Ke kolo ko, Elisabete owuta. Maria wa yitu kiandi ngonde tatu se kena muna nzo andi. Owau, Maria se kekanina, e ntangw’a vutuka kuna vata diandi Nazarete ifwene. Oyandi mpe ngonde sambanu kasidi zau muna wuta.

Maria vava kavutukidi kuna vata diandi, ke vaviokele kolo kiayingi ko Elisabete owutidi. Ekwe kiese wau vo Elisabete otomene wuta, oyandi yo nsedia bena yo vimpi wambote! Vava Elisabete kasongele o mwana kwa yitu ye esi belo kiandi, bayangalele kumosi yo yandi.

O nsiku a Nzambi kwa Isaele uvovanga vo, avo nkento owutidi mwan’a yakala, muna lumbu kia nana kafwete zengwa yo vewa e nkumbu. (Fuka 12:2, 3) Ankaka bavovele vo mwana kafwete lukwa Zakariya wa se diandi. Kansi, Elisabete ovovele vo: “Ve! Yoane keyikilwa.” (Luka 1:60) Sungamena dio vo, mbasi Ngambiele wavova vo mwana kafwete vewa e nkumbu a Yoane.

Kansi e yitu ye esi belo bavovese Elisabete vo: “Omu yitu yaku ke mosi ko una ye nkumbu yayi.” (Luka 1:61) Bayuvuidi Zakariya muna sinsu kimana kayika e nkumbu kazolele vana kwa mwan’andi. Zakariya olombele babu kia dibaya, osonekene vo: “Yoane i nkumbu andi.”—Luka 1:63.

Vana vau, Zakariya oyantikidi diaka ovova mu mpil’asivi. Nanga osungamene dio vo, Zakariya wakituka se baba vava kalembi kwikila muna mbasi ona wamvovesa vo, Elisabete mwan’a yakala kewuta. Zakariya wau kavovele, esi belo kiandi basivikidi, bayuvuzianini vo: “Aweyi kikala kimwana-mwana kiaki?” (Luka 1:66) Bamwene o nkum’a Nzambi muna mpila ina Yoane kavaninu e nkumbu.

I bosi, Zakariya ozele yo mwand’avelela, ovovele vo: “Yambula kakembelwa o Yave wa Nzambi a Isaele, e kuma kadi ovutwidi sungididi kiandi kwa nkangu andi, kabakûla. Utuvaikisidi mpok’a luvuluzu muna nzo a Davidi wa ntaudi andi.” (Luka 1:68, 69) E “mpok’a luvuluzu,” i Mfumu Yesu, ona owutuka ke kolo ko. Mu kuma kia mvuluzi ndioyo, Zakariya ovovele vo: Nzambi “okutuvuluza muna moko m’atantu eto, okutuyambula twansadila kondwa wonga, kuna kwikizi ye unsongi e lumbu yeto yawonso.”—Luka 1:74, 75.

Zakariya osakwidi mu kuma kia mwan’andi vo: “Ongeye kimwana-mwana mpe, ngunz’a Mpungu oyikilwa, kadi okwend’aviti kuna luse lwa Yave, wakubika nzila zandi, wazayisa o luvuluzu kwa nkangu andi muna luloloko lwa masumu mau, mu kuma kia walakazi wa Nzambi eto. Muna walakazi wau tumona ntemo utuka kuna zulu ukezima nze nkielo a kuma, watemesa ntemo kw’awana bafongele vana tombe ye kîni kia lufwa, kimana twasingik’o malu meto muna nzil’a luvuvamu.” (Luka 1:76-79) Ekwe ungunza walukasakeso!

Muna kolo kiaki, Maria ona una vo mpumpa, olueke kuna vata diandi, Nazarete. Adieyi divangama vava dizayakana vo oyimiti?