Elizabeti wanguja kamanavi kuti wabali mwana. Iyu wanguja limoza ndi mubali waki Mariya kwa myezi yitatu. Sonu Mariya wakhumbanga kuwere kwawu ku Nazareti, kunkhondi kwa mapiri nga ku Yudeya. Pa nyengu iyi, nayu walindizganga kuti wabalengi mwana asani pajumpha myezi 6.

Mariya wati watuwaku, Elizabeti wangubala mwana. Elizabeti wanguchira kwambula suzgu yeyosi, ndipu mwana nayu wanguwaku umampha. Iyu ndi Zekariya angukondwa ukongwa. Elizabeti wati walongo mwana kwa abali ŵaki kweniso ŵanthu apafupi, wosi angukondwa ukongwa.

Dangu lo Chiuta wangupaska Ayisirayeli lakambanga kuti asani mwana munthulumi wawaku wadumulikengi pa zuŵa la 8. Yiwu amupaskanga so zina pa zuŵa lenili. (Ŵalevi 12:2, 3) Ŵanthu anyaki akhumbanga kuti mwana waku Zekariya wapaskiki zina la awisi. Kweni Elizabeti wangukana ndipu wangukamba kuti: “Awa! zina laki ndi Yohane.” (Luka 1:60) Kumbukani kuti mungelu Gabiriyeli wangukamba kuti mwana mwenuyu azimupaski zina lakuti Yohane.

Ŵanthu apafupi kweniso abali ŵaki angukamba kuti: “Palivi mubali waku chinanga njumoza yo wakudanikapu zina lenili.” (Luka 1:61) Sonu ŵanthu ŵenaŵa angufumba Zekariya mwakugwiriskiya ntchitu manja kuti wakambi zina lo wapenjanga kupaska mwana waki. Zekariya wangupempha chakulembapu ndipu wanguŵalembe kuti: “Zina laki ndi Yohane.”—Luka 1:63.

Zekariya wati walemba zina, wangwamba so kulongoro. Kumbukani kuti iyu wanguleka kulongoro chifukwa wangugomezga cha vo mungelu wangumukambiya kuti Elizabeti wazamubala mwana munthulumi. Zekariya wati wayamba so kulongoro, ŵanthu wosi anguzizwa ukongwa ndipu angwamba kufumbana kuti: “Kumbi mwana mwenuyu wazamuja wamtundu wuli?” (Luka 1:66) Yiwu anguwona kuti janja laku Chiuta lenga paku Yohane chifukwa cha vo vinguchitika pa nyengu yo wapaskikanga zina.

Pavuli paki, Zekariya wati wazazika ndi mzimu wakupaturika, wangukamba kuti: “Walumbiki Yehova Chiuta waku Isirayeli, chifukwa wakumbuka ŵanthu  ŵaki ndipu waŵapingiya utaski. Ndipuso watisoske sengwi lautaski munyumba yaku Davidi mteŵeti waki.” (Luka 1:68, 69) Mazu ngakuti “sengwi lautaski,” ngang’anamuwa Yesu Ambuyafwi, yo pa nyengu iyi wanguja kamanavi kuti waweku. Zekariya wangukamba kuti kuziya mwaku Yesu, ‘asani Chiuta watitaska mu manja mwa arwani ŵidu, tijengi ndi mwaŵi wakumuchitiya uteŵeti wakupaturika kwambula mantha, mwakugomezgeka kweniso mwaurunji pa masu paki mu mazuŵa ngidu ngosi.’—Luka 1:74, 75.

Pakukamba za mwana waki, Zekariya wangukamba kuti: “Yiwi wamwana, wazamudanika kuti mchimi wa Wapachanya Limu, chifukwa wazamudanjiya panthazi paku Yehova kumunozge nthowa zaki, kweniso kuziŵisa ŵanthu ŵaki kuti ataskikengi mwakugowokereka maubudi ngawu, chifukwa cha lisungu likulu laku Chiuta widu. Ndipu chifukwa cha lisungu lenili tiwonengi msana kutuliya kuchanya, kuti wapereki ukweru ku ŵanthu wo aja mu mdima kweniso mu mduzi wa nyifwa ndi kulongozga maphazi ngidu mu nthowa ya chimangu.” (Luka 1:76-79) Uchimi uwu ngwakuchiska ukongwa!

Pa nyengu iyi, Mariya wangufika kwawu ku Nazareti. Iyu wenga wechendayirwi, ndipu palivi yo waziŵanga kuti we ndi nthumbu. Kumbi ntchinthu wuli cho chatingi chichitikengi asani ŵanthu anguziŵa venivi?