Klostu nau Elisabet bai karim pikinini. Inap 3-pela mun, wanblut bilong em Maria i bin stap wantaim em. Nau em taim bilong Maria long tok gutbai long Elisabet na i go bek long ples bilong em long hap not bilong ol ples maunten bilong Judia, em Nasaret. Na bihain long 6-pela mun, Maria tu bai karim pikinini.

Maria i lusim Elisabet, na bihain liklik Elisabet i karim pikinini. Em i karim gut pikinini na em na bebi bilong em i stap orait! Taim Elisabet i soim bebi bilong em long ol neiba na ol wanblut, olgeta i amamas wantaim em.

Lo God i givim long lain Israel i tok bihain long taim pikinini man i bon, long de namba 8 ol i mas katim skin bilong em, na tu, ol i mas givim nem long em. (Wok Pris 12:2, 3) Sampela i ting ol i mas givim nem Sekaraia long pikinini, em nem bilong papa bilong em. Tasol Elisabet i tok: “Nogat! Nem bilong en Jon.” (Luk 1:60) Em i tingim tok bilong ensel Gebriel olsem ol i mas kolim nem bilong pikinini Jon.

Ol neiba na ol wanblut i no amamas, ol i tok: “I no gat wanpela wanblut bilong yu i gat dispela nem.” (Luk 1:61) Ol i wokim sain long han na askim Sekaraia long em i laik givim wanem nem long pikinini bilong em. Sekaraia i askim ol long givim em hap ston na em i raitim tok olsem: “Nem bilong en Jon.”—Luk 1:63.

Taim Sekaraia i mekim olsem, long rot bilong mirakel maus bilong em i op na em inap toktok gen. Tingim, em i kamap mauspas, long wanem, em i no bin bilipim tok bilong ensel olsem Elisabet bai karim pikinini. Olsem na taim Sekaraia i toktok, ol manmeri i kirap nogut na ol i toktok namel long ol yet olsem: “Dispela pikinini bai kamap wanem kain man tru?” (Luk 1:66) Ol i luksave long strong bilong God taim ol i givim nem Jon long dispela pikinini.

Bihain, holi spirit i pulap long Sekaraia na em i tok: “Blesing i ken i stap long Jehova, God bilong Israel, long wanem, em i sori long lain bilong en na  kisim bek ol. Na em i bin kamapim wanpela strongpela seivia bilong yumi long lain bilong wokman bilong en, Devit.” (Luk 1:68, 69) Dispela “strongpela seivia,” em Bikpela Jisas, bihain em bai bon. Sekaraia i tok, long rot bilong dispela Man, God bai “kisim bek yumi long han bilong ol birua, em bai givim gutpela wok long yumi, em long mekim wok bilong em na i no pret na bai yumi inap stap gut na stap stretpela manmeri long ai bilong en long olgeta taim.”—Luk 1:74, 75.

Sekaraia i tok profet long pikinini bilong em Jon olsem: “Yu, Pikinini, bai ol i kolim yu profet bilong God Antap Tru, long wanem, yu bai go paslain long Jehova bilong redim rot bilong en, bilong givim save long ol manmeri bilong en olsem em bai kisim bek ol long rot bilong lusim ol sin bilong ol. Na pasin sori bilong God bilong yumi i as bilong ol dispela samting. Dispela pasin sori bilong antap bai i olsem lait i kamap taim tulait i bruk. Na dispela i bilong givim lait long ol manmeri i sindaun long tudak na indai i laik karamapim ol, na long stiaim lek bilong yumi i go long rot bilong bel isi na blesim yumi long dispela rot.” (Luk 1:76-79) Man! Dispela tok profet i strongim tru yumi!

Ating long dispela taim, Maria i kamap pinis long Nasaret. Tingim, em i no marit yet, tasol em i kisim bel. Wanem samting bai painim em taim ol manmeri i luksave olsem em i kisim bel?