A no o teki langa fosi Elisabet kisi en pikin. Dri mun langa Maria tan nanga en. Now Maria musu gowe baka. A musu naki a langa pasi go baka na en oso na Nasaret, na noordsei fu a kondre. Baka siksi mun en srefi o kisi wan manpikin.

Syatu baka te Maria gowe, Elisabet e kisi en pikin. Ala sma breiti taki sani waka bun nanga Elisabet nanga en beibi. Te Elisabet e sori den birtisma nanga den famiriman fu en a boi fu en, den e prisiri makandra nanga en.

A Wet di Gado gi den Israelsma e taki dati den musu besnèi den manpikin fu den, aiti dei baka te den gebore (Lefitikus 12:2, 3). Na a dei dati den e gi den boi wan nen tu. Son sma feni taki a boi musu kisi a nen fu en papa Sakaria. Ma Elisabet taigi den: „Nôno! A musu nen Yohanes” (Lukas 1:60). Memre taki na engel Gabrièl ben taki dati a beibi disi musu nen Yohanes.

Den birtisma nanga den famiriman no e agri nanga en. Dati meki den e taki: „Ma nowan famiri fu yu abi a nen disi” (Lukas 1:61). Den e meki sani nanga den anu fu aksi Sakaria sortu nen a wani gi en manpikin. Sakaria aksi den sma fu gi en wan pikin planga, dan a skrifi na tapu: „En nen na Yohanes.”​—Lukas 1:63.

Wantewante Sakaria man taki baka. Soleki fa wi ben si kaba, dan Sakaria no ben man taki moro fu di a no ben wani bribi na engel di a taki dati Elisabet ben o kisi wan manpikin. Ma now di Sakaria e taki baka, den birtisma bigin fruwondru èn den aksi: „San a yongu pikin disi o tron?” (Lukas 1:66) Den si krin taki na Gado ben wani taki a pikin musu nen Yohanes.

Ne Sakaria kon furu nanga santa yeye, dan a  taki: „Prèise Yehovah, a Gado fu Israel, bika a poti prakseri na en pipel èn a frulusu den. A meki wan tranga frulusuman kon gi wi na ini a famiri fu en futuboi David” (Lukas 1:68, 69). A „tranga frulusuman” na Masra Yesus di musu gebore ete. Sakaria e taki dati nanga yepi fu a frulusuman disi, Gado o „puru wi fu na anu fu wi feanti”. Baka dati „wi sa kisi a grani fu dini en sondro fu frede, nanga wi heri ati, èn na wan bun fasi wi heri libi langa”.​—Lukas 1:74, 75.

Sakaria e taki fu en manpikin: „Yu, mi pikin, sma o kari yu a profeiti fu a Moro Heiwan, bika yu o waka na fesi Yehovah fu sreka den pasi fu en. Yu o meki en pipel kon sabi taki a o frulusu den, fu di a gi den pardon fu den sondu fu den èn fu di wi Gado abi trutru sari-ati. A sari-ati disi di e kon fu hemel o de leki a leti di e skèin te dei opo. A o skèin gi den wan di e sidon na ini dungru èn na ini a skaduw di e tyari dede kon. A o meki wi waka a pasi fu freide na wan bun fasi” (Lukas 1:76-79). A profeititori disi e gi wi deki-ati trutru!

Na a srefi ten disi Maria di no trow ete doro en oso kaba na Nasaret. San o pasa nanga en te a kon de krin fu si taki a de nanga bere?