A Elizabɛt rogmã wakat ta n saame. A Maari sẽn yaa a yao wã zĩnda ne-a kiis a tãabo, la a loogrã wakat taame. A Maari na n le rɩka sor n leb hal Nazarɛte. Ka ne kiis a yoobe, yẽ me na n doga bi-ribla.

A Maari sẽn loogã pa kaoos la a Elizabɛt rog ye. Rogmã sẽn pa tall yelle, tɩ biigã ne a ma wã fãa tar laafɩ wã yaa sũ-noogo. B yagsã ne b roagdbã wa n gesa biigã, n naag-b n kɩdme.

Tõod nins Wẽnnaam sẽn da kõ Israyɛll nebã pʋgẽ, b ra wilgame tɩ pag sã n dog bi-ribla, rasem a nii wã daare, b tog n kẽes-a-la bãongo. (Maan-kʋʋre 12:2, 3) Baraar me la b ra wae n pʋt biigã yʋʋre. Neb kẽer da ratame tɩ b pʋd biigã a ba wã yʋʋre. La a Elizabɛt zãgsame, n yeel “t’a yʋʋr na n yɩɩ a Zã.” (Luk 1:60) Tẽeg-y tɩ malɛk a Gabriyɛll ra yeelame tɩ b segd n pʋda biigã t’a Zã.

Yagsã la roagdbã ra pa rat n sak a Elizabɛt sẽn yeelã ye. B yeelame t’a Elizabɛt “roagdbã sʋka, ned ka be n tar yʋ-kãng ye.” (Luk 1:61) B bilsa ne nusi, n sok a Zakari a sẽn dat tɩ b pʋd biigã yʋʋr ninga. A Zakari kɩtame tɩ b kõ-a walga, t’a gʋls tɩ “biigã yʋʋr la a Zã.”—Luk 1:63.

Zĩig pʋgẽ, a Zakari zɩlemdã lakame. Yɩɩ yel-solemde. Yãmb sã n tẽrẽ, yaa malɛkã sẽn wa n yeel-a t’a pagã na n doga bi-ribla, t’a pa tẽ wã la a sẽn lebg mukã. A Zakari zɩlemdã sẽn lak t’a le gomdã, yagsã yɛɛsame. B ra sokda b mens woto: “Bi-kãngã na n yɩɩ bõe biiga?” (Luk 1:66) B bãngame bal tɩ bũmb nins sẽn maan a Zã yʋʋrã pʋdb sasa wã yaa Wẽnnaam nugu.

Vʋʋsem sõngã siga a Zakari t’a pẽg a Zeova. A yeelame: ‘Pẽgr Zu-soabã sẽn yaa Israyɛll nebã Wẽnnaam, bãmb sẽn wa n ges b nebã n fãag-bã yĩnga, la bãmb sẽn kõ tõnd fãagd sẽn tar pãnga, sẽn yit a Davɩɩd sẽn yaa bãmb tʋmtʋmdã buud pʋgẽ wã.’ (Luk 1:68, 69) Yaa Zu-soab a Zeezi sẽn nan pa rogã la a sẽn bool tɩ “fãagd sẽn tar pãngã.” A Zakari yeelame tɩ ne a Zeezi maasem, Wẽnnaam “na n fãaga tõnd n yiis d bɛɛbã nusẽ, la b kõ tõnd pãn-tõog tɩ pʋʋs bãmb ne sõmblem la tɩrlem bãmb taoor hal tõnd vɩɩmã tɛka, tɩ rabeem kaẽ ye.”—Luk 1:74, 75.

A Zakari togsa bũmb nins yẽ biigã me sẽn na n maanã. A yeelame: “Foom a bi-bilfã, b na n boola foom tɩ Sẽn-Ka-To no-rɛɛsa. Bala, fo na n lʋɩɩ Zu-soabã taoore n maneg bãmb soayã, la f kɩt tɩ nebã bãng tɩ yaa ne yel-wẽnã sugr kosg la b na n paam fãagre, tõnd Wẽnnaamã nimbãan-zoeerã sẽn ya kãsengã yĩnga. Yaa nimbãan-zoeerã yĩng la sõorã sẽn pukdã na n wa tõnd nengẽ, n kõ neb nins sẽn zĩ lik pʋgẽ la kũum maasmẽ wã vẽenem, la a tɛ tõnd tɩ d tũ laafɩ sore.” (Luk 1:76-79) Ad yaa bãngr-gomd sẽn sɩd kengd pɛlga!

Wakat kãng t’a Maari taa Nazarɛte. La a ra ket n pa kul sɩd ye. Nebã sã n bãng t’a tʋtame, bõe n na n maane?