Asingger lan mananak si Elizabet. Taloy bulan lan manaayam si Maria ed abung da. Balet natan et manpatanir lay Maria ta onsempet lad Nazaret. Anem bulan ni et mananak met la.

Kaalis nen Maria, nananak si Elizabet. Talagan makapaliket ta maong so impananak nen Elizabet tan malusog so ugaw! Nen impanengneng nen Elizabet so anak to ed saray kakaabay tan kakanayon da, akiliket irad sikato.

Base ed Ganggan na Dios ed Israel, diad komawalon agew kayarin niyanak so ugaw a laki, nepeg ya segaten tan ngaranan met la. (Levitico 12:2, 3) Parad arum, kaukolan ya ingaran ed si Zacarias so anak to. Balet nansalitay Elizabet a kuan to: “Andi! sikatoy ingaran a Juan.” (Lucas 1:60) Tandaan ya imbaga nen anghel Gabriel ya say ingaran ed ugaw et Juan.

Agpinmayag iray kakaabay tan kakanayon: “Anggapod saray kakanayon mo so manngaran na ontan.” (Lucas 1:61) Panamegley na sinyas, tinepetan day Zacarias no antoy labay ton ingaran ed anak to. Nampaala na tabla tan insulat to: “Juan so ngaran to.”​—Lucas 1:63.

Kayari na satan, mamilagron akasalita lamet si Zacarias. No nanonotan yo, sikatoy naemel nen ag-anisia ed imbaga na anghel ya manlukon si Elizabet. Natan ta makasalita lay Zacarias, mankelaw iray kakaabay tan intepet da: “Anto kasi pagmaliwan na sayan ugaw?” (Lucas 1:66) Atalosan dan say Dios so angiter ed ngaran nen Juan.

Insan napnoy masanton espiritu si Zacarias, tan inyabawag to: “Narayew komon si Jehova a Dios na Israel, lapud inimano to tan inliktar to iray totoo to. Tan pinatalindeg tod sankaabungan nen David a lingkor to so sakey a saklor na kilalaban parad sikatayo.” (Lucas 1:68, 69) Say tutukoyen ton “saklor na kilalaban” et say Katawan  ya Jesus, ya iyanak ni labat. Panamegley to, inkuan nen Zacarias ya “kayari . . . itayon isalba [na Dios] ed saray kakabusol et iter tod sikatayoy pribilehyon manlingkor ed sikato a walaay pakpel tan katooran tan inkatunong ed pakanengneng to diad amin ya agew tayo.”​—Lucas 1:74, 75.

Oniay impasakbay nen Zacarias nipaakar ed anak to: “Sika, ana’ko, natawag kan propeta na Sankatagyan, ta ibaki ka lan unona nen Jehova sakbay to, pian mangiparaan ed saray dalan to, pian mangipakabat na mensahe na kilalaban ed kabaleyan to diad pakaperdona na saray kasalanan da, lapud maaron panangabagey na Dios tayo. Sayan panangabagey a manlapud tagey et singa liwawa ed palbangon, a mangiter na liwawa ed saramay manyudyurong ed kabilungetan tan anino na patey, tan mangigiya ed saray sali tayo ed dalan na kareenan.” (Lucas 1:76-79) Talagan makapaseseg itan ya propesiya!

Legan na saya et akasabi lay Maria ed Nazaret, ya agni kasal ed saman. Antoy nagawad sikato no nahalata lan malukon?