Elizabeta ulaafwaafwi kutumbuka. Kwamyezi yotatwe imusazinyina Mariya wali kukkala anguwe. Lino nciindi cakuti Mariya alaye akweenda musinzo mulamfwu kuya kulubazu lwakunyika kuŋanda yakwe mumunzi wa Nazareta. Mumyezi iitandila kucisambomwe, awalo uyakutumbuka.

Kakutanainda mazuba manji kuzwa ciindi Mariya naaunka, Elizabeta watumbuka. Eelo kaka cilakkomanisya kapati kuti Elizabeta watumbuka buyo kabotu alimwi akuti walo amwanaakwe boonse bali buyo kabotu! Elizabeta naabatondezya mwanaakwe musankwa basimukobonyina abasazinyina, bakkomana anguwe.

Mulawo wa Leza kubana Israyeli wakali kwaamba kuti mubuzuba bwalusele kuzwa ciindi naazyalwa, mwana musankwa weelede kupalulwa alimwi akuulikwa zina. (Levitiko 12:2, 3) Bamwi bayeeya kuti mwana ooyu aulikwe zina lyausyi, Zekariya. Pele Elizabeta wakaka, ulaamba: “Peepe! Ulaulikwa lyakuti Johane.” (Luka 1:60) Amuyeeye kuti mungelo Gabriyeli wakaambide kuti mwana ooyu weelede kuulikwa zina lyakuti Johane.

Basimukobonyina abasazinyina bakazya ategwa: “Taakwe wamukowa wako wiitwa azina eeli.” (Luka 1:61) Kwiinda mukutambaika, babuzya Zekariya kuti aambe zina ndyayanda kuulika mwanaakwe. Zekariya walomba bbwe lipapalete akulemba bwiinguzi bwakwe kuti: “Izina lyakwe ngu Johane.”—Luka 1:63.

Mpoonya aawo, munzila yamaleele Zekariya watalika kwaambula alimwi. Ambweni muliyeeyede kuti wakaleka kwaambaula ciindi naatakasyoma ncaakamwaambila mungelo, kuti Elizabeta wakali kuyoozyala mwana musankwa. Aboobo lino, eelyo Zekariya naatalika kwaambaula, basimukobonyina bagambwa akulibuzya kuti: “Ino uyooba mwana uuli buti ooyu?” (Luka 1:66) Balibona janza lya Leza nobabona mbwaaulikwa zina Johane.

Mpoonya kazwide muuya uusalala, Zekariya wasinsima kuti: “Aatembaulwe Jehova Leza wa Israyeli,  nkaambo wabacebuka bantu bakwe akubafwutula. Alimwi watubusizya lwija lwalufwutuko muŋanda ya Davida mubelesi wakwe.” (Luka 1:68, 69) Naamba kuti “lwija lwalufwutuko,” waamba Mwami Jesu, ooyo uutanazyalwa aciindi eeci. Zekariya waamba kuti, kwiinda muli Jesu, Leza “uyootupa coolwe cakumubelekela mulimo uusetekene cakutayoowa, cakusyomeka alimwi amubululami kumbele lyakwe mazuba aabuumi bwesu boonse.”—Luka 1:74, 75.

Kujatikizya mwanaakwe, Zekariya waamba kuti: “Pele yebo, omwana uyakwiitwa kuti musinsimi wa Mupatikampatila, nkaambo uyakuunka kumbele lya Jehova kutegwa ukamubambile nzila, akuzyibya bantu bakwe kuti uyoobafwutula kwiinda mukubalekelela zibi zyabo, akaambo kamoyo waluzyalo lwa Leza wesu. Akaambo kaluzyalo oolu, tuyoobona mumuni uuzwa kujulu uumunika mbuli nolipasula zuba, kubamunikila aabo bakkede mumudima amucimvwule calufwu, akwaasololela maulu eesu munzila yaluumuno.” (Luka 1:76-79) Eelo kaka businsimi oobu bulakulwaizya!

Aciindi eeci Mariya, ooyo uulangilwa kuti tanakwatwa, weelede kuti wasika kwabo ku Nazareta. Ino ncinzi cilaacitike kulinguwe da lyatalika kulibonya?