Erizabheti wainga phedo kuti abare. Maria, ukama hwake wainga wagara nae ko mweji mutatu. Yainga yaanguva yokuti Maria aeneke no kuita hwendo hwakareba, kubva kanjikazi kuenda kumuzi kwake, ku Nazareta. Pa kupera ko mweji mutandhatu, Maria anozobaravo.

Maria paakandopinda, Erizabheti wakabara. Zvakadakajisa maningi ngokuti Erizabheti wakabara zvaushoni zve iyena no mwana wake worume, vainga no uhomi hwaushoni! Erizabheti paakatatija cimwana cake citete vo cigarisano no voukama, vakadakaravo nae.

Mutemo wa Mwari ku vaIziraeri wainanga kuti mwana worume anodikana kusokwa no kuduhwa zina, ngo njiku yocisere naapera kubahwa. (VaLevi 12:2, 3) Vamweni vaivona kuti mwana wa Zakaria anodikana kuduhwa zina ra babake. Asi, Erizabheti wakati: ‘Andizvopi! Zina rake ndi Johani.’ (Luka 1:60) Ceujanyi kuti ngirozi Gabrieri yakananga kuti mwana uu anozoduhwa Johani.

Ukama no vocigarisano vaizviramba, vacinanga kuti, “akuna na umwe wo ukama hwako ano zina ra Johani.” (Luka 1:61) Vakabvunjisa Zakaria vecishandisa kuvereketa ngo nyara kuti unoda kuti aduhwe ani. Zakaria wakakumbira tabwa, wotara kudari: “Zina rake ndi Johani.”—Luka 1:63.

Paaitara kudaro, wakatangazve kuvereketa ngo mushamaiso. Kangaije mucaceuja kuti wakaita mbeveve paakatama kutenda zvainanga ngirozi kuti Erizabheti waizobara mwana. Asi Zakaria paakatanga kuvereketa, vocigarisano vakakahamara, vacijibvunjisa kudari: “Anozoita wakadini mwana uu?” (Luka 1:66) Ivona vakavona nyara ya Mwari ngo madurihwe akaitwa zina ra Johani.

Tevere, Zakaria acitungamirihwa ngo mujimu mucena, wakananga kudari: “Ngaakujwe Mwari  wo vaIziraeri, ngokuti waza koponesa vandhu vake. Ngokuti wakatiimisira muponesi wakavanga mu bvumbo ra Davidi, muranda wake.” (Luka 1:68, 69) Ngo kunanga “muponesi,” Zakaria waireva wiya waizobahwa, kuva Tenji Jesu. Iyena wakanangazve kuti Mwari anozoshandisa muponesi uu, “kuti tisununguhwe ku vakorore vedu, kuti tibatire Mwari ticingathyi ciro; ngo mwoyo wakacena no kurungama panyasi pake, mu njiku jese jo kurarama kwedu.”—Luka 1:74, 75.

Ecinangira mwanake, Zakaria wakati: “Iwewe mwana, unozodanwa muporofeti wa Mwari, Mukuru-kuru, ngokuti unozoenda pambeji pa Mwari konasirira gwanja rake. Unozozivisa vandhu vake ruponeso hwake, ngo njio yo kukungurihwa ko bzixaixi. Ngo kunaka mwoyo kwa Mwari wedu, anozotipa kubva mugore, muponesi anotiveneka inga zuva. Anozoveneka vaya vanogara mu cidima no mu bvute ro kufa, wozotifambisa mu gwanja ro kunyarara.” (Luka 1:76-79) Uphorofita hwaakanangari hunovangisa maningi.

Pa mukuvo uu, Maria waingaya acito acadha, wakaguma kumuzi kwake ku Nazareta. Zvicinyi zvizomuitikira pozvinozovoneka kuti ano mimba?