Isapeli aahanle vakhaani wi amuyare mwanawe. Mu miyeeri miraru, muhima awe aahikhala ni yoowo. Nave yaahiphiya elukuluku yawii Mariya alaanye ni weeca mukwaha woorekama ayaaka owannyawe o Nasareti. Mu miyeeri mithanu nammoha, owotho onamukhalano mwaana.

Mariya amanle okhumavo, moohilekela Isapeli aahiyara. Ti yoohakalaliha woona wi Isapeli aahikhumelela phaama mu elukuluku ya oyara navetho owo ni mwanawe yaahikhalano ekumi yaphaama! Vaavaa Isapeli aawooninheiye mwaana awe amwaacamani ni asinthamwene awe, awotho yaahihakalala vamoha ni yoowo.

Nlamulo na Muluku wa Aisarayeli naaloca wi mwaana a mwaamulopwana amaliha mahiku mathanu namararu aaphwanela othikiliwa, ni ochuwiwa nsina. (Onamukutxho 12:2, 3) Akina yuupuwela wi mwaana a Sakariya aahaala ochuwiwa ni nsina nawe. Nyenya, Isapele aahiloca ariki: “Hoye! Owo oni anitxhaniwa Yohani.” (Luka 1:60) Aahuupuwela yeele aalonce munkeelo wi owo aahaala wiichaniwa Yohani.

Amwaacamani ni amusi yaahimwaakhula: “Mwa ahima à havo orino nsina nenlo!” (Luka 1:61) Epharihelaka ineneeryo, awo yaahimukoha Sakariya nsina taani aachuneiye omuchuwa mwaana awe. Sakariya aahiveka vachu voorepavo nave aahirepavo naakhulo nawe ariki: “Nsina nawe ti Yohani.”—Luka 1:63.

Mu elukuluku yeeyo, nlumi nawe naataphuwa mootikhiniha. Akhweya nyuwaano munnuupuwela wi owo aahihiya oloca ntakhara wi heemerenrye vaavaa Munkeelo aalonceiye wi—Isapeli aahaala omuyara mwaana. Mwawiihiiha, vaavaa Sakariya nlumi nawe naataphunwaaya, amwaacamani awe yaanatikhina nave yaanakohana yaawo yaawo eriki: “Mwana ola onaya okhala ani?” (Luka 1:66) Awo yaahoona ntata na Muluku mmukhalelo Yohani aavahiweiye nsina.

Voocharela, asaren’ye munepa waweela, Sakariya  aahiloca ariki: “Ethamaliwe Apwiya, Muluku a Isarayele, ntakhara àsekurya ni àhopola nloko naya. Nave àhoniha wa hiyano ikuru sa nivuluso, nnakhuma mwa nloko na Davide mulapeli aya.” (Luka 1:68, 69) Orweela wa “ikuru sa nivuluso,” yoowo ori Pwiya Yesu, ahaala oyariwa. Orweela wa yoowo Mmoha, Sakariya aahiloca wi Muluku “ànivaha wi, nopoliwe wa amwitxhana ahu, nalapele nihòvaka, ni murima waphama ni wa wokololowa vamithoni vaya, mahiku ahu othene.”—Luka 1:74, 75.

Vooloca sa mwanawe, Sakariya aahiloherya ariki: “Nave weyano, mwana, oni onitxhaniwa mulipa a miririmu a Mutokwenesa, ntakhara onaya okhala oholo wa Apwiya, wi wareheryele miphiro, wi olokohe wa nloko naya osuwela nivuluso, ni oleveleliwa sotxheka, wa nthowa na murima wa ikharari sa Muluku ahu, onansekurya arwaka osulu worakama, ntoko nsuwa nókhuma, wi àmwalele yawo ari mwipiphini ni mmurusini wa okhwa, wi etxhihe inani sahu mumphironi wa muretxele.” (Luka 1:76-79) Yeeyo Sakariya aalonceiye, yaahiweeriha achu okhala oohakalala chiryene!

Mu elukuluku yeeyo, Mariya yoowo ahaatheliwe, aahiphiya o Nasareti. Tiheeni yaahaala weereya wa yoowo vaavaa yeeraaya esuweliwe wi oorupala?