Elisabèt tabata serka di duna lus. Maria, kende tabatin un tres luna kaba serka dje, a kuminsá prepará pa bai kas bèk, na Názarèt. Despues di un seis luna, e tambe tabatin ku duna lus.

Un poko tempu despues ku Maria a bai, Elisabèt a duna lus. Tur hende tabata kontentu ku tur kos a bai bon i ku Elisabèt i e yu tabata bon di salú. Ora Elisabèt a mustra su bebi na bisiña- i famianan, nan tur tabata kontentu p’e.

Awor, segun e Lei ku Dios a duna Israel, mester a laga sirkunsidá un yu hòmber riba e di ocho dia despues ku e nase. Anto e ora ei, mester a duna e yu nòmber. (Levítiko 12:2, 3) Algun bisiña i famia a haña ku mester a yama e mucha Zakarías, meskos ku su tata. Pero Elisabèt a bisa nan: “Nò! Mester yam’é Huan.” (Lukas 1:60) Kòrda ku esei tabata e nòmber ku angel Gabriel a bisa ku mester a duna e mucha.

Pero e bisiñanan i famianan no a gusta esei i a bisa: “No tin ningun hende den bo famia ku e nòmber ei.” (Lukas 1:61) Anto ku seña, nan a puntra Zakarías kon é tabata ke yama e yu. Zakarías a pidi nan un tabla i a skirbi: “Su nòmber ta Huan.”—Lukas 1:63.

Anto mesora, pa medio di un milager, el a kuminsá papia atrobe. Bo ta kòrda ku Zakarías a bira muda debí ku e no a kere loke angel Gabriel a bisa, esta, ku Elisabèt lo a haña un yu hòmber? P’esei, ora el a kuminsá papia atrobe, su bisiñanan a keda asombrá i a puntra nan mes: “Kiko e mucha akí lo bira anto?” (Lukas 1:66) Nan a komprondé bon kla ku ta Yehova tabata ke pa e mucha yama Huan.

Yen di spiritu santu, Zakarías a deklará: “Alabá sea Yehova, e Dios di Israel, pasobra el a dirigí su atenshon na su pueblo i a libra nan. I el a lanta un kachu di salbashon pa nos den e kas  di su sirbidó David.” (Lukas 1:68, 69) Ku e ekspreshon “kachu di salbashon,” Zakarías a referí na Señor Hesus, kende e tempu ei no a nase ainda. Zakarías a bisa ku, pa medio di Hesus, Dios lo “libra nos for di gara di enemigu” i “duna nos e privilegio di rindi sirbishi sagrado na dje sin miedu, ku lealtat i hustisia, tur nos dianan.”—Lukas 1:74, 75.

Anto relashoná ku su yu hòmber Huan, el a bisa: “Ma pa loke ta abo, mi yu, lo bo ser yamá profeta di e Haltísimo, pasobra lo bo bai dilanti di Yehova pa prepará kaminda p’e, pa duna di konosé na su pueblo ku lo e salba nan pa medio di pordon di nan pikánan pa motibu di su tierno kompashon. E kompashon akí ku ta bini djariba lo ta manera e lus ku ta bria ora di dia habri pa lusa esnan sintá den skuridat i den sombra di morto i pa dirigí nos pianan ku éksito den e kaminda di pas.” (Lukas 1:76-79) Esei, sin duda, tabata un profesia konmovedor!

Mientrastantu, Maria, kende aparentemente tabata soltero ainda, a yega Názarèt kaminda e tabata biba. Den ki situashon el a hañ’é ora a bira bisto ku e tabata na estado?