Peeɖe peeɖe lɛ, pɩtɩŋnɩ piti lakasɩ nasɩyɩ yɔɔ lɛ, Zekariya ɖaɣnɩ pazʋʋ yɔɔdʋʋ. Ŋtɔzʋʋ se ɛɛpɩsɩ kaayɔɔdaɣ mbʋ pʋyɔɔ yɔ, etaatisi tɔm ndʋ Ɛsɔ tiyiyu heyi-i se ɛ-halʋ kaɣ-ɩ lʋlʋʋ abalɩbɩɣa nakɛyɛ yɔ, tɩ-yɔɔ? Pʋyɔɔ pɩlabɩ ɛ-cɔlɔ mba piti se lɛɛlɛɛyɔ ɛɖaɣnɩ paɣzʋʋ yɔɔdʋʋ nɛ pɔpɔzɩ ɖama se: “Ɛzɩ pɩɣa ŋga kakaɣ kɛʋ we?” (Luka 1:66) Panɩ pɩ-taa se Ɛsɔ ɖoŋ taa Zekariya ha ɛ-pɩɣa hɩɖɛ.

Pʋwayɩ lɛ, fezuu kiɖeɖeu su Zekariya taa nɛ ɛyɔɔdɩ se: “Pasa [Yehowa] Izrayɛɛlɩ tɛ Ɛsɔ,  mbʋ pʋyɔɔ yɔ ɛyabɩ ɛ-samaɣ ñʋʋ nɛ ɛha-ɖʋ ñʋʋ yabɩtʋ ɖoŋ ɛ-lɩmɖʋyʋ Daviid ɖɩɣa taa.” (Luka 1:68, 69) Yesu weyi patɩlʋlɩtɩ-ɩ yɔ, ɛ-tɔm Zekariya yɔɔdaɣ alɩwaatʋ ndʋ ɛtɔm se “ɛha-ɖʋ ñʋʋ yabɩtʋ ɖoŋ” yɔ. Zekariya yɔɔdaa se pɩtɩŋnɩ Yesu ɛnʋ ɛ-yɔɔ lɛ, Ɛsɔ kaɣ-ɖʋ holuu “ɖo-koyindinaa nesi tɛɛ nɛ ɖɩla ɛ-tʋmɩyɛ, kele kele wɛtʋ taa, nɛ siɣsiɣ wɛtʋ taa, nɛ ɛcɔŋnɩ ɖɔ-yɔɔ ɖe-fezuu caɣʋ kpeekpe taa.”​—Luka 1:74, 75.

Zekariya yɔɔdaɣ ɛ-pɩyalʋ yɔɔ tɔm lɛ, ɛtɔm se: “Piyele pɩɣa ɛjam ña yɔ, pakaɣ-ŋ yaʋ se Ɛsɔ Kɩlɩm tɛ nayʋ, mbʋ pʋyɔɔ yɔ ŋkaɣ [Yehowa] nɔɔ ɖɛʋ nɛ ŋñɔɔzɩ-ɩ nʋmɔŋ, nɛ ŋsɩnɩ ɛ-samaɣ nɛ katɩlɩ ñʋʋ yabɩtʋ tɔm nɛ ka-kɩwɛɛkɩm kpeɣu. Ðɛ-Ɛsɔ pʋtɔdɩyɛ naʋ sɔɔlɩm tʋmɩyɛ yɔɔ, eyebini-ɖʋ se ɖɩna wɩsɩ nzɩ sɩñandɩ ɖɔ-yɔɔ yɔ. Nɛ pɩha-ɖʋ nʋmɔʋ nɛ ɖɩñandɩ mba pacaɣ cɩkpɛndʋʋ taa nɛ sɩm kuzotuu taa yɔ, nɛ ɛsɩnɩ-ɖʋ nɛ ɖɩɖɔ laŋhɛzɩyɛ nʋmɔʋ taa.” (Luka 1:76-79) Natʋ tɔm tʋnɛ tɩhɛzɩɣ laŋa pɩdɩɩfɛyɩ!

Pɩtʋʋ fɛyɩ se alɩwaatʋ ndʋ pɩlakaɣ mbʋ yɔ, Maarɩɩ weyi ɛtɩwalɩta yɔ, ɛtɛm talʋʋ ɛ-tɛ Nazarɛɛtɩ. Ɛyaa kɔŋ nɛ pana se ɛ nɛ hoɣa lɛ, ɛbɛ pakaɣ-ɩ labʋ?