Elizabeth koro chiegni nyuolo nyathine. Osebedo kodak gi watne ma Maria kuom dweche adek. Koro sa ochopo ma Maria onego ogone oriti ka pok ochako wuoth mabor mochomo nyandwat nyaka Nazareth dalagi. Bang’ dweche auchiel kama, Maria bende biro nyuolo wuowi.

Ndalo manok ka Maria osedhi, Elizabeth nyuolo nyathine. Mano kaka en mor ni nyuol nyathino odhi kare kendo Elizabeth kod nyathine ngima maber! Sama Elizabeth nyiso joma odak machiegni kode kaachiel gi wedene nyathine matinno, jogo bende bedo mamor kanyachiel kodgi.

Chik ma Nyasaye nomiyo Jo-Israel ne dwaro ni nyaka ter nyathi ma wuowi nyangu e odiechieng’ mar aboro bang’ nyuolne kendo miye nying e odiechiengno. (Tim Jo-Lawi 12:2, 3) Ji paro ni idhi chak nyathino nying Zekaria wuon-gi. Kata kamano, Elizabeth tamore kowacho niya: “Ooyo! to enoluonge ni Johana.” (Luka 1:60) Donge inyalo paro kaka malaika Gabriel nokoro ni nyathino onego ochak ni Johana?

Joma odak machiegni kaachiel gi wedene ok yie kendo giwachone niya: “Onge watni miluongo gi nyingno.” (Luka 1:61) Gitiyo gi ranyisi mag lwedo e penjo Zekaria nying modwaro ni ochak wuode. Zekaria kwayo bao moro kae to ondikoe dwoko mare kama: “Johana e nyinge.”​—Luka 1:63.

Gikanyono, Zekaria bedo gi nyalo mar wuoyo kendo. Inyalo paro ni nobedo momo kane otamore yie gi gima malaika nowachone ni Elizabeth ne dhi nyuolo wuowi. Omiyo koro sama Zekaria wuoyo, joma odak machiegni kode wuoro ka gipenjore niya: “Nyathi matinno nobed ng’at manade?” (Luka 1:66) Gifwenyo ni  lwet Nyasaye e ma ne chiko nying ma ne omi Johana.

Eka roho maler nopong’o Zekaria mowacho kama: “Opak Jehova, Nyasach Israel nimar oseparo joge, kendo osekelonegi resruok. Kendo osechungonwa tung’ mar warruok e od Daudi jatichne.” (Luka 1:68, 69) Sama owacho ni “tung’ mar warruok,” owuoyo kuom Yesu ma koro eka ibiro nyuol. Zekaria wacho ni kokalo kuom Yesu, Nyasaye biro miyowa “thuolo mar tiyo tij Nyasaye ma onge luoro, bang’ ka osereswa e lwet wasigu, ka wamakore kode kendo ka wanyiso tim makare e nyime ndalo duto.”​—Luka 1:74, 75.

Kowuoyo e wi wuode, Zekaria koro niya: “To in, nyathi matin, ibiro luongi ni janabi mar Ng’at Mamalo Chutho, nimar ibiro dhi motelo ne Jehova mondo iik yorene, mondo imi joge ng’eyo wach warruok kokalo kuom weyonegi richogi, nikech Nyasachwa osekechowa. Kokalo kuom kechno, ler mar ru piny biro limowa koa malo mondo ochiw ler ne joma obet e mudho kod tipo mar tho, kendo mondo ota tiendewa e yo mar kuwe.” (Luka 1:76-79) Mano kaka weche mokorgo jiwowa!

Chop sani, Maria ma nenore ni pok okend, koro osedok mochopo Nazareth dalagi. Ang’o ma biro timorene ka ji ofwenyo ni en gi ich?